Gikan sa YA Matag Semana
Ang Inadlaw nga Paghinulsol Murag Komplikado Paminawon—apan Dili Kini kinahanglang Maingon Niana
Ang inadlaw nga paghinulsol makaluya paminawon hangtod nga sa kataposan nasabtan nako kon unsa kini.
Daghan kong nadungog nga sayop nga mga butang mahitungod sa paghinulsol.
Sulod sa dugayng panahon, dili ko segurado kon naghinulsol ba ko “sa saktong paagi.” Nahibalo ko sa “mga lakang” sa paghinulsol. Apan gibati nako nga kon dili nako masunod ang matag “lakang” sa sakto nga paagi, dili ko mapasaylo sa akong mga sala.
Apan dili usab ko segurado kon unsa ang tukmang paagi sa paghinulsol.
Mosulti ko sa Langitnong Amahan nga nagbasol ko ug mangayo Niya og pasaylo, ug samtang ang pagsulti Niya bahin sa akong mga sala nakatabang nako nga mobati nga dili na kaayo sad-an, daw sama usab kini sa usa ka buluhaton—laing butang nga tsekanan sa espirituwal nga listahan sa angayng buhaton. Wala ko makasabot sa punto.
Ang Inadlaw nga Paghinulsol … Nindot?
Unya, pipila ka tuig na ang milabay, si Presidente Russell M. Nelson miingon, “Walay laing mas makapagawasnon, mas makapahamili, o mas importante sa atong kaugalingong paglambo kay sa usa ka kanunay, matag adlaw nga paghatag og gibug-aton sa paghinulsol.”
Nakapatandong kini kanako.
Akong naamgohan nga gitratar nako kanunay ang paghinulsol nga susama sa pang-emerhensiya nga himan—gamiton lamang kon kinahanglanon kaayo. Apan dinhi ang propeta nagsulti nga kinahanglang buhaton nako kini matag adlaw—ug nga kini kinahanglang bation nga nindot?
Sa tinuod lang, tungod kay naghunahuna ko sa paghinulsol isip usa ka taas, sakit kaayo nga lista sa gisugo nga mga buluhaton, ang paghunahuna sa pagbuhat niini matag adlaw murag makaluya paminawon ug gani mas makahadlok kaysa sa akong naandan nga pagtagna-tagna unsay akong hinulsolan. Wala gihapon ko mahibalo kon asa magsugod ug unsa kaha kana alang nako.
Unsa Man Gayod Ang Paghinulsol?
Wala madugay human niana, misulod ko sa missionary training center ug misugod sa pagtuon sa Isangyaw ang Akong Ebanghelyo. Didto, akong nabasa: “Ang paghinulsol mao ang proseso sa pagdangop ngadto sa Dios ug sa pagpalayo gikan sa sala. Samtang kita maghinulsol, ang atong mga lihok, mga tinguha, ug mga hunahuna mausab aron mahimong mas mahiuyon sa kabubut-on sa Dios.”
Samtang gibasa nako kana nga tudling, ang Espiritu mitabang nako nga maamgohan nga ang paghinulsol dili lamang tsekanan nga listahan o usa ka butang nga buhaton lamang nato human sa dagko nga mga sayop.
Sa labing tumong niini, ang paghinulsol mao ang kausaban.
Ug kana nagpasabot nga dili lamang kini mahitungod sa sala. Nagpasabot kini nga bisan kanus-a nga ako maghimo og tumong nga mas mahisama ni Jesukristo—nga molambo sa espirituwal, pisikal, o intelektuwal sa paagi nga nahisubay sa kabubut-on sa Dios—ako naghinulsol.
Karon siyempre adunay mga panahon diin ang piho nga mga sala nagkinahanglan nga kita makigkita sa mga lider sa pagkapari alang sa tabang ug giya. Apan kon maghunahuna ko sa inadlaw nga paghinulsol sa piho nga paagi, naghunahuna ko niini isip kanunay nga pakigsusi uban sa Dios aron makita kon naghimo ba ko sa unsay gusto Niya nga akong buhaton. Ug sa dihang ang Espiritu nagtabang nako nga makita nga ako makahimo sa pagbuhat og mas maayo, ang paghinulsol nagpasabot nga pagpili sa pag-usab ug pagtinguha sa tabang sa Manluluwas samtang nagpabilin ko sa dalan sa pakigsaad.
Busa Unsaon man ang Paghinulsol Matag Adlaw?
Samtang naningkamot ko sa paghunahuna kon unsay ipasabot sa paghinulsol matag adlaw, ang mga pulong ni Elder David A. Bednar sa Korum sa Napulog Duha ka Apostoles nakatabang. Siya miingon:
“Ang makahuluganon nga pag-ampo sa buntag usa ka importante nga butang diha sa espirituhanon nga pagpangandam sa matag adlaw—ug nag-una sa temporal nga pagpangandam o sa tibuok nga pagtrabaho niana nga adlaw. …
“Sa pagkahuman sa atong adlaw, moluhod na usab kita ug motaho pagbalik ngadto sa atong Amahan. … Kita maghinulsol ug, uban sa panabang sa Espiritu sa Ginoo, moila sa mga paagi nga atong mabuhat ug mahimo nga mas maayo ang ugma.”
Sa laing pagkasulti: Pag-ampo ngadto sa Dios. Pangayo Niya og giya. Padayon sa paglihok. Mo-report og balik. Balika.
Ania ang pipila ka paagi nga akong gibuhat kana nga tambag sa akong kaugalingong kinabuhi:
-
Naghimo ko og sinemana nga mga tumong atol sa panagtigom alang sa sakramento. Namalandong ko sa unsay akong nahimo sa miaging semana ug naminaw sa Espiritu mahitungod sa unsay akong buhaton sa pagpalambo ug pag-usab.
-
Naghimo ko og mga tumong ug mga plano sa pagtuman niadto nga mga tumong ug gisulat kini sa whiteboard diha sa akong kwarto.
-
Samtang nagsubay ko sa akong tibuok semana, sa higayon nga mag-ampo ko, akong hisgotan ang akong mga tumong ngadto sa Langitnong Amahan, mangayo sa Iyang tabang sa pagtuman niini, ug mo-report og balik kon unsay nahitabo, maminaw sa dugang nga giya ug kasegurohan nga anaa ko sa sakto nga dalan.
Pilion Siya Matag Adlaw
Kita dili mahimong sama ni Jesukristo pinaagi sa pagbuntog sa pipila ka dagkong mga sala sa usa ka higayon. Naghunahuna ko nga kini ang ginagmay, inadlaw nga mga desisyon sa pagsalig Kaniya—mas maayo og usa ka porsiyento matag adlaw—nga modala ngadto sa tinuod nga kausaban paglabay sa panahon.
Makapili kita nga mosunod ni Jesukristo matag adlaw. Ug kon masayop kita, kita adunay panalangin sa paghinulsol, sa pagpili nga balik-balik nga mosunod Kaniya, ug padayon sa paglambo niining tanan. Kana ang inadlaw nga paghinulsol alang nako.