Pagkamatinud-anon ug mga Propeta—Kaniadto ug Karon

Natural lang, si Satanas kanunay nga nagtinguha nga maminosan ang pagsalig ngadto sa mga propeta ug sa apostoles. Labaw sa tanan, sa tibuok kasaysayan sila mao ang nag-unang mga saksi sa ngalan ni Jesukristo ngadto sa tibuok kalibotan (tan-awa sa Doktrina ug mga Pakigsaad 107:23).

Sa atong panahon, ang kaaway nagtinguha sa pagpugong sa unsay gitawag ni Presidente Russell M. Nelson og “labing mahinungdanong butang nga nahitabo sa kalibotan karon,” ang pagpundok sa Israel, nga kinahanglang mag-una sa Ikaduhang Pag-anhi ni Jesukristo. Ang mga propeta ug apostoles naghupot sa mga yawe niini nga panagpundok. Mao nga, sila kanunay nag-atubang og pagbatok.

Sa unang panahon man o sa ulahing mga adlaw, si Satanas nakakita gihapon og mga paagi aron malingla ang uban nga kaugalingong mga anak sa Dios sa pakigsaad aron makig-away batok sa Apostoles sa Kordero, kaniadto ug karon (tan-awa sa 1 Nephi 11:34–36).

Ania ang lima ka baroganan nga makatabang nato aron malikayan kini nga lit-ag.

Hugot nga Pagtuo diha ni Ginoong Jesukristo

Ang una niini nga mga baroganan mao usab ang una nga baroganan sa ebanghelyo: hugot nga pagtuo diha ni Ginoong Jesukristo ug sa Iyang Pag-ula.

Ang hugot nga pagtuo adunay direksiyon. Si Presidente Jeffrey R. Holland, Akting nga Presidente sa Korum sa Napulog Duha ka Apostoles, mitudlo nga ang hugot nga pagtuo kanunay nga nagpunting paingon sa umaabot.

Samtang ang atong hugot nga pagtuo ni Kristo ug pagsalig sa Dios molambo, kita “molantaw uban ang mata sa pagtuo, ug mosud-ong” sa Ilang mga saad nga natuman (tan-awa sa Alma 5:15; tan-awa usab sa Mosiah 18:21; Alma 32:40). Sa “Be One” nga kasaulogan nga naghinumdom sa ika-40 nga anibersaryo sa 1978 nga pagpadayag kabahin sa pagkapari, si Presidente Dallin H. Oaks, Unang Magtatambag sa Unang Kapangulohan, midapit sa tanan nga “molantaw sa unahan diha sa panaghiusa sa atong pagtuo ug pagsalig sa saad sa Ginoo [tan-awa sa 2 Nephi 26:33].”

Kining pagtutok sa unahan mopalihok nato padulong sa katumanan sa saad ni Presidente Nelson atol niining sama nga kalihokan sa “hingpit nga kalipay ug panaghiusa” ug sa adlaw nga, sama sa gitudlo ni Presidente Henry B. Eyring, Ikaduhang Magtatambag sa Unang Kapangulohan, “ang Ginoo nga si Jehova, mobalik aron mopuyo uban niadtong nahimong Iyang katawhan ug makaplagan sila nga nagkahiusa, nga usa sa kasingkasing, nahiusa uban Kaniya ug uban sa atong Langitnong Amahan.”

Sa laing bahin, si Satanas nagtinguha sa pagpatig-a sa mga anak sa Dios nga maungot sa pagtutok pabalik, kanunayng maghunahuna sa nangagi nga mga sitwasyon, mga pamahayag, o mga pagtulun-an—bisan gani ang gipasabot na sa nagsunod nga mga propeta ug apostoles. Isip “ang tigsumbong sa atong kaigsoonan … adlaw ug gabii” (Gipadayag 12:10), siya misulsol og walay pag-undang nga pagpanaway sa mga propeta ug apostoles sa Dios ug sa ilang mga pagtulun-an. Kini malipotong mipahuyang sa pagtuo nga ilang gisaksihan, si Jesukristo—ang iyang labing yawan-on nga tumong.

Ang mga pamahayag sa panaghiusa, kalinaw, ug panagdait gikan sa modernong Apostoles klaro nga samtang si Satanas malipoton sa pagmugna og panaglalis ug kawalay panaghiusa, kini mao ang panahon alang sa tanan nga anak sa pakigsaad sa Dios (tan-awa sa 1 Nephi 11:34–36) nga magkahiusa sa paghangop ug pagbuhat sa mahangtorong mga kamatuoran nga gipadayag sa Dios pinaagi sa Iyang mga propeta ug apostoles. Pinaagi sa pagbuhat niini, kita mahimong magkahiusa, malipayon, gamhanan, may pakigsaad, puno sa pagtuo nga katawhan nga walay dili maayong pagsinabtanay kabahin sa kagikan, kasarian, kultura o uban pang pagkadili pagsinabtanay.

Ang mga pagtulun-an sa mga propeta ug apostoles nagdasig niini nga panaghiusa ug lig-on nga pagtuo diha ni Jesukristo, nga kanunay nga mopalihok kanato padulong sa unahan.

Nakakita sa atong panahon, si Moroni mitudlo unsaon nga kita mapanalipdan gikan sa pagkahimong tigpanaway sa mga propeta ug apostoles: ang baroganan sa dili pagpanghimaraot o paghukom.

“Ayaw ako ipanghimaraot tungod sa akong pagkadili hingpit,” miingon si Moroni “ni ang akong amahan, tungod sa iyang pagkadili hingpit, ni sila nga misulat una pa kaniya; apan hinuon pasalamati ang Dios nga siya mipakita nganha kaninyo sa among pagkadili hingpit,nga kamo unta makakat-on nga magmaalamon labaw pa kay kanamo” (Mormon 9:31).

Sa laing pagkasulti, kita nagtutok ug nagkat-on gikan sa mga pagtulun-an ug pagsaksi sa mga propeta ug apostoles kang Kristo ug sa Iyang ebanghelyo ug maglikay nga motan-aw sa ilang pagkadili hingpit. Sa tibuok kasaysayan, ang Dios mipadayag sa uban niini nga mga pagkadili hingpit alang sa atong kaayohan ug aron matabangan kita nga magkat-on nga mahimong mas maalamon. Nagpasalamat ko Niya sa pagbuhat niini.

Bisan pa man, kinahanglan kita nga mag-amping. Niadtong Abril 2019 nga kinatibuk-ang komperensiya, si Presidente Eyring mikutlo niini nga pagtulun-an ni Presidente George Q. Cannon (1827–1901), Unang Magtatambag sa Unang Kapangulohan: “Ang Dios mipili sa Iyang mga sulugoon. Giangkon Niya kini isip Iyang katungod sa panghimaraot kanila kon sila kinahanglang panghimaraoton. Wala Siya mihatag niini ngari kanato sa matag usa aron sawayon ug panghimaraoton sila. Walay tawo, bisan unsa pa tingali siya kalig-on sa pagtuo, bisan unsa pa ka labaw diha sa Pagkapari, ang makasulti og daotan sa dinihogan sa Ginoo ug mangita og sayop sa awtoridad sa Dios dinhi sa yuta nga dili modapit sa Iyang kasuko. Ang Balaang Espiritu mopalayo sa ingon niana nga tawo, ug siya moadto sa kangitngit. Agig resulta niini, wala ba ninyo makita kon nganong importante nga kita kinahanglan mag-amping?”

Kamo ug ako adunay panalangin ug sugo gikan sa Ginoo kabahin sa propetikanhong mga pagtulun-an ug mga buhat, lakip na ang bisan unsa nga atong mabantayan nga lisod nga masabtan o madawat:

“Ikaw maminaw sa iyang tanan nga pulong ug sugo nga iyang gihatag kanimo sama sa iyang pagdawat niini, maglakaw sa tanan nga pagkabalaan sa akong atubangan;

“Kay ang iyang pulong imong madawat, sama og gikan sa akong kaugalingon nga ba-ba, sa tumang pagpailob ug pagtuo” (Doktrina ug mga Pakigsaad 21:4–5).

Usbon ko, kita dili manghimaraot o mohukom (tan-awa sa Mateo 7:1–2). Samtang ako nagpadayon sa unahan uban ang pagtuo diha ni Jesukristo ug pasalamat alang sa panalangin sa mga propeta ug apostoles, ako napanalanginan og maayo (tan-awa sa Doktrina ug mga Pakigsaad 21:6).

Lain nga mahinungdanong baroganan mao ang paglikay nga molapas sa atong awtoridad o mobuhat og mga tahas nga dili atoa. Kini nga mga panghunahuna molingla nato ngadto sa paghatag og taas kaayo nga bili sa atong kaugalingon nga mga opinyon, nga natural lang nga mahitabo kon kita dili mohatag og importansiya sa mga pagtulun-an sa mga propeta ug apostoles. Ang pagpanghimaraot sa mga propeta ug apostoles, lakip na sa niadtong nangagi, dayag lang nga milapas sa atong awtoridad, kay ang Ginoo migahin niini nga abilidad ngadto sa Iyang Kaugalingon. Ako masaligon kaayo nga ang atong maalamon sa tanan, mapinanggaon, ug maluluy-on nga Manluluwas misulbad o mosulbad ug mahinamon nga mopasaylo sa bisan unsang sayop o pagkadili hingpit sa nangagi, sama sa atong gilaoman nga Iyang buhaton alang nato karon.

Laing sanglitanan sa paglapas sa atong awtoridad mao ang pagdahom nga tudloan ang atong mga propeta ug apostoles sa unsay angay buhaton sa Simbahan o kon unsaon kini pagdumala. Kana tahas sa Ginoo, dili atoa (tan-awa sa Doktrina ug mga Pakigsaad 28:2–7). Bisan unsa pa kamaayo ang atong katuyoan, ang pagpanghimaraot ug pagdahom sa pagtudlo sa mga propeta ug apostoles parehas nga naggikan sa garbo ug mopaingon sa pagkalingla ug pagkapakyas sa pagsunod sa propetikanhong awtoridad.

Gikan sa 1820 hangtod karon, ang Ginoo padayon nga nagtudlo sa Iyang mga propeta, manalagna, ug tigpadayag sa mapadayagong proseso diin Iyang gigiyahan ang Iyang Simbahan.

Si Presidente Nelson mitudlo:

“Sa [higayon nga magtigom] kami isip Konseho sa Unang Kapangulohan ug Korum sa Napulog Duha, ang among mga lawak mitinganan [mahimong] mga lawak sa pagpadayag. Ang Espiritu tataw kaayo nga anaa. … Bisan pa man kon managlahi kami sa among unang mga panglantaw, ang gugma nga among gibati sa usag usa anaa kanunay. Ang among panaghiusa nakatabang kanamo sa pag-ila sa kabubut-on sa Ginoo alang sa Iyang Simbahan.

“Sa among mga miting, ang kadaghanan [mayoriya] dili gayod maoy matuman! Mainampoon kaming [maminaw] sa usag usa ug [makigsulti] sa usag usa hangtod [magkahiusa] kami.”

Si Elder D. Todd Christofferson sa Korum sa Napulog Duha ka Apostoles miobserbar: “Ang tuyo dili lang ang panag-uyon tali sa council apan ang pagpadayag gikan sa Dios. Proseso kini nga naglakip sa katarongan ug hugot nga pagtuo aron maangkon ang hunahuna ug kabubut-on sa Ginoo.”

Kining gipahiuli, mainampingong gitukma nga baroganan sa kahilwasan mopadugang sa kompiyansa diha sa abilidad sa atong kasamtangan nga mga lider nga kanunayng magdumala sa Simbahan sumala sa kabubut-on sa Ginoo.

Siyempre, si Jesukristo ang nagbarog sa ulohan sa Iyahang Simbahan, ug Siya naggiya sa Iyang mga propeta. Unsa tingali atong gihunahuna nga pagkadili hingpit sa ilang mga pulong o linihokan tingali, sa pagkatinuod, nagpakita sa pagkadili hingpit sa atong panghunahuna o mortal nga panabot. Ang paghinumdom nga ang mga laraw sa Ginoo habog kay sa atong mga laraw ug nga ang Iyang hunahuna habog kay sa atong hunahuna (tan-awa sa Isaias 55:8–9) nagtugot nato nga malikayan ang mohukom sa mga propeta, lakip na niadtong nangagi na. Kining mapaubsanon nga kinaiya nakapahimo nato nga maminaw sa mga pulong sa buhi nga mga propeta “sa tumang pagpailob ug pagtuo” (Doktrina ug mga Pakigsaad 21:5; tan-awa usab sa 1:28).

Kini usab nagtabang nato nga makadawat og nagkadugang nga pagpadayag, paglaom, ug pagtuo diha ni Kristo diha sa nagkaanam ka lisod nga kalibotan. Si Jacob mitudlo, “Nangita kami sa mga propeta, ug aduna kami daghang pagpadayag ug espiritu sa pagpanagna, ug tungod kay aduna kami sa tanan niini nga mga pagpamatuod naangkon namo ang usa ka paglaom, ug ang among pagtuo dili na matarog” (Jacob 4:6). Kon kita mapaubsanon, kining sagradong mga kasinatian mahimong motangtang gikan kanato sa bisan unsang tinguha nga mangita og sayop ngadto sa mga propeta ug apostoles, lakip na niadtong nangagi na (tan-awa sa Doktrina ug mga Pakigsaad 88:124; 136:23). Ang pagkamapaubsanon motabang nato sa “pagpangita sa mga propeta” alang sa mga kamatuoran nga mopalambo sa atong kalipay ug kalinaw ug dili mangita og mga pagkadili hingpit.

Niana nga espiritu, ako mohatag sa akong segurado ug mapinanggaong pagsaksi nga ang mga propeta gikan ni Joseph Smith ug ang mga misunod kaniya kay mga propeta sa Dios sa usa ka wala maputol nga linya sa pagkasunod-sunod ug naglakip ni Presidente Russell M. Nelson. Usa ka dako nga panalangin alang kanako ang “pagpangita sa mga propeta” ug ang mas mopaduol sa Dios pinaagi sa mga pagtulun-an sa matag usa kanila.

Ako mohatag sa akong pagsaksi nga kadtong mga gitawag ngadto sa balaan nga pagka-apostol ubos sa pagdumala niini nga mga propeta mga espesyal nga mga saksi kaniadto ug karon sa ngalan ni Jesukristo ngadto sa tanang kalibotan. Usa ka dako nga pribiliheyo ang motan-aw ug magpadayon ngadto ni Jesukristo pinaagi sa mga pagtulun-an niini nga mga saksi.