E Le’i Leiloa i le Faaola

Ata na tusia e Allen Garns, faatasi ai ma le faatagaga e faaalia ai le atavali a Del Parson O Le Tamai Mamoe na Leiloa

Sa filifili talu ai nei se tagata o lo’u aiga ma lona toalua e tuua le Ekalesia, faatasi ai ma le la fanau laiti. O le tala sa matuā tiga mo lo matou aiga. I nai vaiaso na sosoo ai, sa ma taumafai ai e saili lo matou tulaga masani fou.

O aso na sosoo ai mai la latou faasilasilaga sa faatumulia i le ita, loimata, ma tatalo faamaoni i lo tatou Tama Faalelagi. O se tasi o tali vave i a’u tatalo o le manaomia lea ona ou tapuai i le malumalu i vaiaso taitasi. I le avea ai ma se tagata aoga ma se āva ma se tinā faigaluega, sa ou iloa ai o lena tali sa taufaafefe, ae sa ou naunau ia ou usiusitai i le uunaiga i le tulaga e mafai ai.

I se tasi afiafi ina ua mavae se sifi faigata tele i le galuega, sa ou lagonaina le malosi e tatau ona ou alu i le malumalu i lena po. Sa ou fai atu i lo’u atalii e sau ma te o e fai galuega amata (mulumuluga).

Ina ua ma taunuu atu i le malumalu, sa alu ai lava le tagata ia i lana pito. A o ou faia galuega sui mo le toatele o uso ma faalogologo i o latou faamanuiaga folafolaina, sa lofituina a’u i lagona. Sa le mafai ona aveesea mai lo’u mafaufau tagata femoumoua’i o lo’u aiga.

Ina ua uma, sa fai lo’u ofu, agai atu i le potu faatalitali, ma nofo i lalo. Ae peitai, e lei umi, ae ou lagonaina e tatau ona ou fesuia’i nofoa ina ia mafai ona ou vaai atu i lo’u atalii ina ua sau o ia i fafo mai le potu e sui ai laei o alii.

Sa ou me’i ese mai ae sa ou lagonaina le le mautonu i nofoaga uma sa ou nofo ai—seia iu lava ina ou saofai i luga o se nofoa e faasaga i le puipui e lata ane i le faitotoa o le malumalu. Faatoa uma lava ona ou pikiina i luga tusitusiga paia, ma taumafai e faafilemu lo’u loto atuatuvale, ae ou tilotilo atu loa i luga agai i le puipui.

O iina, sa ou vaaia ai se atavali telē o le Faaola o si’iina se tama’i mamoe i Ona aao. Sa faafuasei ona faamanatu mai e le Agaga ia te a’u e ui ina sa ou lagona le leiloloa o tagata pele o lo’u aiga, ae sa le’i leiloloa i latou i lo tatou Faaola.

“O ai ea so outou e ana mamoe e selau, afai e le iloa le tasi, e le tuua e ia le ivagafulu ma le iva i le vao, a e alu ma saili i le na le iloa, seia maua?

“A maua, ua faafuata ma le olioli” (Luka 15:4–5).

E faaauau pea ona tatou alolofa ma tatalo mo i latou o e ua femoumoua’i solo. Ae a oo mai le faanoanoa ia te a’u, ou te manatua lenei aafiaga, ma le faamoemoe o le a i ai se aso, o i latou o e ua leiloloa o le a toe foi mai ma le fesoasoani mai se Faaola alofa.