Moadto Ako Bisan Asa sa Pagbuot Mo

Si Emma natawo niadtong Hunyo 26, 1883, nga ikapitong anak nila ni Viliamu ug Matafua Purcell. Ang iyang pamilya usa sa daghang Euronesian (may dugong European, may dugong Polynesian) nga mga pamilya nga anaa ug naglibot sa tibuok Malaela. Ang iyang inahan naggikan sa isla sa Savai‘i, sa amihanan lang gayod ug kasadpan sa Upolu. Ang iyang amahan usa ka anak sa Englishman kinsa miadto sa Samoa sa mga tuig 1834, naminyo og usa ka babaye nga taga-Samoa, ug nanimuyo sa Malaela.

Tingali si Emma unang nakakat-on mahitungod sa gipahiuli nga ebanghelyo samtang nagpuyo uban nila ni John ug Nanave Rosenquist, usa ka Santos sa Ulahing mga Adlaw nga magtiayon kinsa mitagad kaniya sama sa sinagop nga anak. Nabunyagan siya sa edad nga 12 niadtong Nobiyembre 3, 1895. Usa ka misyonaryo nga mitambong sa serbisyo mipamatuod sa puno sa gahom nga pagbati sa espiritu atol sa bunyag.

Paglabay sa pipila ka bulan, si John W. Beck, ang presidente sa Samoan Mission, nakadawat og pagtugot gikan sa Unang Kapangulohan nga ipadala si Emma ug ang ubang mga bata nga taga-Samoa ngadto sa Utah aron paeskwelahon. Mibiya siya gikan sa Apia, ang dakong pantalan sa Upolu, uban ni Presidente Beck ug sa ubang mga misyonaryo niadtong Abril 23, 1896. Bisan og ang tinuod niyang mga ginikanan miuyon sa iyang pagbiya, mitulo ang ilang mga luha samtang sila nanamilit.

Milungtad og dul-an tulo ka semana ang pagbiyahe ni Emma sakay sa steamship ug tren padulong sa Siyudad sa Salt Lake. Ang siyudad mas dako kay sa iyang balangay sa Upolu, ug tingali gibati niya nga nabag-ohan sa bisi nga kadalanan ug dili sinati nga mga tingog. Nianang higayona, ang Utah adunay pipila lang ka residente nga taga-Polynesia. Kasagaran sa mga adlaw, wala siyay makita nga susama kaniya og hitsura.

Sa Utah, nagpuyo si Emma sa Salt Lake City Thirteenth Ward, nakadawat og maayo nga edukasyon sa gipanag-iya sa Simbahan nga mga eskwelahan, ug padayong anaay kontak sa mga nauli na nga mga misyonaryo gikan sa Samoan Mission. Sa sinugdanan pa lang, ang iyang bishop nakamatikod na sa iyang potensiyal ug mitambag niya sa pag-andam nga moserbisyo og misyon ngadto sa iyang yutang natawhan.

Gisulod ni Emma sa iyang kasingkasing ang mga pulong sa iyang bishop, ug sa dihang miabot ang iyang tawag sa sayo nga bahin sa tuig 1901, andam na siya.

Miuli si Emma didto sa Upolu niadtong Hulyo 25, 1901, malipayon nga nakita ang iyang amahan nga naghulat kaniya dapit sa pantalan. Sa panahon nga wala siya, nakalimtan na ni Emma ang ubang abilidad sa pagsulti og Samoan. Apan dihang gidapit siya nga mohatag sa panapos nga pag-ampo sa miting, ang Espiritu midasig kaniya, ug nahalad niya kini gamit ang iyang lumad nga pinulongan.

Na-assign si Emma nga moserbisyo sa Malaela, sa iyang lungsod nga gipuy-an, diin ang Simbahan adunay eskwelahan sukad niadtong 1896. Siya ang gisangonan nga motudlo sa estudyante nga mga babaye. Siya usab ang nangulo sa Mutual Improvement Associations sa Batan-ong mga Babaye sa Malaela Branch. Sa matag Dominggo ug sa tibuok semana, magsangyaw ug magtudlo siya kauban sa ubang mga misyonaryo.

Sa sinugdanan, ang pipila sa pamilya ni Emma sa isla supak sa iyang trabaho ug miawhag niya sa pagbiya sa Simbahan. Sumala sa presidente sa misyon nga si William G. Sears, “gipanalipdan niya ang iyang mga aksiyon sa pagserbisyo og misyon” ug determinado sa pagtuman sa iyang mga pakigsaad, bisan pa sa oposisyon.

Makahimo siya sama sa ubang misyonaryo. Kausa, sa pagkomedya, giilisdan sa duha ka elder ang iyang tubig sa butong og regular nga tubig atol sa pagpamahaw. Ang komedya “nakasagmuyo” ni Emma, apan gibaslan niya og komedya ang mga elder pinaagi sa paghatag kanila og lubi nga gibubuan og asin imbis asukar.

Gawas sa pagkomedyahay, ang mga misyonaryo adunay labihan kadakong pagtahod kang “Sister Purcell.” Usa ka misyonaryo nakabantay nga siya “puno sa kadasig sa iyang katungdanan ug sa iyang calling.” Laing elder ang misulat og pagpasalamat mahitungod sa iyang kabuotan. Makausa, si Emma mibilin og pipila ka saging diha sa agianan aron ang elder ug ang iyang kompanyon adunay makaon samtang magbiyahe.

Ang mga rekord nagpakita nga siya mitudlo bahin sa awtoridad sa pagkapari, sa Basahon ni Mormon, ug sa ubang mga hilisgotan sa ebanghelyo. Human makadungog ni Emma nga nagsangyaw sa kinabuhi ug sa misyon ni Joseph Smith, usa ka misyonaryo misulat, “Ganahan kaayo ko sa iyang mga gipangsulti; ug maguol kon siya mohunong sa pagsulti.”

Subo lang, si Emma nataptan og elephantiasis sa ulahing bahin sa iyang misyon ug nakadawat og sayo nga pagka-release. Sa dihang ang mga babaye ug ang mga batang babaye nakahibalo nga siya mobalik ngadto sa Utah, nanghilak sila. Ang Malaela branch mihimo og miting sa pagpanamilit alang niya, mihatag kaniya og usa ka kataposang higayon nga makasangyaw. Siya “namulong nga kusganon,” ang mubong mga sulat sa miting nagpakita, “ug miawhag sa tanan nga magmatinud-anon sa ebanghelyo.”

Si Emma sa iyang kaugalingon nagpabilin nga matinud-anon sa ebanghelyo—ug sa iyang mga pakigsaad—hangtod sa kataposan sa iyang kinabuhi. Sa Utah, gipadayon niya ang iyang edukasyon, miapil sa Polynesian nga komunidad sa estado, ug gikonsulta sa unang Samoan nga himno sa Santos sa Ulahing mga Adlaw. Sa wala mahibaloi nga panahon, nahimamat niya ang usa ka Hawaiian nga Santos nga ginganlan og Henry Kahalemanu. Nagminyo sila sa Salt Lake Temple niadtong Enero 31, 1907.

Paglabay sa tulo ka tuig, namatay si Emma sa edad nga 26 ug gilubong sa Iosepa, usa ka pamuy-anan sa mga Polynesian nga mga Santos 60 ka milya (97 km) sa kasadpan sa Siyudad sa Salt Lake. Bisan og mubo ra ang iyang kinabuhi, ang iyang debosyon ngadto sa gipahiuli nga ebanghelyo ni Jesukristo nagpabilin nga usa ka gamhanan nga ehemplo alang sa mga Santos sa tibuok kalibotan, ilabi na sa mga batan-ong babaye nga motubag sa tawag nga moserbisyo karon.