“O le a Taitaina A’u e le Alii,” Liahona, Ian. 2026.
O Leo o le Au Paia o Aso e Gata Ai
O le a Taitaiina A’u e le Alii
E ala i le faatuatua, usiusitai, onosai, ma le tatalo, ua ou aoaoina ai e le tatau ona ou fefe mo le lumanai.
Ata na tusia e Allen Garns
Sa o’u tuputupu a’e i le fiafia e pesepese ma i se siosiomaga o musika. O la’u miti a o tamaitiiti o le avea lea ma se tagata pese faapolofesa. Sa ou manumalo foi i le tele o tauvaga pese. Ae i se taimi i lo’u olaga, sa ou lagonaina se gaogao pe a o’u mafaufau i le faamoemoega a le Atua mo a’u i tua atu o le lauiloa ma viiga mai i isi.
O le faateleina o le i ai o le talalelei a Iesu Keriso i lo’u olaga ua fesoasoani ou te maua ai le faatuatua i taimi o le le mautonu. Ua fesoasoani foi ou te malamalama ai sa finagalo le Tama Faalelagi ou te faaaogaina le taleni na Ia tuuina mai ia te au e faalatalata atili atu ai ia te Ia ma viia ai o Ia.
E ui ina sa ou lafoaia la’u miti, ae sa ou lagonaina e tatau ona faaauau pea ona ou pese ma suesue i le musika.
E oo atu i le 25 o ou tausaga, ua mae’a o’u aoaoga i le tusiata fale ma sa ou suesue foi e ala i le BYU–Pathway Worldwide ma le Iunivesite o Polika Iaga–Idaho, lea na fesoasoani ia te au e faaleleia ai lo’u tomai e tautala faaPeretania.
Ona tupu lea o se mea faavavega.
Sa ou maua se valaaulia e avea ma se faifeautalai faamusika o se vaega o le Polokalama a le Aufaipese a le Tapeneko i le Lalolagi Atoa. Ou te lei iloaina, ae o mea uma sa ou faia mo le tele o tausaga na fesoasoani e saunia ai au mo lenei taimi. O le valaaulia o se tali lea i a’u tatalo ma manaoga. E silafia e le Tama Faalelagi le iuga mai le amataga ma faatagaina au e pese faatasi ma le Aufaipese a le Tapeneko i le Lotoa o le Malumalu i le taimi o le konafesi aoao ia Oketopa 2024.
E ala mai i lenei aafiaga, e mafai ai ona ou molimau atu i le mana o le taitaiina e le Agaga Paia, le onosai, ma faatuatuaina o loo i ai i le Atua se faamoemoega, e ui atonu tatou te le malamalama i lena faamoemoega. E pei ona folafolaina mai ia i tatou, “Atonu e le manino i taimi uma le ala vave, ae e mafai ona tatou mulimuli i le Faaola ma le faatuatua ina ia iu ma le matagofie ma le manumalo la tatou faigamalaga ona o le a Ia taialaina i tatou ma le saogalemu i le mea e tatau ona tatou i ai.”
Mo i latou o loo sailia lo latou ala agai i luma, ia iloa ua saunia e le Alii nisi o mea sili atu nai lo mea e mafai ona e mafaufauina. Afai tatou te mulimuli ia te Ia, o le a tatou maua mea ua Ia saunia mo i tatou. Atonu e le manino le ala, ma atonu e faigata le olaga, ae o loo galueaina pea e le Alii vavega mo Ana fanau.
Ua ou aoaoina e ala i le faatuatua, usiusitai, onosai, ma le tatalo, o le a taialaina a’u e le Alii.