Sa ou lagonaina le Filemu.

Saunia e Nicole Muramatsu, São Paulo, Pasila

“E peiseai sa le lava ea lo’u tiga,” sa ou mafaufau ai, “ua tatau nei ona ou taina se viiga faigata.”

Ina ua ou mauaina ni valaauga se lua o le Ekalesia o se ta piano i le vaiaso lava lea e tasi, sa amata ona ou popole i le auala o le a ou maua ai se taimi e faataunuu ai isi o’u tiutetauave i le fale, galuega, ma le aoga. I lo’u loto, o lo’u naunautaiga sili lava o le auauna atu lea i le Alii ma aumaia Lona Agaga i tagata a o faaleleia a’u taleni. Peitai, sa ou lagonaina le le agavaa o le le mafai ona tuuto atu a’u lava i o’u valaauga fou e pei ona ou manao ai.

O le vaiaso na sosoo ai, o le tulaga manaomia i le falefaigaluega sa o’u i ai sa maualuga. Ona o le tele o la’u galuega e aofia ai le taina o upu, o lea na amata ai ona tiga o’u lima ma tapulima. Sa ou popole pe o le a mafai ona ou taina le piano pe afai e le aluese lo’u tiga.

I le Aso Sa, a o ou taina musika ae lei amataina le sauniga i le piano i le falesa, sa amata ona toe tiga o’u maso. Sa vave ona ou tatalo i lo’u loto, ma ole atu mo le malosi e faaauau ai pea ona tata.

I le taimi o le faamanatuga, sa ou iloa ai o le isi viiga faatulagaina o se tasi lea ou te lei taina i se taimi umi lava. “E peiseai sa le lava ea lo’u tiga,” sa ou mafaufau ai, “o lenei e tatau ona ou taina se viiga faigata.” O le taimi lena na ou faitau ai i upu nei, lea na fai mai ai le mea tonu lava lea sa ou lagonaina:

Ia ou [ta] atu;
Ma au uunaiga.
Ia ou siitia se uso
I se tulaga mauluga.

A o ou faitau, sa ou lagonaina le filemu. Sa ou iloa na silafia e le Faaola o’u tiga. O le mea moni lava, na Ia puapuagatia i ia tiga (tagai i le Alema 7:11–12). Ou te lē tau uia lenei tulaga na’o au. Ou te lei mafaufauina, ae sa ou lagonaina le Agaga o le Alii.

Ina ua amata ona ou taina le piano, sa ou le toe lagonaina se tiga, ma sa lagona e o’u tamāilima le masani i nota. Sa ou iloaina o la’u auaunaga na tapenaina le ala mo le faamalologa ma aumaia ai a’u ia latalata atili atu i le Tama Faalelagi.

A o ou mafaufau loloto i lo’u aafiaga i le piano, ou te iloa e le na’o a’u sa taina le piano. Sa ou ootia i le mana ma le alofa tunoa o Iesu Keriso—o se aafiaga faaleagaga na oo mai ona sa ou auauna atu ia te Ia. Ou te iloa o le a i ai pea o Ia iina e lagolago ma faamalosia i tatou pe afai tatou te naunau e auauna atu ia te Ia.