Saogalemu i le Talalelei Toefuataiina a Iesu Keriso

Saunia e J. Anette Dennis

Fesoasoani Muamua i le Au Peresitene Aoao o le Aualofa

O le ala e toe foi atu ai i le Atua e manino lava le faailogaina pe afai tatou te faatuatua ma faalagolago i lo tatou Faaola.

vaaiga i vae o se tagata o loo savali i se auala

Ona o o tatou natura pa’ū ma tulaga o le olaga nei, ua o se tulaga masani ai ia i tatou uma lava le o ese uma ai mai le Atua sa tatou iloa ma alolofa i ai i lo tatou muai olaga. O le natura na o le olaga faaletino. Ma o lea, ua Ia tuuina mai ai ia i tatou ni auala e faatumauina ai lo tatou taula saogalemu ia te Ia, ia faamauina o tatou loto ia te Ia, ma fesoasoani ia i tatou ia agai i luma ma le saogalemu i le mea e mafai ai e ala i lenei laufanua maina o le olaga.

I le taimi o taua maoa’e o le lalolagi, o le a nana ai e autau faaauupegaina ni maina, po o ni mea faapāpā, i lalo o le eleele. Sa i ai ni laufanua tetele o maina natia, ma atonu o le a savavali atu ma le lē iloa e se autau i luga o na fanua maina ma pāpā ai.

Ina ua mavae taua, e faitau afe maina e lei pāpā na totoe, ma o le toatele o tagata, e aofia ai tamaiti, na maumau o latou ola po o latou vae/lima i le taimi na latou o atu ai ma le le manatu mamafa i laufanua maina. O faalapotopotoga ua tu’uto atu i le sailia ma le faailogaina o maina i na laufanua maina ua faasaoina ai le tele o ola.

O le olaga faaletino e pei o se laufanua maina. E lelei tele le fili i le faalavefau i tulaga matautia e foliga e le afaina ma faatosina, e pei o se laufanua matagofie. E faitau afe tausaga o lona poto masani i le faia o lenei mea. O ia o se tagata tomai faapitoa i le faia o auala e foliga tosina lea e taitai atu ai i taunuuga mata’utia ma le lototiga.

Taialaina ma le Saogalemu i le Aiga

E silafia e lo tatou Tama oi le Lagi le auala e tausia ai i tatou ia saogalemu ma ua faailogaina le ala e taitai atu ai i tatou ma le saogalemu i le aiga. Ioe, e tele mea matautia ma faigata o loo avea ma se vaega o lo tatou aafiaga faaletino. Ae e mafai ona tatou aloese mai filifiliga e ono aumaia ai avega ma le lototiga e lē manaomia.

O le mafuaaga lena ua tuuina mai ai e lo tatou Tama ia i tatou poloaiga, o le meaalofa o le Agaga Paia, o perofeta e taialaina i tatou, ma so’otaga mamana o feagaiga ma Ia ma lo tatou Faaola e ala i sauniga ma feagaiga o le malumalu. Ua na o iinei lava i le Ekalesia toefuataiina a Iesu Keriso tatou te maua ai na faailoga mamana ma malupuipuia e mafai ona taialaina saogalemu ai i tatou i le aiga.

O loo i ai faamanuiaga maoa’e i le i ai o perofeta i aso nei. Sa faamatala e Peresitene Hugh B. Brown (1883–1975), o se sa avea ma fesoasoani i le Au Peresitene Sili, se talanoaga sa ia faia ma se tasi o le Maota o Tagata Peretania o le sa avea muamua ma faamasino. Fai mai lenei alii, sa manatu o ia e le’i fetalai mai le Atua i tagata i le lalolagi talu mai le seneturi muamua, ma sa tali atu Peresitene Brown e ala i le faamalamalama atu ia te ia e uiga ia Iosefa Samita ma le Toefuataiga.

“Sa saofai le faamasino ma faalogo ma le toto’a,” na toe manatua ai e Peresitene Brown. “Sa ia fai mai ni fesili sa sili ona patino ma sailiili, ma i le faaiuga o le faatalanoaga na ia fai mai ai, ‘Mr. Brown, ou te mafaufau pe talisapaia e o outou tagata le auina mai o lau savali. Ae a oe? … Afai o le mea na e ta’u mai ia te au e moni, o le savali aupito sili lea ua oo mai i le lalolagi talu ona fofogaina mai e agelu le soifua mai o Keriso.’”

E valaauina e le Atua perofeta auā e alofa o Ia i Ana fanau. E ala mai i Ana auauna, o perofeta, ua Ia faaalia mai ai Lana fuafuaga o le faaolataga, Lana fuafuaga o le fiafia e ta’iala ai Ana fanau. E faaali mai e le Alii i perofeta, tagatava’ai, ma talifaaaliga mea e lē mafai ona vaai i ai isi. O i latou o tagatava’ai i luga o le olo (tagai i le Esekielu 33:1–7) o ē e mafai ona vaai mamao atu ma faaleoina mai se lapataiga ia i latou uma o e o le a faalogo, e masani lava i tausaga e muamua atu. E i ai so latou tulaga maualuga e le o ia i tatou, ona o a latou fesootaiga ma le Atua o ni Ana auauna faatagaina. E tāua tele lo tatou mauaina uma o molimau loloto, patino o a tatou perofeta, tagatavaai, ma talifaaaliga i le taimi nei.

Upu Moni ia Iesu Keriso

Ua sili atu ona faigata ona iloatino mea moni i lo tatou lalolagi i aso nei. E tele nauā leo ua sau mai le tele o itu—Instagram, TikTok, Facebook, X, podcasts, talafou keipo, ma le tele o mea faapena. Ma i le taimi nei faatasi ai ma le atamai faafoliga, po o le AI, i le vaaiga, ua sili atu ona faigata ona iloatino le mea sa’o ma mea e lē sa’o—po o le mea moni foi! O vitio taufaasese loloto e mafai ona foliga mai ai ua fai mai pe faia e se tasi se mea latou te le’i faia. O le a matuā faigata lava ona iloatino le upumoni mai mea sese i tausaga a sau.

I le taimi o lana ulua’i konafesi o se Peresitene o le Ekalesia ia Aperila 2018, na aoao mai ai Peresitene Russell M. Nelson:

“Ua i ai lo’u mautinoa i le lumanai. … Ae ou te nofouta foi i aso o lumanai. Ua tatou ola i se lalolagi ua matua faigata ma faateteleina le fefinauai. O le maua pea o ala faasalalau faaagafesootai ma se taamilosaga 24 itula o talafou ua lofituina ai i tatou i savali e le muta. Afai e ao ona tatou maua se faamoemoe o le suesueina o le tele o manatu ma filosofia a tagata ia e osofaia le upumoni, e tatau ona tatou aoao e maua ia faaaliga.

“O lo tatou Faaola ma le Togiola, o Iesu Keriso, o le a faatinoina nisi o Ana galuega mamana i le va o le taimi nei ma le taimi e toe afio mai ai o Ia. O le a tatou vaai i faailoga faavavega o le pulefaamalumalu ai o le Atua le Tama ma Lona Alo, o Iesu Keriso i luga o lenei Ekalesia i le mamalu ma le viiga. Ae i aso a sau, o le a ono lē mafai ona tatou ola faaleagaga e aunoa ma le taiala, taitaiga, faamafanafanaga, ma le u’una’iga faifai pea a le Agaga Paia. …

“… Ou te aioi atu ia te outou ia faateleina lo outou gafatia faaleagaga e maua ai faaaliga. … Filifili e fai le galuega faaleagaga e manaomiaina e olioli ai i le meaalofa o le Agaga Paia ma faalogo soo atu ma le manino atili i le siufofoga o le Agaga.”

I le Feagaiga Tuai i le tusi a Amosa 3:7 ua tatou faitau ai, “E le faia lava se mea e le Alii le Atua, a e faaalia lona finagalo i ana auauna o perofeta.” A o faasolo ina leotele ma sili atu ona faatalitonugofie leo o le lalolagi, e manaomia e i tatou taitoatasi ona lagona soo le leo filemu o le Agaga ina ia tatou faalogo ma mulimuli ai i le taitaiga a le Alii e ala i perofeta soifua.

E Alofa le Atua i Ana Fanau Uma

I le Feagaiga Fou ma le Tusi a Mamona, tatou te faitau ai e tutusa lava le Atua o ananafi, o le asō, ma le faavavau (tagai i le Eperu 13:8; Mamona 9:9). E alofa le Atua i Ana fanau i o tatou aso e pei lava ona Ia alofa i Ana fanau i aso anamua, ma ona e alofa o Ia i Ana fanau, ua Ia faia nei le mea sa Ia faia i lena foi taimi. Ua Ia faailogaina le laufanua maina o le olaga nei i poloaiga e tausia ai i tatou i luga o le ala saogalemu; o perofeta e faaleoina mai e le leo o le lapataiga a o latou vaai atu i mea matautia o i luma atu; ma feagaiga o le perisitua lea e fesootai atili ai i tatou ma le saogalemu i le Atua.

A o tatou tuu atu lo tatou faatuatua i le Faaola ma faalagolago ia te Ia, o le a Ia taialaina i tatou ma le saogalemu i le aiga e ala i musumusuga a le Agaga Paia; e ala mai i tusitusiga paia anamua ma ona po nei; e ala mai i leo o perofeta, tagatava’ai, ma talifaaaliga i ona po nei; ma e ala i fesootaiga loloto ma Ia ma lo tatou Tama oi le Lagi ua mafai ai ona faia ona o sauniga ma feagaiga o le malumalu.

vaaiga o vae o le Faaola o loo savali i le oneone

E leai lava se isi mea o i ai se tele o le taialaina ma le taitaiga, saogalemu ma le puipuiga, ma le toomaga, faamafanafanaga, ma le faamoemoe ia Keriso nai lo iinei i le talalelei toefuataiina a Iesu Keriso ma i Lana Ekalesia toefuataiina.