Mga Tig-ambit sa Diosnong Kinaiya

Sa konseho sa premortal nga kinabuhi, gipresentar sa Langitnong Amahan ngadto sa Iyang espiritu nga mga anak ang Iyang plano alang sa ilang mahangtoron nga pag-uswag ug kalipay.

“Magbuhat kita og usa ka yuta diin kini sila mahimo nga makapuyo;

“Ug ato silang sulayan pinaagi niini, aron masuta kon mobuhat ba sila sa tanang butang, bisan unsa nga isugo sa Ginoo nga ilang Dios ngadto kanila;

Ug sila nga nagmatinud-anon sa ilang unang naangkon nga kahimtang pagadugangan; ug sila nga dili magmatinud-anon sa ilang unang naangkon nga kahimtang dili makaangkon og himaya sa sama nga gingharian uban niadtong nagmatinud-anon sa ilang unang naangkon nga kahimtang; ug sila nga nagmatinud-anon sa ilang ikaduhang naangkon nga kahimtang makabaton og himaya nga idugang sa ilang mga ulo hangtod sa hangtod.

“Ug ang Ginoo miingon: Kinsa ang akong ipadala? Ug ang usa mitubag sama sa Anak sa Tawo: Ania Ako, ipadala ako. Ug adunay lain nga mitubag ug miingon: Ania ako, ipadala ako. Ug ang Ginoo miingon: Akong ipadala ang nag-una.

“Ug ang ikaduha nasuko, ug wala magmatinud-anon sa iyang unang naangkon nga kahimtang; ug, nianang adlawa, daghan ang misunod kaniya” (Abraham 3:24–28).

Timan-i nga usa lang ka plano ang gipresentar sa premortal nga konseho—ang plano sa Amahan. Ang atong Langitnong Amahan wala mohatag sa pangutana nga, “Unsay atong buhaton?” Wala Siya mangita og pamahayag, mangayo og mga rekomendasyon, o naghangyo og mga tanyag. Kondili, Siya mipresentar sa sukaranan nga mga elemento sa Iyang plano ug nangutana, “Kinsa ang akong ipadala?” Ang sentro sa Iyang pangutana nakatutok diha sa kon kinsa ang ipadala aron mobuhat sa mga termino ug mga kondisyon sa Iyang plano.

Ang mga sangpotanan sa pagrebelde sa kaaway gihulagway usab diha sa mga kasulatan.

“Mao nga, tungod kay si Satanas misukol nako, ug nagtinguha sa pagguba sa kabubut-on sa tawo, diin ako … mihatag kaniya, ug usab, nga ako kinahanglang mohatag kaniya sa akong kaugalingong gahom … , misugo ako nga siya isalikway;

“Ug siya nahimong Satanas, … gani ang yawa, ang amahan sa tanang bakak, sa pag-ilad ug sa pagbuta sa mga tawo, ug sa pagdala nila nga maulipon sumala sa iyang kabubut-on, gani kutob sa dili maminaw sa akong tingog” (Moises 4:3–4).

Si Lucifer wala magpresentar og plano nga gibotaran sa kadaghanan nga mitambong sa premortal nga konseho. Dili siya usa ka tawo nga nangayo og kaluoy ug pagsabot nga napilde sa eleksiyon. Siya mirebelde! Ang garbo, pagkamapahitas-on, ug pagkahakog ang midasig sa iyang rebelyon batok sa plano sa Amahan.

Ang plano naghulagway sa mga buhat sa Amahan ug sa Anak nga mahimong makab-ot sa tanang tawo ang mga panalangin sa kinabuhing walay kataposan.

Ang ebanghelyo ni Jesukristo naglangkob sa paagi diin kita makadawat sa mga panalangin nga gisaad diha sa plano sa Dios, gani ang doktrina, mga baroganan, mga ordinansa, ug mga pakigsaad nga kinahanglang tuohan ug sundon sa mga lalaki ug mga babaye. “Walay laing ngalan nga gihatag ubos sa langit gawas niini nga Jesukristo … diin ang tawo maluwas” (2 Nephi 25:20). Sa tinud-anay, si Jesukristo mao “ang dalan, ang kamatuoran, ug ang kinabuhi: walay bisan kinsa nga makaadto sa Amahan, gawas kon pinaagi [Kaniya]” (Juan 14:6).

Si Presidente Russell M. Nelson mipasabot:

“Ang plano nagkinahanglan sa Paglalang, ug sa ingon gikinahanglan ang Pagkapukan ug ang Pag-ula. Kini mao ang tulo ka sukaranang bahin sa plano. Ang paglalang sa usa ka paraisohanon nga planeta naggikan sa Dios. Ang pagkamortal ug ang kamatayon miabot sa kalibotan pinaagi sa Pagkapukan ni Adan [tan-awa sa 2 Nephi 2:25; Moises 6:48]. Ang pagka-imortal ug ang posibilidad sa kinabuhing dayon nahatag pinaagi sa Pag-ula ni Jesukristo [tan-awa sa 2 Nephi 2:21–28]. …

“… Mianhi kita sa yuta alang sa mubo lamang nga panahon, molahutay sa atong mga pagtesting ug pagsulay; ug maandam aron makapadayon padulong sa unahan ug pataas alang sa mahimayaon nga pagpauli [tan-awa sa Salmo 116:15; Alma 42:8]. Ang atong mga hunahuna ug mga binuhatan samtang [naa sa mortalidad] segurado nga mahimong mas adunay katuyoan kon kita makasabot sa plano sa Dios ug mapasalamaton ug masulundon sa Iyang mga sugo” [tan-awa sa Doktrina ug mga Pakigsaad 59:20–21].”

Kita makat-on og mahinungdanong mga kamatuoran pinaagi sa pagpangita ug pagtuon sa daghang nagkalain-laing titulo alang sa plano sa Amahan diha sa Basahon ni Mormon: Lain nga Tugon ni Jesukristo. Pananglitan, ikonsiderar ang mosunod nga sampol sa mga titulo:

“Puno sa kaluoy nga plano sa bantogan nga Tiglalang” (2 Nephi 9:6).

“Ang plano sa atong Dios” (2 Nephi 9:13).

“Ang plano sa kaluwasan” (Jarom 1:2; Alma 24:14).

“Ang plano sa katubsanan” (Alma 12:25, 26, 30, 32, 33; 42:11, 13).

“Ang plano sa pagpahiuli” (Alma 41:2).

“Ang plano sa kalipay” (Alma 42:16).

“Ang mahinungdanong plano sa kaluoy” (Alma 42:31).

Ang matag usa niini nga mga titulo makatabang nato nga mas klaro nga makasabot sa bililhong mga saad sa plano sa Amahan ug mopalambo sa atong panglantaw mahitungod sa mga katuyoan ug kahulogan sa atong mortal nga mga kinabuhi.

Sa mahinungdanong paagi, ang labing kanunay nga gigamit nga titulo sa plano sa Dios diha sa Basahon ni Mormon nakatutok diha sa katubsanan nga nahimong posible pinaagi sa Pag-ula ni Jesukristo.

Si Alma mipahayag, “Kon dili pa tungod sa plano sa katubsanan, nga gipahiluna gikan sa katukoran sa kalibotan, wala unta ang pagkabanhaw sa mga patay; apan dihay plano sa katubsanan nga gipahiluna, nga mopahinabo sa pagkabanhaw sa mga patay” (Alma 12:25).

Siya usab nag-awhag, “Sugdi ang pagtuo sa Anak sa Dios, nga siya moanhi sa pagtubos sa iyang katawhan, ug nga siya mag-antos ug mamatay aron sa pag-ula sa ilang mga sala; ug nga siya mobangon pag-usab gikan sa mga patay, nga mao ang magpahitabo sa pagkabanhaw, nga ang tanan nga tawo mobarog sa iyang atubangan, aron hukman sa kataposan ug sa adlaw sa paghukom, sumala sa ilang mga buhat” (Alma 33:22).

Ang atong mga kalag kinahanglan nga molambo sa pagpasalamat samtang atong ikonsiderar ang mahinungdanon nga plano sa Dios sa kaluwasan, katubsanan, pagpahiuli, kaluoy, ug kalipay. Ang kahibalo sa Iyang plano maghatag og bililhong panglantaw, mopalambo sa atong mga kalipay, ug mopalig-on nato aron mabuntog ang atong mga hagit ug mga kalisdanan.

Ang Langitnong Amahan nangandoy nga kita makabalik ngadto Niya. Siya nagdapit ug nagsaad og mga panalangin, apan Siya dili mamugos, moduot, o mopugong sa atong paggamit sa moral nga kabubut-on nga gihatag Niya kanato. Kita kinahanglang molihok ug mopili nga mobalik ngadto Kaniya pinaagi sa pagsunod sa ehemplo sa Iyang Pinalanggang Anak.

His Hand Is Stretched Out Still [Ang Iyang Kamot sa Gihapon Nagtuyhad Pa], ni Elizabeth Thayer

“Ang agianan giandam na, ug kon kita motan-aw mabuhi kita sa kahangtoran” (Alma 37:46).

Ako malipayong mosaksi nga ang Langitnong Amahan mao ang tinubdan sa balaanong plano alang sa Iyang mga anak. Si Jesukristo mao ang atong Manunubos ug Manluluwas. Ug isip usa sa Apostoles sa Ginoo sa ulahi nga mga adlaw, ako mosaksi nga Siya gayod mao “ang agianan, ang kamatuoran, ug ang kinabuhi” (Juan 14:6).