“Unsaon Nako sa Pagreklamo?,” Liahona, Ene. 2026.
Mga Hulagway sa Pagtuo
Unsaon Nako sa Pagreklamo?
Ang among upat nga pagbalhin isip usa ka bakwit nga pamilya nagmatuod nga kini usa ka labihan ka lisod nga pagsulay. Apan migunit kami sa gunitanan nga puthaw uban sa kaseguroan nga ang Ginoo nagauban kanamo padulong sa mas maayong kaugmaon.
Sa tinglarag niadtong 2019, miabot ko sa Spain kauban sa akong mga anak, 8-anyos si Aaron ug 17 anyos si Jorge, nga dunay autism. Walay laing madala kon dili ang akoa lamang nga mga pangandoy, migunit ako sa Dios ug misalig Kaniya sa hingpit.
Usa ka maayo nga tawo ang mipadayon kanamo sa iyang balay, diin didto kami mipuyo sulod sa duha ka semana. Apan ang pagdala ni Jorge palayo gikan sa iyang naandan nga palibot dili sayon. Tungod sa iyang kahimtang, nagsubay siya og higpit nga mga eskedyul. Sa unang pipila ka gabii, iparok niya ang iyang ulo ngadto sa mga bungbong, ug magdali ko og bangon sa pagpugong kaniya aron dili makamata ang uban. Miluhod ko tupad niya ug nag-ampo, naghinumdom sa Isaias 41:10: “Ayaw kahadlok; kay ania ako uban kanimo: Ayaw pagtalaw; kay ako mao ang imong Dios: palig-onon ko ikaw; oo, buligan ko ikaw; oo, ituboy ko ikaw sa tuong kamot sa akong pagkamatarung.”
Atol sa ikaduha namong semana sa Spain, miabot mi sa simbahan sa hapit na gyod mahuman ang miting sa sakramento. Akong giduol ang usa ka batan-ong babaye nga didto kauban sa mga bata sa Primary ug mipasabot nga miyembro ko sa Simbahan apan wala pa koy nailhan bisan usa. Iya kaming gipailaila ngadto sa ubang mga miyembro.
Pagkasunod adlaw ang konseho sa siyudad sa Zaragosa midawat kanamo isip mga bakwit ug midala kanako sa usa ka apartment nga walay tubig o kuryente. Ang bishopric, ang Relief Society, ug ang elders quorum gikan sa ward nga among gitambongan nangadto sa pagtabang namo nga nagdala og mga habol, mga pagkaon nga dili na kinahanglang initon pa, pangtugnaw nga mga sinina, ug ubang mga panginahanglan.
Ang akong mga anak misugod sa pag-eskwela, ug ako misugod og usa ka kurso sa pagbansay. Ang pagpangaon maoy hagit ni Jorge, kinsa naanad nga mokaon inigka-udto. Ang iyang magtutudlo mipahibalo kanako nga si bisan kinsa pay magtudlo, kon ang relo motumong na sa udto, habwaon niya ang iyang pagkaon ug magsugod na sa pagkaon.
“Magpuasa Usab Ako”
Ang upat namo nga pagbalhin nagmatuod nga kini usa ka labihan ka lisod nga pagsulay. Nag-ampo ko nga magpabiling lig-on apan sa kasagaran makita nako ang akong kaugalingon nga mag-inusarang magbakho. Sulod sa mga semana, makatulog lamang ako og duha o tulo ka oras inigkagabii. Human sa pipila ka adlaw nga pagpangita og trabaho, napanalanginan ko nga makatrabaho sa pagbantay og usa ka babaye nga gitagalan na ang kinabuhi tungod sa kanser sa utok. Human sa matag shift sa trabaho, kuhaon nako ang akong mga anak, tabangan sila sa ilang mga pagtuon, dayon mobuhat ko sa akong homework sa pagbansay.
Giatiman ko kining talagsaon nga babaye sulod sa usa ka tuig, hangtod sa iyang pagkamatay sa edad nga 48, nagbilin og duha ka gagmayng bata. Ang iyang sitwasyon nag-aghat kanako sa pagpangutana sa akong kaugalingon, “Unsaon nako sa pagreklamo?” Ang pag-atiman kaniya nagsangkap sa among panginahanglan ug mipuno sa akong kalag og pasalamat sa akong Langitnong Amahan.
Matag adlaw sa balay magbasa kami sa mga kasulatan, mag-ampo, ug miestablisar og mga eskedyul aron mahatagan si Jorge ug seguridad. Sa sayo nga bahin sa tuig 2024, nagsugod ang among pagpangandam nga moadto sa Madrid Spain Temple. Aron mas mahiduol sa Langitnong Amahan, mibati ako nga kinahanglang magpuasa kaming pamilya. Miuyon si Aaron, ug pagkasunod buntag giingnan ko ni Jorge, “Ma, karong adlawa magpuasa usab ako.” Usa kadto ka gutlo sa dili mahulagway nga kalipay.
“Aron mas mahiduol sa Langitnong Amahan, samtang gisugdan namo ang pagpangandam nga moadto sa Madrid Spain Temple, mibati ko nga kinahanglang magpuasa kaming pamilya,” miingon si Yesmin. Si Jorge miingon kanako, ‘Ma, karong adlawa magpuasa usab ako.’ Usa kadto ka gutlo sa dili mahulagway nga kalipay.”
Sukad sa among pagbisita sa templo, dako kaayo ang paglambo ni Jorge. Mas makapauyon-uyon na siya sa iyang eskedyul. Kada Sabado andamon na niya ang iyang mga sinina aron maandam siya nga moapod-apod sa sakramento inigka-Dominggo. Sa akademik nakahimo usab siya ug talagsaon kaayong paglambo.
Karon nagsangkap kami sa among kaugalingon, gisuportahan sa usa ka mapinanggaon nga Langitnong Amahan. Si Jesukristo nagdala kanamog kalipay inay kagul-anan (tan-awa sa Isaias 61:3). Pinaagi sa pagbayad sa among ikapulo, nakadawat kami ug buhong nga mga panalangin. Naggunit kami sa gunitanan nga puthaw (tan-awa sa 1 Nephi 8:24, 30; 11:25; 15:23) uban sa kaseguroan nga nagpadayon kami padulong sa mas maayong kaugmaon.