Upumoni e 5 e Faamalosia ai Oe e Tetee Atu i le Faaaogaina o Ponokalafi

O se tasi o mea na fesoasoani ia te au o le aoaoina lea o feusuaiga e matagofie ma paia, ae le faalumaina. O o tatou lagona ma manaoga faafeusuai ua tuuina mai e le Atua e fesoasoani ia i tatou e foafoa ai fanau ma maua le olioli, alofa, ma le lotogatasi ma o tatou taitoalua pe a tatou faaipoipo. Ua poloaiina i tatou e le Atua e faaaoga lo tatou gafatia faalefeusuaiga i totonu lava o le faaipoipoga ina ia mafai ai ona tatou maua le lelei atoatoa o lenei mana.

Na aoao mai e Elder David A. Bednar o le Korama a Aposetolo e Toasefululua e faapea o sootaga tau feusuaiga “ua le na o se naunau e fiailoa, se manaoga ia faamalieina, po o se ituaiga o taaloga po o faafiafiaga e tulimatai ma le manatu faapito” ae o "se tasi o faailoaga taua o lo tatou natura paia ma gafatia, ma o se auala o le faamalolosia o noataga faalelagona ma faaleagaga i le va o le tane ma le ava.”

O o tatou moomooga e faailoa atu le alofa i totonu o le faaipoipoga o ni manaoga amiotonu. Ma “o le iai o ni lagona faalefeusuaiga ma le faatupuina o le tuinanau o se mea masani” mo tamaitai ma alii. Ae e taumafai Satani e faaaogaina o tatou manaoga e pulea ai i tatou. Na te faaosooso i tatou e tuusao atu o tatou tulaga tau feusuaiga agai i amioga lamatia nai lo o faamoemoega faalelagi.

O vaaiga a le lalolagi e faapea o le pule i le tino ma le matamata i ponokalafi e le afaina pe o ni amioga maloloina. I isi taimi sa ou taumafai e faaaoga nei manatu e faamaonia ai pe tauamiotonuina ai a’u amioga. Ou te faapea ifo ia te a’u lava, "O le a le afaina ai se tasi, o lea la e le afaina."

Peitai, sa ou iloa o le tauamiotonuina o lau amio e lei aumaia ai le filemu ia te a’u. Nai lo lena, sa ou lagona le gaogao, le fiafia, ma le saisaitia i a’u mausa. Sa amata ona ou iloaina o a’u amioga—lea ua uma ona ou iloa e feteenai ma poloaiga a le Atua—sa taofia au mai le fesootai atu i le Atua ma maua ai le olioli moni.

E ui lava sa ou manao e suia a’u mausa, ae o nisi taimi sa foliga e faigata. Ae sa ou maua le faamoemoe e ala i le liliu atu ia Iesu Keriso.

Sa ou aoaoina e iai Lona agaalofa mo tagata uma e vaivai, tiga, pe amoina ni avega mamafa. Sa ia faalolotoina lou manaoga e salamo ma ia saoloto ma sa aumaia lo’u malosi e filifili ai amioga lelei atu. E ui sa ou tauto’ai i le tele o taimi, sa Ia fesoasoani malie mai ia te a’u e “lulu ese filifili” ia sa tosoina a’u i lalo (2 Nifae 1:23).

Sa amata ona ou suia mausa leaga i gaoioiga ia sa aumaia le faamalieina moni, e pei o le faaaluina o le taimi ma e alofa iai, atiinaeina o a’u taleni, ma le suesueina o le talalelei. Sa ou maua foi le malosi e ala i le fefautuaa’i ma lo’u epikopo ma isi tagata lagolagosua.

E ui sa ou faia se faasolooga lelei, ae o nisi taimi ou te lagona ai pea le lotovaivai pe matamuli, ae sa ou taumafai e faalagolago ia Iesu Keriso ma Lana Togiola. Sa tatau ia te au le faatino o le faatuatua lea e oo lava i o’u vaivaiga, ae ua lava Lona alofa tunoa mo a’u (tagai i e Eteru 12:27).

Na aoao mai e Elder J. Devn Cornish, o se Pulega Aoao o le Fitugafulu ua malolo, “Afai o le a e taumafai moni lava ma o le a e le fai alofaga pe fouvale—o le salamo soo ma le aioi atu mo le alofa tunoa po o le fesoasoani, a Keriso—o le a mautinoa lava le ‘lava o lou lelei,’ o lona uiga, o le taliaina i luma o le Alii.”

Sa aoao mai le perofeta o Alema, “Ia pulea ou tuinanau uma, ina ia mafai ona faatumuina oe i le alofa” (Alema 38:12). O le Pulea e mafai ona faauigaina o le faasino, faatonu, po o le taofi.

Na ou maua pe afai ou te faatino o’u lagona taufeusuaiga i auala le taofiofia pe amioletonu, ou te lagonaina se lagona o le gaogao. Ae pe a ou pulea ma faatonutonu o’u lagona taufeusua’iga i faamoemoega amiotonu, sa faatumuina ai a’u i le alofa.

A o lei faia so’u toalua, sa ou maua le malosi e ala i le taula’i atu i manaoga amiotonu seia iai se aso e faaalia ai o’u lagona tau feusua’iga i totonu o se faaipoipoga e faavavau. Pe a ou feagai ma faaosoosoga, ou te taumafai ia manatuaina o le mea moni o lo o ou manaomia o le alofa e le uma, ae le o se faamalieina le tumau. Sa ou maua foi le atoatoa ma le fiafia e ala i le fesootai ma isi ma le faamalosia o la’u sootaga ma le Tama Faalelagi, Iesu Keriso, o lo’u aiga, ma a’u uo.

Mulimuli ane, sa ou feiloai ai i se tasi o le a ou faaipoipo mulimuli iai. Faatasi ma ia, sa ma taumafai e ola i le tulafono o le legavia ma saunia mo le faaipoipoga i le malumalu. Sa faaosofia i ma’ua e ala i lo ma alolofa mo le Alii, lo ma alolofa mo le tasi ma le isi, ma lo ma mananao ina ia maua se sootaga e faavavau fiafia, ma maloloina.

O le taimi nei, a o ma faamamalu a ma feagaiga o le faaipoipoga, ma te fiafia i le atoatoaga o faamanuiaga o a ma tulaga taufeusua’iga mai le Atua. O lo ma tuuto i le tasi ma le isi ma ia Iesu Keriso ua mafai ai e i ma’ua ona lagonaina le faamalieina, tasi, ma le olioli.

E mafai ona faigata le tausia o le tulafono o le legavia ma aloese mai mausa leaga, aemaise lava pe a e lagonaina le tuuatoatasi po o le faatalitali mo se avanoa e faaipoipo ai.

Ae ua iai le mana i le Faaola e fesoasoani ai ia i tatou e faatoilalo faaosoosoga ma maua le atoatoa. Na molimau mai talu ai nei ia Peresitene Russell M. Nelson : “Sa ave e Iesu Keriso i Ona lava luga au agasala, ou tiga, ou lototiga, ma ou vaivaiga. E te le tau tauaveina na mea na o oe! O le a Ia faamagalo oe pe a e salamo. O le a Ia faamanuia oe i mea e te manaomia. O le a Ia faamalolo i lou agaga ua manu’alia.”

E finagalo le Atua e te lagonaina le faamalieina tau feusua’iga ma le olioli i le ala Na te finagalo ai. O le a Ia fesoasoani ia te oe e folau i le ala o feagaiga. E tumu o Ia i le agaalofa ma e mafai ona fesoasoani ia te oe e faatoilalo au tauiviga ma mauaina ou manaoga amiotonu.