E Mafai Faapefea Ona Ou Faitio?

Saunia e Yesmin Oliveros, Zaragoza, Sepania

O a matou fesiitaiga e fa o se aiga sulufai na faamaonia le avea ma se tofotofoga maoae. Ae matou te pipiimau i le ai uamea ma le mautinoa o loo uunaia i matou e le Alii agai atu i se lumanai sili atu.

I le tautoulu o le 2019, sa ou taunuu ai i Sepania ma la’u fanau, o Arona e 8 tausaga le matua ma Jorge e 17 tausaga le matua, o le e i ai faaletonu o le mafaufau. Faatasi ai ma na o a’u miti na teuina i totonu o se atopau, sa ou pipii atu ai i le Atua ma faatuatuaina atoa o Ia.

Sa faafeiloai i matou e se Samaria agalelei i lona fale, lea sa matou nonofo ai mo le lua vaiaso. Ae o le aveesea o Jorge mai lona siosiomaga masani sa lei faigofie. Ona o lona aafiaga, e mulimuli ai o ia i ni faiga masani faatapulaaina. O nai po muamua lava, na te tatu’ia ai puipui, ma e vave lava ona ou tu i luga e taofi o ia mai le feala i luga o isi. Sa ou tootuli i ona autafa ma tatalo, ma manatua ai le Isaia 41:10: “Aua e te fefe: aua ou te ia te oe: aua le fetepatepai; aua o au lou Atua: ou te faamalosi oe; e moni ou te fesoasoani ia te oe; e moni ou te taofia oe i lo’u lima taumatau o le amiotonu.”

I le matou vaiaso lona lua i Sepania, sa matou taunuu ai i le lotu i le taimi tonu a o faatoa faaiuina le sauniga faamanatuga. Sa ou alu atu i se tamaitai talavou sa faatasi ma tamaiti o le Peraimeri ma faamatala atu i ai o au o se tagata o le Ekalesia ae ou te lei masani pe iloa se tasi. Sa ia faailoa atu i matou i nisi o tagata o le ekalesia.

O le aso na sosoo ai, na talia ai i matou e le aufono a le aai o Zaragoza o ni tagata sulufai ma ave i matou i se fale mautotogi e leai se vai po o se eletise. O le au epikopo, o le Aualofa, ma le korama a toeaina mai le uarota na matou auai ai, na latou fesoasoani mai ia i matou i palanikeke, meaai sa le manaomia ona faavelaina, lavalava o le taumalulu, ma isi mea na manaomia.

Sa amata le aoga a la’u fanau, ma sa ou amataina se kosi faaleaoaoga. O taimi o taumafataga o se luitau mo Jorge, o lē sa masani ona ai i le aoauli. Sa ta’u mai e lana faiaoga ia te au e tusa lava po o ai sa aoao atu, pe a ta le uati i le aoauli, o le a ia aveina i fafo ana meaai ma amata ona ai.

“O Le a Ou Anapogi Foi”

O a matou fesiitaiga e fa na faamaonia o se tofotofoga matautia. Sa ou tatalo ina ia tumau le malosi ae sa masani ona ou tagi na o au. Mo ni vaiaso, sa na o le lua pe tolu itula na ou moe ai i le po. Ina ua mavae ni nai aso na su’esu’e ai se galuega, sa faamanuiaina au i se galuega o le tausiga o se tamaitai talavou ua aafia i le kanesa o le faiai. I le mae’a ai o sifi o galuega taitasi, sa ou pikiina la’u fanau, fesoasoani ia i la’ua i a latou meaaoga, ona faatoa faia lea o a’u meaaoga.

Sa ou tausia lenei tamaitai lelei mo se tausaga, seia oo ina maliu o ia i le 48 o ona tausaga, ma tuua ai ni tamaiti laiti se toalua. O lona tulaga na uunaia ai au e fesili ifo ia te a’u lava, “E mafai faapefea ona ou faitio?” O le tausiga o ia na auala mai ai seleni mo matou manaoga ma faatumulia ai lo’u agaga i le lotofaafetai mo lo’u Tama Faalelagi.

O aso uma lava i le fale matou te faitauina ai tusitusiga paia, tatalo, ma faatulaga ni faiga masani e tuuina atu ai ia Jorge le puipuiga. I le amataga o le 2024, sa amata ai ona matou sauniuni e o i le Malumalu o Madrid Sepania. Ina ia latalata atili atu i le Tama Faalelagi, sa ou lagonaina e tatau ona matou anapopogi o se aiga. Sa ioe Arona, ma o le taeao na sosoo ai na ta’u mai ai e Jorge ia te au, “Tina, o le asō o le a ou anapogi foi.” O se taimi o le olioli e le mafaamatalaina.

o le tusitala ma lona aiga i luma o le malumalu — “Ina ia latalata atili atu i le Tama Faalelagi a o amata ona matou sauniuni e o i le Malumalu o Madrid Sepania, sa ou lagonaina e tatau ona matou anapopogi o se aiga,” o le tala lea a Yesmin. “Sa fai mai Jorge ia te au, ‘Tina, o le asō o le a ou anapogi foi.’ O se taimi o le olioli e le mafaamatalaina.”

Talu mai la matou asiasiga i le malumalu, ua tele le suiga lelei a Jorge. Ua sili atu ona fetuutuunai o ia i ana taimi faatulagaina. I Aso Toonai na te saunia ai ona lavalava ina ia mafai ona ia saunia e tufa le faamanatuga i le Aso Sa. Ua tele foi se alualu i luma o ia i tulaga tau aoaoga.

O le asō ua matou ola tutoatasi, ma oloo lagolagoina e se Tama Faalelagi alofa. Ua faatuina i matou e Iesu Keriso mai le lefulefu (tagai Isaia 61:3). E ala i le totogiina o a matou sefuluai, ua matou maua ai le tele o faamanuiaga. Matou te pipiimau i le ai uamea (tagai i le 1 Nifae 8:24, 30; 11:25; 15:23) ma le mautinoa o loo matou agai atu i se lumanai sili atu.