O se Tatalo i Lo’u Loto

Atatusi na tusia e Allen Garns

Ina ua ou auai i le aoga tulagalua, sa tuuina mai e lo’u tina i taimi uma la’u meaai o le aoauli, sogi mai ia te a’u i le muaulu, ma fai mai, “Fai le mea sili e te mafaia i le asō, ma manatua ia teu se tatalo i lou loto.” Sa ia fai mai le mea lava lea e tasi i taeao uma, e oo lava i le aoga maualuga.

O le mea moni, “ia teu se tatalo i lou loto” o le tala mulimuli lea na ia fai mai ai ia te au a o ou tuuvaa atu i se vaalele e alu mo la’u misiona mo le lua tausaga i Florida. Ua fai ma masani lo’u faalogo i lena faaupuga ae ou te lei mafaufau tele i ai a o ou tuputupu ae. Sa ou manatu ua na o se mea e masani ona fai mai ai lana tupulaga, e pei o le “Ia manuia le aso.”

I le avea ai ma se faifeautalai faamisiona, sa ou aoao ai e tautala faaSipaniolo a o auauna atu i Miami, Florida, ISA. Sa ou iloaina o a matou uo fou, o le toatele e mai Cuba ma Puerto Rico, sa pei lava o lo’u tina. O aiga uma sa matou asia na faatofa ia i matou ma se moomooga faapelepele faapena: “Vaya con Dios” (O ma le Atua).

Ua iu ina amata ona ou malamalama i le uiga o le tala a lo’u tina, sa amata ona ou saili mo ni auala e teu moni ai se tatalo i lo’u loto. A o ou faia lena mea, sa tuputupu ae lo’u lotofaafetai mo le Tama Faalelagi ma Lona Alo, o Iesu Keriso. Sa ou maua se loloto faaopoopo o le onosai i taimi o tofotofoga ma faigata. Sa ou lagonaina se alofa sili atu mo o’u matua ma se agaga faafetai mo osigataulaga sa la faia mo a’u.

I se tasi aso sa ou faitau ai e uiga i le asiasiga a le Faaola i sa Nifae ina ua mavae Lona Toetu. I le aso lona lua o Lana asiasiga, “sa ia poloai atu i ona soo ia latou tatalo.” A o latou tatalo, sa tatalo foi le Faaola, ma fetalai atu i upu “silisili ma le ofoofogia”. Ina ua uma, sa Ia poloaiina le motu o tagata “ia latou le tuu le tatalo i o latou loto” (3 Nifae 19:17, 34; 20:1).

O se tasi o auala e faia ai lena mea o le mafaufau lea i le tatalo o se faavaa o se ata o loo siomia ai a tatou gaoioiga i aso taitasi. O lena auivi o le tatalo, faatasi ai ma le alofa ma le lotofaafetai, e fesoasoani tatou te taulai atu ai i le Faaola ma tausia a tatou feagaiga.

Ou te faafetai mo le fautuaga a lo’u tina i aso taitasi ia “aua nei muta le tatalo” i lo’u loto. O lena mea ua ou iloa ai se eseesega tele i lo’u olaga.”