“Kristohanong Pagserbisyo Milukmay sa mga Kasingkasing, Miabli sa mga Pultahan sa Corsica,” Liahona, Ene. 2026.
Kristohanong Pagserbisyo Milukmay sa mga Kasingkasing, Miabli sa mga Pultahan sa Corsica
Sa pagtanyag nga motabang sa mga residente sa bisan unsang paagi nga ilang mahimo, ang mga misyonaryo niining isla sa Mediterranea determinadong midapit sa mga tawo sa pagduol ngadto kang Kristo.
Ang mayor sa Bastia nasayod kaayo nga ang mga misyonaryo nga nagbarog sa iyang atubangan mga langyaw. Naghunahuna siya, nganong ang batan-ong mga lalaki moanhi gikan sa ubang nasod ug motanyag nga motabang sa iyang katawhan sa isla sa Corsica?
Human sa makadiyot nga paghunong, gidawat niya ang ilang tanyag ug mihagit kanila nga moadto og sayo sa pagkasunod buntag aron mopintal sa iyang gamay nga hotel.
Matinud-anon sa ilang saad, ang batan-ong mga lalaki nangabot pagka-alas 7:00 sa buntag, mahinamon ug andam nga mopintal sa hotel sa mayor niining madanihon nga isla dapit sa kabaybayonan sa France sa Kadagatan sa Mediterranea.
Dihang miabot ang mayor sa hotel taud-taod nianang adlawa nga nakita ang mga misyonaryo nga nagtrabaho gihapon ilawom sa sidlak sa adlaw sa baybay, “natingala siya nga nakita niya kami didto,” miingon si Jake Lowry, usa sa mga misyonaryo nga nagserbisyo nianang panahona.
Natingala sa ilang kaandam nga motrabaho og sama niadto aron sa pagtabang sa mga tawo nga wala nila mailhi, gilugakan sa mayor ang iyang kamapugnganon ug “mihangyo nga manglingkod kami ug sultihan siya unsay among gikinahanglan,” miingon si Brother Lowry.
Gipakigbahin sa mga misyonaryo ang ebanghelyo ug gisulti nga ang ilang katuyoan mao ang pagpanalangin sa katawhan sa isla sa Corsica. Ilang gisugilon ang kalisod sa ilang pagpangita og usa ka apartment tungod sa mga lumulupyo nga walay pagsalig sa mga dili taga-didto. Pipila ka bulan sa wala pa kadto nahitabo, ang tanang misyonaryo gipapahawa gikan sa isla tungod sa mga hinungdan alang sa kaseguroan. Apan naablihan na kini og balik niini nga mga elder alang sa misyonaryo nga buhat.
Ang mayor naminaw sa mga elder. “Pagkasunod buntag,” si Brother Lowry miingon, “gipapuyo niya kami og nindot kaayong pagkahimutang nga apartment ug mihimo ug mabination nga mubo nga sulat.”
Nianang gabhiona, human makapahimutang ngadto sa ilang bag-ong gipuy-an, “duha ka maayo og pamustura nga mga representante gikan sa opisina sa mayor mihapit sa pagtimbaya kanamo ug mipaneguro kanamo nga kami gihangop ug luwas sa maong siyudad,” miingon si Brother Lowry.
Sa dali nga panahon, ang mayor ug ang iyang asawa nagsugod sa pagtambong og ma-Dominggo nga mga miting didto sa branch, diin didto ganahan sila nga mokanta og mga himno. Sa wala madugay ang asawa sa mayor nabunyagan.
Andam na nga Dapit
Gikan niining yano nga mga sinugdanan sa unang bahin sa 1990, ang Simbahan nakagamot dinhi niini nga isla nga nabantog isip yutang natawhan ni Napoleon Bonaparte. Ang misyonaryo nga buhat sa wala madugay milambo. Human sa tulo ka bulan, kapin sa 40 ka tawo ang nagtambongan og mga panagtigom ma-Dominggo sa usa ka matahom nga abotanan nga gihan-ay sa mayor.
“Sa paghinumdom sa nangagi, atong makita nga ang kamot sa Ginoo klaro kaayo nga anaa sa tukmang panahon ug sa mga paagi nga natukod ang Simbahan sa isla sa Corsica,” miingon si Richard W. Thatcher, kanhi presidente sa mission sa France Marseille Mission, karon ang France Lyon Mission.
Apan ang pagkaangkon niana nga kalamposan sa maong isla wala moabot nga sayon. Ang nag-unang paningkamot sa pagbutang og mga misyonaryo gisugat og mga pagsupak ug mga hulga sa peligro. “Ang dili maayong pagbati sa lumad nga katawhan sa Corsica batok sa mga French nagkadako sa sayo nga bahin sa tuig 1990,” miingon si Brother Thatcher.
Ang lumad nga Taga-Corsica nagpakita nga wala sila mahimuot sa mga dili taga-didto pinaagi sa paghimo og mga bomba aron panggub-on ang mga negosyo ug mga kabtangan sa mga langyaw. “Komon ra,” miingon si kanhi Elder Darin Dewsnup, “nga makadungog og daghang mga pagbuto matag adlaw niana nga siyudad. Dili kami Taga-French, apan dili usab kami mga Taga-Corsica.”
Ang mga misyonaryo gipasidan-an na daan sa mga peligro, ug dihang mibuto ang bomba dapit sa ilang kasilinganan, ang upat ka misyonaryo sa maong isla gipabalhin ngadto sa laing bahin sa misyon sa dako nga yuta sa France.
“Ang among mga misyonaryo wala na sa maong isla,” miingon si Brother Thatcher, nag-ingon nga kini nga babag usa ka oportunidad sa pagkat-on ug pagtubo.
Ang Kristohanong Pagserbisyo Mao ang Tubag
Aron mas masabtan ang mga katuyoan sa langit, ang mga misyonaryo mapasaligon nga tun-an ang kinabuhi ug pagpangalagad sa Manluluwas aron mas masabtan ang Iyang mga paagi. Gitun-an nila ang Iyang mga buhat sa pagserbisyo ug kamanggiluy-on, nga naglakip sa pagpakaon ug pagpang-ayo ug paghigugma. Nasabtann nila nga ang pagserbisyo mahinungdanon aron maangkon ang pagsalig sa mga tawo ug ang pagserbisyo sa pamaagi sa Ginoo.
Uban sa nabag-o nga pokus sa pagserbisyo, tulo ka misyonaryo ang gipadala aron maablihan og balik ang misyonaryo nga buhat didto sa Corsica niadtong Marso 1992. Niining higayona, gipadala sila ngadto sa ikaduhang labing dako nga siyudad sa isla, sa Bastia. Didto determinado silang makighimamat og mga tawo sa natural nga paagi imbis manuktok sa mga pultahan, diin usahay makamugna og kahadlok tali sa mga residente.
“Natubag ang among mga pag-ampo. Among nakita nga ang pagserbisyo makapakita sa among sinseridad ngadto sa komunidad ug molukmay sa mga kasingkasing sa katawhan kinsa kaniadto dili moabiabi og mga dili taga-didto,” miingon si Brother Thatcher.
Ang bag-ong mga misyonaryo mipaila sa ilang mga kaugalingon ngadto sa mga residente pinaagi sa pagtanyag og tabang kutob sa kon unsay ilang mahimo. Mangibot sila og mga sagbot sa mga garden sa pamilya, moayo og mga sakyanan, ug sa sitwasyon sa mayor, gipintalan ang iyang hotel nga nanginahanglan na og bag-ong pagpintal. Sa kasagaran makighigala sila, ug ang ilang mga paningkamot napasalamatan. Hapit sa tanang panahon hangyoon sila sa paglingkod ug sa pag-inom og “limonata” (lemonada) ug moingon “sultihi kami bahin sa inyong simbahan,” si Brother Thatcher miingon. Sa wala madugay, “nagsugod kami nga nakabaton og daghang kalamposan,”
Ang nag-unang referral misangpot sa bunyag sa pamilyang Lota, nga misangpot sa lahi na usab nga referral. Dihang ang mga misyonaryo misulod sa panimalay sa referral, ang inahan sa pamilya, kinsa dugay nang nag-ampo aron masayod sa kamatuoran, “miluhod ug mibakho sa pagpasalamat sa Ginoo sa pagtubag sa iyang mga pag-ampo.”
Pag-ayo sa Dili Maayo nga mga Relasyon
Sa sayo nga bahin sa ilang pagserbisyo sa Bastia, ang mga misyonaryo miboluntaryo sa kinadak-ang ospital sa Katoliko, apan ang monsenyor nga tigdumala sa ospital mibalibad sa ilang serbisyo dihang nahibaloan niya ang ilang relihiyon. Nagpanuko siya nga dunay laing mga tinuohan nga Kristiyano nga maapil sa ospital.
Mga pipila ka bulan human niadto, niadtong Mayo 1992, usa ka lapad kaayo nga seksiyon sa estadyum nahagsa atol sa usa kampyonato nga dula, nga may 19 nga namatay ug ang liboan sa mga nanan-aw nangaangol sa hilabihan ang gipangdala sa ospital.
Dihang nahagsa ang estadyum sa soccer sa Corsica, nga mipatay og 19 ug nakaangol og liboan, ang mga misyonaryo migahin og daghan kaayong mga oras sa pagtabang inubanan sa inabagan nga emerhensiya nga pag-atiman didto sa lokal nga ospital.
Gilitratohan ni Craig Peterson
Ang mga biktima nag-awas-awas na sa ospital. Ang nangaangol nga mga fans mipuno sa mga kwarto ug naglinya sa mga agianan. Ang uban gidala ngadto sa mainland France aron maatiman. Ang monsenyor, nga walay makuhang makamao nga mga boluntaryo, nahinumdom sa kard nga gibilin sa mga misyonaryo ug gitawagan sila aron makatabang.
Sulod sa 36 ka oras, ang mga misyonaryo nanagdagan gikan sa usa ka buluhaton ngadto sa laing buluhaton, nagtabang sa nagkalainlaing matang sa inabagan nga mga pag-atiman sa emerhensiya, sama sa pagbutang og hugot nga mga bindahe sa pagsanta sa pag-agas sa dugo sa samaran, pagpanglimpyo sa mga kwarto, ug pagbalhin sa mga nangaangol. Gipanghatagan nila og mga panalangin sa pagkapari ang mga miyembro sa branch nga nangaangol tungod sa pagkahagsa.
Dihang ang monsenyor nakabantay sa walay pagkaluya nga mga paningkamot sa mga misyonaryo, iya silang gipundok tanan ug gidala sa palibot sa ospital, nag-ingon sa mga pasyente nga ang mga misyonaryo mga tawo sa Dios ug tugotan nga sila mangalagad og mga panalangin ngadto sa mga nangasamdan.
Nahinumdom si Brother Thatcher: “Among naangkon ang pagtahod ug pagdayeg gikan sa usa ka taas og ranggo nga opisyal sa siyudad ug sa mahinungdanon nga eklesyastikal nga awtoridad tungod sa among pagserbisyo.” Mipahumok kini sa mga kasingkasing ug nakatabang nga mawagtang ang pagkadili madawaton sa komunidad, miingon siya. “Mahinungdanon kaayo kini sa kalamposan sa among mga paningkamot sa pagsangyaw.”
Si Jason Soulier, presidente sa France Lyon Mission niadtong 2024, miingon: “Karon, ang mga milagro sa paglambo nagpadayon sa Corsica, bisan sa managlahi nga mga babag. Niadtong 2024, 14 ka mga miyembro sa Bastia Branch mibiyahe ngadto sa Paris France Temple aron mopahigayon og daghang adlaw sa buhat sa templo, kini ang labing dako nga pundok nga mibiyahe gikan niining hilit nga dapit sa isla sa Mediterranea ngadto sa templo. Pinaagi sa tabang sa full-time nga senior nga magtiayon ug sa lima ka abtik nga mga elder ug mga sister, ang Ginoo padayong mipanalangin niining paraiso nga isla og bag-ong mga kinabig.”