Faamaoni ma Perofeta—Taimi ua Tuanai ma le Taimi Nei

O le mea masani lava, e taumafai pea Satani e saili ina ia faaitiitia le talitonuina o perofeta ma aposetolo. I le talafaasolopito atoa, o i latou o molimau autu o le suafa o Iesu Keriso i le lalolagi atoa (tagai i le Mataupu Faavae ma Feagaiga 107:23).

I o tatou taimi, ua saili le fili e faatuai le mea na ta’ua e Peresitene Russell M. Nelson “o le mea aupito sili ona taua ua tupu i le lalolagi i aso nei,” o le faapotopotoina o Isaraelu, lea e tatau ona muamua mai i le Afio Mai Faalua o Iesu Keriso. E umia e perofeta ma aposetolo ki o lenei faapotopotoina. O lea, e feagai ai pea i latou ma mea faafeagai.

E tusa lava po o aso anamua po o aso e gata ai, ua maua foi e Satani ni auala e faasese ai nisi o fanau o le feagaiga a le Atua ina ia tau faasaga i Aposetolo a le Tamai Mamoe, i le tuanai ma le taimi nei (tagai 1 Nifae 11:34–36).

O mataupu faavae nei e lima e mafai ona fesoasoani ia i tatou e aloese ai mai le pauu atu i lenei mailei.

Faatuatua i le Alii o Iesu Keriso

O le mataupu faavae muamua o nei mataupu faavae o le uluai mataupu faavae foi lea o le talalelei: faatuatua i le Alii o Iesu Keriso ma Lana Togiola.

O le faatuatua e faasinotonu. Na aoao mai Peresitene Jeffrey R. Holland, Sui Peresitene o le Korama a Aposetolo e Toasefululua, e faapea o le faatuatua e masani lava ona faasaga agai i le lumanai.

A o faateleina lo tatou faatuatua ia Keriso ma faalagolago atu i le Atua, tatou te “tulimatai i luma ma le mata o le faatuatua, ma vaai” Ua faataunuuina a Latou folafolaga (tagai i le Alema 5:15; tagai foi i le Mosaea 18:21; Alema 32:40). I le faamanatuina o le “Ia Tasi” e faamanatu ai le 40 tausaga o le faaaliga o le 1978 e uiga i le perisitua, sa valaaulia ai e Peresitene Dallin H. Oaks, Fesoasoani Muamua i le Au Peresitene Sili, tagata uma ina ia “tulimatai atu i luma i le lotogatasi o lo tatou faatuatua ma faalagolago i le folafolaga a le Alii [tagai 2 Nifae 26:33].”

O lenei taulaiga agai i luma e uunaia ai i tatou agai atu i le faataunuuina o le folafolaga a Peresitene Nelson i lenei lava faamanatuina o le “filemu ma le lotogatasi atoatoa” ma le aso na aoao mai ai Peresitene Henry B. Eyring, Fesoasoani Lua i le Au Peresitene Sili, “o le a toe foi mai le Alii o Ieova e nonofo faatasi ma i latou o e ua avea ma Ona tagata ma o le a Ia iloa ai o loo latou lotogatasi, o se loto e tasi, ua tasi ma Ia ma lo tatou Tama Faalelagi.”

I le faafeagai, o Satani o loo saili ina ia faama’a’a le fanau a le Atua ina ia mamau o latou taulaiga i le taimi tuanai, manatunatu i tulaga, faamatalaga, po o aoaoga o le tuanai—e oo lava i vaega ua faamaninoina e perofeta ma aposetolo mulimuli nei. I le avea ai ma “lē na molia o tatou uso … i le ao ma le po” (Faaaliga12:10), na te faaoso ai faitioga faifai pea o perofeta ma aposetolo a le Atua ma a latou aoaoga. O lenei faiga faatogafiti leaga e faavaivaia ai le faatuatua i le autu o la latou molimau, o Iesu Keriso—o lona faamoemoega autu faatiapolo lea.

O faamatalaga o le lotogatasi, filemu, ma le nofolelei mai Aposetolo i ona po nei ua manino, e ui ina poto Satani i le faaosoina o finauga ma le le lotogatasi, o le taimi lenei mo fanau uma o le feagaiga a le Atua (tagai 1 Nifae 11:34–36) ina ia tutu faatasi i le taliaina ma le faatinoina o upumoni e faavavau ua faaalia mai e le Atua e ala mai i Ana perofeta ma aposetolo. O le faia o lena mea, e mafai ai ona avea i tatou ma tagata lotogatasi, fiafia, mamana, feagaiga, ma tumu i le faatuatua i le leai o se faailogalanu, itupa, ituaiga, po o isi mea e le nofolelei ai.

O aoaoga a perofeta ma aposetolo e musuia ai lenei lotogatasi ma le faatuatua mautinoa ia Iesu Keriso, lea o le a uunaia ai i tatou i luma i taimi uma.

O le vaai mai i o tatou aso, na aoao mai ai Moronae i le ala e mafai ai ona puipui i tatou mai le faitioina o perofeta ma aposetolo: o le mataupu faavae o le le tausalaina po o le faamasino atu.

“Aua tou te tauleagaina a’u ona o o’u le atoatoa,” na fai mai ai Moronae, “po o i latou o e na tusitusi muamua atu ia te ia, ae nai lo lena ia outou avatu le faafetai i le Atua ina ua ia faaalia atu ia te outou o matuo le atoatoa, ina ia outou aoao ia sili atu ona outou popoto nai lo i matou” (Mamona 9:31; faaopoopo le faamamafa).

I se isi faaupuga, tatou te taulai atu ma aoao mai aoaoga ma molimau a perofeta ma aposetolo e uiga ia Keriso ma Lana talalelei ma aloese mai le vaavaai mo o latou le atoatoa. I le talafaasolopito atoa, ua faaali mai ai e le Atua nisi o nei le atoatoa mo lo tatou manuia ma fesoasoani ia i tatou e aoao ia sili atu ona atamamai. Ou te faafetai atu ia te Ia mo le faia o lena mea.

Ae, e tatau lava ona tatou faaeteete. I le konafesi aoao ia Aperila 2019, na sii mai ai e Peresitene Eyring le aoaoga lenei a Peresitene George Q. Cannon (1827–1901), Fesoasoani Muamua i le Au Peresitene Sili: “Ua filifilia e le Atua Ana auauna. Na fetalai mai Ia o Lana aia tatau o le ta’usalaina o i latou, pe a manaomia le ta’usalaga. Na te le’i tuuina mai ia i tatou taitoatasi ia faitio ai ma ta’usalaina ai i latou. E leai se tagata, po o le a lava le malosi o i ai lona faatuatua, po o le a lava le maualuga o le Perisitua, e mafai ona tautala leaga e uiga i ē ua faauuina a le Alii ma saili masei i le pule a le Atua i luga o le fogaeleele e aunoa ma le faatupuina o Lona lē fiafia. O le a tuumuli ese lava le Agaga Paia mai sea tagata, ma o le a alu atu o ia i le pogisa. I le tulaga lea, e te le o iloa ea le taua o le tatau ona tatou faaeteete?”

Ua ia te oe ma a’u le faamanuiaga ma le poloaiga a le Alii e faatatau i aoaoga ma faatinoga faaperofeta, e aofia ai soo se mea e ono faigata ona tatou malamalama i ai pe taliaina:

“Ia ua’i atu i ana upu uma ma poloaiga o le a ia tuu atu ia te outou e pei ona ia mauaina, ma savavali i le paia atoa i o’u luma;

“Ona o lana upu ia outou talia, e pei lava ua mai i loʼu lava gutu, i le onosai ma le faatuatua atoa” (Mataupu Faavae ma Feagaiga 21:4-5; faaopoopo le faamamafa).

E toe faapea atu, tatou te le tausalaina pe faamasino atu (tagai Mataio 7:1–2). A o ou agai i luma ma le faatuatua ia Iesu Keriso ma le lotofaafetai mo le faamanuiaga o perofeta ma aposetolo, ua matuai faamanuiaina lava a’u (tagai i le Mataupu Faavae ma Feagaiga 21:6).

O le isi mataupu faavae autu o le aloese mai le faasili atu o la tatou pule po o le tauave o matafaioi e le o ia i tatou. O nei mafaufauga e faaseseina ai i tatou i le mafaufau maualuga i o tatou lava manatu, lea e masani ona tupu pe a tatou mafaufau maualalo tele i aoaoga a perofeta ma aposetolo. O le tausalaina o perofeta ma aposetolo, e aofia ai perofeta ma aposetolo ua mavae, e mautinoa lava ua sili atu nai lo la tatou pule, e pei ona faapolopolo e le Alii lenei tomai ia te Ia lava. Ou te matua mautinoa o lo tatou Faaola e silafia mea uma, alofa, ma alofa mutimutivale ua fetalai mai pe o le a talanoa mai ma faamagalo ma le naunautai soo se mea sese po o ni le atoatoa o le taimi ua tuanai, e pei ona tatou faamoemoe o le a Ia faia mo i tatou i le taimi nei.

O le isi faataitaiga o le faasili atu o la tatou pule o le manatu lea e taitai perofeta ma aposetolo po o a faatinoga e tatau ona faia e le Ekalesia po o le auala e tatau ona pulea ai. O le matafaioi lena a le Alii, ae le o sa tatou matafaioi (tagai i le Mataupu Faavae ma Feagaiga 28:2–7). Po o le a lava lo tatou faamoemoega lelei, o le tausalaina ma le manatu e taitai perofeta ma aposetolo e mafua uma mai le faamaualuga ma e taitai atu ai i le faaseseina ma le toilalo e mulimuli i le pule faaperofeta.

Mai le 1820 seia oo mai i le taimi nei, ua faaauau pea ona aoaoina e le Alii Ana perofeta, tagatavaai, ma talifaaaliga i le faagasologa faafaaaliga lea Na te taitaia ai Lana Ekalesia.

Na aoao mai Peresitene Nelson:

“A matou potopoto o se Aufono a le Au Peresitene Sili ma le Korama a le Toasefululua, e avea a matou potu fono ma potu o faaaliga. E faalogoina le afio ai o le Agaga. … E ui atonu e eseese i matou i o matou uluai manatu, ae o le alofa matou te lagonaina mo le tasi ma le isi e tumau. E fesoasoani lo matou lotogatasi ia i matou e iloatino ai le finagalo o le Alii mo Lana Ekalesia.

“I a matou fonotaga, e le mafuli ni faaiuga i le itu e toatele i latou e tutusa manatu! Matou te faalogo ma le agaga tatalo i le tasi ma le isi ma talanoa ma le tasi ma le isi seia oo ina matou autasi.”

Na matauina e Elder D. Todd Christofferson o le Korama a Aposetolo e Toasefululua: “O le faamoemoega e le na o se maliega a sui auai o le aufono ae o faaaliga mai le Atua. O se faagasologa o loo aofia uma ai le mafuaaga ma le faatuatua mo le mauaina o le mafaufau ma le finagalo o le Alii.”

O le toefuataiina lelei mai o lenei mataupu faavae o le saogalemu, e faateleina ai le mautinoa i le mafai e o tatou taitai o i ai nei ona pulea le Ekalesia e tusa ai ma le finagalo o le Alii i taimi uma.

Ioe, o Iesu Keriso o loo tu i le ao o Lana Ekalesia, ma Na te taitaia Ana perofeta. O mea atonu tatou te vaai i ai o ni lē atoatoa i a latou upu po o faatinoga, o le mea moni, e atagia mai ai le le atoatoa i la tatou vaaiga po o le malamalama faaletino. O le manatuaina o ala a le Alii e maualuga atu nai lo o tatou ala ma o Ona mafaufauga e maualuga atu nai lo o tatou mafaufauga (tagai Isaia 55:8–9) e mafai ai ona tatou aloese mai le faamasinoina o perofeta, e aofia ai ma i latou ua tuanai. O lenei uiga lotomaualalo e mafai ai ona tatou gauai atu i upu a perofeta soifua “i le onosai ma le faatuatua atoa” (Mataupu Faavae ma Feagaiga 21:5; tagai foi 1:28).

E fesoasoani foi ia i tatou e faatele le mauaina o faaaliga, faamoemoe, ma le faatuatua ia Keriso i se lalolagi ua faateteleina le faigata. Na aoao mai Iakopo, “Matou te suesue ai i perofeta, ma sa matou maua faaaliga e tele ma le agaga o valoaga; ma o le i ai o nei molimau uma ua matou maua ai se faamoemoe, ma le maluelue ai lo matou faatuatua” (Iakopo 4:6). Afai tatou te lotomaualalo, o nei aafiaga paia e mafai ona aveesea mai ia i tatou soo se manao ina ia saili masei i perofeta ma aposetolo, e aofia ai i latou ua tuanai (tagai Mataupu Faavae ma Feagaqiga 88:124; 136:23). O le lotomaualalo e fesoasoani ia i tatou e “suesue i perofeta” mo upumoni e faateleina ai lo tatou olioli ma le filemu ae le saili mo ni le atoatoa.

I lena agaga, ou te tuuina atu ai la’u molimau mautinoa ma le alofa o perofeta mai ia Iosefa Samita agai i luma o ni perofeta a le Atua i se laina e le motusia o le faasologa ma e aofia ai ma Peresitene Russell M. Nelson. O se faamanuiaga maoae mo a’u le “suesue i perofeta” ma faalatalata atili atu i le Atua e ala i aoaoga a i latou taitoatasi.

Ou te molimau atu o i latou na valaauina i le aposetolo paia i lalo o le taitaiga a nei perofeta sa avea ma o ni molimau faapitoa o le suafa o Iesu Keriso i le lalolagi atoa. O se faamanuiaga le vaai ma agai i luma ia Iesu Keriso e ala i aoaoga a nei molimau.