“Mibati Ko og Kalinaw,” Liahona, Ene. 2026.
Mga Tingog sa mga Santos sa Ulahing mga Adlaw
Mibati Ko og Kalinaw
“Daw sa di pa igo ang akong kasakit,” naghunahuna ko, “karon kinahanglan pa ko nga mopatugtog og lisod nga himno.”
Paghulagway pinaagi ni Allen Garns
Sa dihang nakadawat ko og duha ka calling sa Simbahan isip piyanista sa sama nga semana, nagsugod ko og kabalaka kon unsaon nako sa pagpangita og higayon aron mabuhat ang akong uban nga responsibilidad sa panimalay, sa trabaho, ug sa eskwelahan. Sa akong kasingkasing, ang akong labing dako nga pangandoy mao ang pagserbisyo sa Ginoo ug pagdala sa Iyang Espiritu ngadto sa mga tawo samtang nagpalambo sa akong talento. Akong gibati, hinuon, ang kakulangan nga wala nako mapahinungod ang akong kaugalingon sa akong bag-o nga calling sama unta sa akong gusto.
Sa misunod nga semana, taas na ang gilaoman sa kompanya nga akong gitrabahoan. Tungod kay kasagaran sa akong trabaho naglakip sa pag-type, ang akong mga braso ug mga pulsohan nagsugod og sakit. Nabalaka ko kon makatugtog pa ba kaha ko og piyano kon dili mawala ang gibati nakong sakit.
Pagka Dominggo, samtang nagtugtog ko sa pasiunang musika sa piyano sa chapel, ang akong kaunoran misugod sa pagsakit. Dali ko nga nag-ampo diha sa akong kasingkasing, nangayo og kalig-on nga makapadayon sa pagtugtog.
Atol sa sakramento, akong naamgohan nga ang sunod nga kantahon nga himno mao ang usa nga wala na nako matugtog sa dugay nang panahon. “Daw sa di pa igo ang akong kasakit,” naghunahuna ko, “karon kinahanglan pa ko nga mopatugtog og lisod nga himno.” Ug kana ang higayon nga nabasa nako kini nga mga pulong, nga eksaktong misulti kon unsa ang akong gibati:
Samtang nagbasa ko, gibati nako ang kalinaw. Nakahibalo ko nga ang Manluluwas nasayod sa akong mga kasakit. Labaw sa tanan, Siya nag-antos niini (tan-awa sa Alma 7:11–12). Dili ko kinahanglan nga mag-inusara sa pagsagubang niini nga higayon. Wala ko magdahom niini, apan gibati nako ang Espiritu sa Ginoo.
Sa dihang nagsugod ko sa pagtugtog, wala na ako mobati og sakit, ug ang mga nota mura og pamilyar na sa akong mga tudlo. Akong naamgohan nga ang akong pagserbisyo miabli sa dalan alang sa pagkaayo ug mas nakapaduol nako ngadto sa Langitnong Amahan.
Samtang akong gihinuktokan ang akong kasinatian diha sa piyano, nakahibalo ko nga wala ko mag-inusara sa pagtugtog. Natandog ko sa gahom ug grasya ni Jesukristo—usa ka espirituhanong kasinatian nga miabot tungod kay nagserbisyo ko Niya. Nakahibalo ko nga Siya kanunay anaa aron sa pagsuporta ug paghatag nato og gahom kon kita andam nga moserbisyo Niya.