“Imong Higala Dali, Sunod Kanako,” Liahona, Ene 2026.
Imong Higala Dali, Sunod Kanako
Kini nga kapanguhaan karong tuiga nagdugang og bag-ong artwork ug makapaukyab sa hunahuna nga mga panabot alang sa imong pagtuon sa Daang Tugon.
Seguradong Luwason Ko Ikaw, ni Eva Timothy, dili mahimong kopyahon
Dili ba nindot kon, samtang nagbasa sa mga kasulatan, kanunay kang dunay usa ka higala nga naglingkod tupad nimo, nagdasig kanimo? Tingali usa ka tawo nga nahigugma sa mga kasulatan ug mahinamon kaayo nga ikaw nagbasa niini, dili niya mapugngan ang iyang kalipay. Sa panagsang higayon ang imong higala moingon og sama sa, “Dili ba kana nga bahin nindot kaayo?” “Unsay imong hunahuna niana nga mga bersikulo?” “O, pagkaanindot, sama ra kana sa atong kinabuhi, dili ba?” Kon ugaling mahunong ka man o maglibog sa usa ka lisod nga tudling, ang imong higala tingali moingon og sama sa, “Ah, aniay usa ka paagi sa pagsusi niini. Nakatabang ba kana?”—hinoon magmaampingon siyang dili makasulti og mga makadaot. Usa siya ka higala, bisan pa man.
Ang Dali, Sunod Kanako ingon og susama niana nga higala. Ang katuyoan niini mao ang pagtabang kanimo nga makaangkon og nindot nga kasinatian sa pagbasa sa mga kasulatan. Mopatutok kini kanimo ngadto sa mga tudling nga makatabang sa paglig-on sa imong pagtuo sa Langitnong Amahan ug ni Jesukristo—ug dayon makatabang kini nga imong makonekta kadto nga mga tudling sa mga butang nga nanghitabo sa imong kinabuhi. Makatabang kini kon ikaw dunay mga pangutana, apan mas kasagaran, ang Dali Sunod Kanako mangutana kanimo og mga pangutana kay sa motubag niini—tungod kay ang usa ka maayo nga higala dili gayod mohikaw kanimo sa kalipay sa pagdiskobre og espirituhanong mga kamatuoran alang sa imong kaugalingon.
Ang Dali, Sunod Kanako makahimo niining tanang mahigalaong mga butang bisan kanus-a ka mobasa sa mga kasulatan. Oo, bisan kon ikaw magbasa sa Daang Tugon niining tuiga.
Agig dugang sa makapaukyab sa hunahuna nga mga pangutana ug mga ideya sa kalihokan, makakaplag ka og ubang makatabang nga mga feature diha sa Dali, Sunod Kanako. Ania ang pipila:
Kinatibuk-ang Pagpasabot sa Daang Tugon
Dapit sa sinugdanan sa 2026 nga Dali, Sunod Kanako, makakita ka og usa ka biswal nga kinatibuk-ang pagpasabot bahin sa Daang Tugon. Susama kini sa usa ka timeline nga maglakip sa mga ngalan sa mga propeta, mga hari, ug ubang mahinungdanong mga tawo. Makatabang kini kay ang mga basahon diha sa Daang Tugon wala sa sunodsunod nga pagkahan-ay. Ang kinatibuk-ang pagpasabot makapakita kanimo, sama pananglit, kon asa ang mga sinulat sa mga propeta sama sa Isaias ug Jeremias mohaom ngadto sa kasaysayan sa Gingharian sa Juda. Imong makita kon asa mohaom ang mga istorya mahitungod ni Daniel ug ni Ester ngadto sa mas halapad nga paglarawan sa Daang Tugon. Kon ugaling ikaw mobati nga naglibog diha sa Daang Tugon, paklia ang “Kinatibuk-ang Pagpasabot sa Daang Tugon” para masabtan kini.
Bag-ong Artwork
Dose ka bag-ong mga painting ang gisangonan niining tuiga sa Dali, Sunod Kanako. Ang pipila ka mahinungdanong kalihokan naglakip sa:
-
Si Enoch Nakakita sa Tunga-tunga nga Panahon, ni Jennifer Paget, usa ka simbolikanhong representasyon sa panan-awon ni Enoch sa sakripisyo sa Manluluwas (tan-awa sa Moises 7).
-
Mobarog isip usa ka Saksi, ni Kwani Povi Winder, naghatag og gibug-aton sa “dalagita” kansang yano nga pagpamatuod misangpot sa talagsaong milagro (tan-awa sa 2 Mga Hari 5).
-
I Have a Great Work to Do [Aduna Akoy Talagsaong Buhat nga Buhatonon], ni Tyson Snow, nga nagpakita sa determinasyon ni Nehemias sa pagtukod og balik sa mga paril sa Jerusalem, bisan sa pagsupak gikan sa iyang mga kaaway (tan-awa sa Nehemias 4).
-
I Will Surely Deliver Thee [Seguradong Luwason Ko Ikaw], ni Eva Timothy, usa ka paghulagway kang Jeremias nga gibuhian gikan sa lapokon nga prisohan ni Ebed-melech, usa ka Etiopiyanhon (tan-awa sa Jeremias 38–39).
“Mga Panghunahuna nga Angay Hinumdoman”
Kasagaran kaayo sa matag higayon, ang sunod-sunod nga mga sinemana nga giya sa pagtuon diha sa Dali, Sunod Kanako mohunong alang sa “Mga Panghunahuna nga Angay Hinumdoman.” Mao kini ang ginagmay nga salaysay mahitungod sa mga hilisgotan sama sa mga pakigsaad, sakripisyo, sa pagpundok sa Israel, ug mga balak sa Daang Tugon. Ang “Mga Hunahuna nga Angay Hinumdoman” nagtanyag og makasaysayan nga konteksto, sa ulahing adlaw nga mga panglantaw, ug sa yanong mga panabot nga tingali maghimong sayon sa pagbaton og makapalig-on sa pagtuo nga mga kasinatian kon magtuon sa Daang Tugon.
Sama sa milabayng tuig, ang Dali Sunod Kanako dili maoy imong tun-an. Usa lamang kini ka makatabang nga kompanyon samtang ikaw magtuon sa pulong sa Dios diha sa mga kasulatan. Mao kana ang tuyo sa panaghigalaay.