Luwas diha sa Gipahiuli nga Ebanghelyo ni Jesukristo

Ni Sister J. Anette Dennis

Unang Magtatambag sa Kinatibuk-ang Kapangulohan sa Relief Society

Ang dalan aron makabalik ngadto sa Dios klarong gimarkahan kon kita adunay hugot nga pagtuo ug pagsalig sa atong Manluluwas.

talan-awon sa mga tiil sa usa ka tawo nga naglakaw sa dalan

Tungod sa atong napukan nga mga kinaiyahan ug sa mga sirkumstansiya sa mortalidad, kitang tanan adunay kalagmitan nga maglatagaw gikan sa Dios nga atong nailhan ug gihiguma didto sa atong kinabuhi sa wala pa dinhi sa yuta. Kini ang kinaiyahan sa mortalidad. Ug mao nga, gihatagan ta Niya og mga paagi aron kita luwas nga magpabilin ngadto Kaniya, aron maselyo ang atong mga kasingkasing ngadto Kaniya, ug aron sa pagtabang nato nga magpuyo nga luwas kutob sa mahimo agi niining espirituwal nga mga kakuyaw sa mortalidad.

Atol sa dakong gubat sa kalibotan, ang armado nga kasundalohan molubong og mga bomba, o mga eksplosibo, sa ilawom sa yuta. Dihay lapad nga mga luna sa gitago nga mga bomba, ug ang kasundalohan mahimong magmartsa nga wala makahibalo niadtong mga luna sa mga bomba ug mabuthan.

Human sa gubat, liboan sa wala mobuto nga mga bomba ang nagpabilin, ug daghang tawo, lakip sa mga bata, nawad-an sa ilang mga kinabuhi o mga parte sa lawas sa dihang sa wala tuyoa miadto ngadto sa luna nga gilubngan og mga bomba. Ang mga organisasyon nga naningkamot sa pagpangita ug pagmarka sa mga bomba niadtong mga luna nga gipanglubngan og bomba nakaluwas og daghang kinabuhi.

Ang mortalidad sama sa luna nga gipanglubngan og bomba. Ang kaaway maayo kaayo sa pagtakoban nga ang mga kakuyaw dili makadaot ug nag-imbitar, sama sa usa ka maanindot nga luna. Siya adunay liboan ka tuig sa kasinatian sa paghimo niini. Siya usa ka eksperto sa paghimo sa mga dalan nga madanihon nga paingon sa makuyaw nga mga sangpotanan ug kaguol.

Gigiyahan aron Luwas nga Makapauli

Ang atong Amahan sa Langit nakahibalo unsaon nga kita magpabilin nga luwas ug mibutang og timaan sa dalan aron mogiya nato nga luwas nga makapauli. Siyempre, adunay daghan sa mga kakuyaw ug mga kalisod nga kabahin sa atong mortal nga kasinatian. Apan makalikay kita sa mga pagpili nga tingali makahatag sa wala kinahanglana nga mga salagubangon ug kasakit.

Mao kana kon ngano nga ang atong Amahan mihatag nato sa mga sugo, sa gasa sa Espiritu Santo, sa mga propeta aron sa paggiya nato, ug sa gamhanan nga pakigsaad nga konektado ngadto Kaniya ug sa atong Manluluwas pinaagi sa mga ordinansa ug mga pakigsaad sa templo. Dinhi lamang sa gipahiuli nga Simbahan ni Jesukristo nga makaplagan nato kadtong gamhanan nga mga timaan ug mga kaseguroan nga luwas nga makagiya nato pauli.

Adunay daghang panalangin sa pagbaton og mga propeta sa modernong panahon. Si Presidente Hugh B. Brown (1883–1975), usa ka kanhi magtatambag sa Unang Kapangulohan, mihisgot sa usa sa iyang panaghisgot kauban sa usa ka sakop sa British House of Commons kinsa kaniadto usa ka huwes. Kini nga tawo miingon nga nagtuo siya nga ang Dios wala makigsulti ngadto sa mga tawo dinhi sa yuta sukad sa unang siglo, ug si Presidente Brown mitubag pinaagi sa pagpasabot kaniya mahitungod ni Joseph Smith ug sa Pagpahiuli.

“Ang huwes milingkod ug naminaw pag-ayo,” paghandom ni Presidente Brown. “Nangutana siya og pipila ka direkta ug masiksikon nga mga pangutana, ug sa kataposan sa interbiyo miingon siya, ‘Mr. Brown, naghunahuna ko kon ang inyong katawhan nakapasalamat ba sa kaimportante sa inyong mensahe. Ikaw nakapasalamat ba? … Kon tinuod ang imong gisulti nako, mao kini ang labing importante nga mensahe nga miabot sa yuta sukad ang mga anghel mipahibalo sa pagkatawo ni Kristo.’”

Ang Dios nagtawag og mga propeta tungod kay gihigugma niya ang Iyang mga anak. Pinaagi sa Iyang mga sulugoon, ang mga propeta, gipadayag Niya ang Iyang plano sa kaluwasan, ang Iyang plano sa kalipay aron sa paggiya sa Iyang mga anak. Gipakita sa Ginoo ngadto sa mga propeta, mga manalagna, ug mga tigpadayag ang mga butang nga dili makita sa uban. Sila ang magbalantay sa tore (ta-awa sa Ezequiel 33:1–7) kinsa makakita sa layo ug mopatingog og usa ka pasidaan ngadto sa tanan nga maminaw, kasagaran mga katuigan sa dili pa mahitabo ang usa ka butang. Sila adunay bentaha nga wala nato tungod sa ilang komunikasyon sa Dios isip Iyang gitugotan nga mga sulugoon. Importante gayod nga kitang tanan makaangkon og lig-on, personal nga mga pagpamatuod sa atong kasamtangan nga mga propeta, mga manalagna, ug mga tigpadayag.

Kamatuoran diha ni Jesukristo

Mas nagkalisod ang pag-ila unsa ang kamatuoran sa atong kalibotan karon. Adunay daghan kaayong mga tingog nga nagagikan sa daghan kaayong direksiyon—Instagram, TikTok, Facebook, X, podcasts, cable news, ug uban pa. Ug karon gamit ang artificial intelligence, o AI, nga anaa na karon, mas lisod gani sa pag-ila unsa ang tinuod ug unsa ang dili—o bisan gani unsa ang tiunay! Malimbongon kaayo nga mini nga mga bidyo mahimong magpakita nga ang usa ka tawo misulti o mihimo og butang nga wala nila buhata. Mahimong lisod gayod kaayo ang pag-ila sa kamatuoran gikan sa bakak sa katuigan nga moabot.

Atol sa iyang unang komperensiya isip Presidente sa Simbahan niadtong Abril 2018, si Presidente Russell M. Nelson mitudlo:

“Malaumon ako mahitungod sa kaugmaon. … Apan nahibalo usab ako sa umaabot nga mga adlaw. Nagpuyo kita sa kalibotan nga komplikado ug nagkadaghan ang kasungian. Ang padayon nga paggamit sa sosyal medya ug ang 24 oras nga mga balita nga mohan-ok kanato og walay hunong nga mga mensahe. Kon gusto kitang makaangkon og paglaom nga makaayag sa daghang mga opinyon ug sa mga pilosopiya sa katawhan nga nag-atake sa kamatuoran, kinahanglan makakat-on kita sa pagdawat og pagpadayag.

“Ang atong Manluluwas ug Manunubos, si Jesukristo, mohimo sa uban Niyang labing gamhanan nga mga buhat tali sa karon ug sa higayon nga Siya mobalik na pag-usab. Makakita kita og milagrosong timailhan nga ang Dios Amahan ug ang Iyang Anak, si Jesukristo, maoy magdumala niini nga Simbahan sa kahalangdon ug himaya. Apan sa umaabot nga mga adlaw, dili na posible ang espirituhanong pagsugakod kon wala ang giya, direksyon, ug makahupay nga impluwensya sa Espiritu Santo. …

“… Mohangyo ko kaninyo sa pagpagpalambo sa inyong espirituhanong kapasidad sa pagdawat og pagpadayag. … Pilia ang paghimo sa espirituwal nga buhat nga maoy gikinahanglan aron sa pagtagamtam sa gasa sa Espiritu Santo ug mas kanunay ug mas klaro nga pagpaminaw sa tingog sa Espiritu.”

Sa basahon sa Daang Tugon sa Amos 3:7 mabasa nato, “Sa pagkatinuod, ang tanang himoon sa Ginoong Dios ipahibalo gayod niya sa iyang mga alagad nga mga propeta.” Samtang ang mga tingog sa kalibotan magkakusog ug mahimong mas madanihon, ang matag usa nato kinahanglan nga makamaong maminaw sa mas kanunay ug sa mas klaro sa hilom nga tingog sa Espiritu aron nga kita mopatalinghog ug mosunod sa direksiyon sa Ginoo pinaagi sa buhi nga mga propeta.

Ang Dios Nahigugma sa Tanan Niyang mga Anak

Sa Bag-ong Tugon ug sa Basahon ni Mormon, mabasa nato nga ang Dios mao gihapon kagahapon, karon ug sa walay kataposan (tan-awa sa Mga Hebreo 13:8; Mormon 9:9). Nahigugma ang Dios sa Iyang mga anak sa atong panahon sama sa Iyang paghigugma sa Iyang mga anak sa karaang panahon, ug tungod kay gihigugma Niya ang Iyang mga anak, gibuhat Niya karon unsay Iyang gibuhat kaniadto. Gibutangan niya og mga timaan ang lugar nga delikado sa mortalidad pinaagi sa mga sugo aron kita anaa sa luwas nga dalan; mga propeta nga mopatingog sa tingog sa pasidaan kon makita nila ang mga kakuyaw sa unahan; ug mga pakigsaad sa pagkapari nga mokonektar nato nga mas segurado ngadto sa Dios.

Samtang atong ibutang ang atong hugot nga pagtuo diha sa Manluluwas ug mosalig Kaniya, Siya mogiya nato nga luwas nga makapauli pinaagi sa mga paghunghong sa Espiritu Santo; pinaagi sa karaan ug moderno nga kasulatan; pinaagi sa mga tingog sa moderno nga mga propeta, mga manalagna,ug mga tigpadayag; ug pinaagi sa lawom nga mga koneksiyon nato ngadto Kaniya ug sa atong Amahan sa Langit nga nahimong posible pinaagi sa mga ordinansa ug mga pakigsaad sa templo.

talan-awon sa mga tiil sa Manluluwas nga naglakaw diha sa balas

Walay laing dapit nga makita ang mao nga kabuhong sa giya ug direksyon, kaseguroan ug proteksiyon, ug kahupayan, suporta, ug paglaom diha ni Kristo kaysa dinhi sa gipahiuli nga ebanghelyo ni Jesukristo ug sa Iyang gipahiuli nga Simbahan.