Usa ka Pag-ampo diha sa Akong Kasingkasing

Paghulagway pinaagi ni Allen Garns

Sa dihang mitambong ako sa eskwelahan sa elementarya, ang akong inahan kanunay nga maghatag nako og paniudto, mohalok sa akong agtang, ug moingon, “Himoa ang imong labing maayo karon, ug hinumdomi ang pagbaton og pag-ampo diha sa imong kasingkasing.” Parehas nga butang ang iyang isulti matag buntag, hangtod na sa akong paghayskul.

Gani, ang “pagbaton og pag-ampo diha sa imong kasingkasing” mao ang kataposang butang nga iyang gisulti nako sa dihang mosakay na ko sa eroplano aron mobiya padulong sa akong duha ka tuig nga misyon sa Florida. Naanad na kaayo ko niana nga panultihon nga wala na kaayo nako kini gihunahuna samtang ako nagtubo. Gihunahuna nako nga kini usa lang ka butang nga kanunayng isulti sa ilang henerasyon, sama sa “Pagbaton og maayong adlaw.”

Isip usa ka full-time nga misyonaryo, nakat-on ko sa pag-istorya og Kinatsila samtang nagserbisyo sa Miami, Florida, USA. Akong nadiskobrehan nga ang among bag-ong mga higala, daghan nga gikan sa Cuba ug Puerto Rico, sama ra pud sa akong mama. Matag pamilya nga among gibisitahan mopabiya namo nga adunay sama nga mapinanggaon nga panghinaot: “Vaya con Dios” (Lakaw uban sa Dios).

Sa dihang nasabtan na nako og sugod kon unsay buot ipasabot sa akong inahan, nagsugod na ako og pangita og mga paagi nga tinud-anay nga magbaton og pag-ampo diha sa akong kasingkasing. Samtang gibuhat nako kini, ang akong pasalamat alang sa Langitnong Amahan ug sa Iyang Anak, si Jesukristo, milambo. Mas napalawman pa nako ang akong paglahutay sa mga higayon sa pagsulay ug kalisdanan. Mibati ko og mas dako nga gugma alang sa akong mga ginikanan ug pagdayeg alang sa mga sakripisyo nga ilang gihimo alang nako.

Usa ka adlaw nakabasa ko mahitungod sa pagbisita sa Manluluwas sa mga Nephita human sa Iyang Pagkabanhaw. Sa ikaduhang adlaw sa Iyang pagbisita, “siya misugo sa iyang mga disipulo nga sila kinahanglan nga mag-ampo.” Samtang sila nag-ampo, ang Manluluwas nag-ampo usab, naglitok og “mahinungdanon ug kahibulongan” nga mga pulong. Sa dihang Siya nahuman, gisugo Niya ang pundok sa katawhan “nga dili sila mohunong sa pag-ampo pinaagi sa ilang mga kasingkasing” (3 Nephi 19:17, 34; 20:1).

Usa ka paagi nga mahimo kini mao ang paghunahuna sa pag-ampo isip usa ka kwadro sa litrato nga naglibot sa atong inadlaw nga mga kalihokan. Kana nga kwadro sa pag-ampo, inubanan sa gugma ug pasalamat, makatabang nato nga motutok sa Manluluwas ug motuman sa atong mga pakigsaad.

Nagpasalamat ko sa inadlaw nga tambag sa akong inahan nga “dili mohunong sa pag-ampo” diha sa akong kasingkasing. Nakahimo kana og dako kaayong kalainan sa akong kinabuhi.