Pagpangita kang Kristo ug sa mga Pakigsaad: Mga Mahinungdanong Paagi ni Nephi sa Pagbasa sa Daang Tugon

Ni David R. Seely

Propesor sa Karaang Kasulatan, Brigham Young University

Si Nephi mipakigbahin og pipila ka panabot nga makatabang nimo sa imong pagtuon.

Ganahan kong mobasa sa Daang Tugon. Sulod sa mga katuigan, nakadiskobre ko og duha ka mahinungdanong tema nga pangitaon diha sa Daang Tugon nga makadala og hingpit nga kalipay ug makapalambo sa panabot: si Kristo ug ang mga pakigsaad.

Ania ang pipila ka paagi nga kita makapangita ni Kristo ug sa mga pakigsaad sa atong pagtuon diha sa Daang Tugon niini nga tuiga.

Pagpangita kang Kristo

Si Nephi, kinsa mibasa sa mga kasulatan gikan sa mga palid nga tumbaga, miingon, “Tan-awa, ang akong kalag nahimuot sa pagpamatuod ngadto sa akong katawhan sa katinuod sa pag-anhi ni Kristo; kay, tungod niini nga katuyoan ang balaod ni Moises gihatag; ug ang tanang butang nga gihatag sa Dios ngadto sa tawo, gikan pa sa sinugdanan sa kalibotan, nagsimbolo kaniya” (2 Nephi 11:4).

Makakaplag kita ni Jesukristo diha sa Daang Tugon sa daghang paagi.

Moses and the Brass Serpent [Moises ug ang Bitin nga Tumbaga], ni Judith A. Mehr; Kristo diha sa Krus [Christ on the Cross], ni Carl Heinrich Bloch

Ang Dios sa Daang Tugon

Tungod kay nasayod kita pinaagi sa modernong pagpadayag nga si Jesukristo mao ang Dios sa Daang Tugon (tan-awa sa Doktrina ug mga Pakigsaad 110:3–4), kita makakita sa Iyang gahom diha sa Paglalang ug isip ang Tighatag sa Balaod sa Bukid sa Sinai nagtudlo sa Israel unsaon sa pagkahimong sama sa Dios. Nahibalo kita bahin sa Iyang grasya diha sa pagtubos gikan sa pagkaulipon ngadto sa Ehipto, sa Iyang gugma sa pag-amuma sa Iyang katawhan didto sa kamingawan ug pagdala kanila ngadto sa gisaad nga yuta, ug sa Iyang padayon nga kamanggihunahunaon pinaagi sa pagpadala og mga propeta ug pagtanyag og kapasayloan ngadto sa Israel sa ilang paghinulsol sa ilang mga sala.

Mga Nagsimbolo ni Jesukristo

Adunay daghan nga nagsimbolo (o representasyon) bahin ni Jesukristo diha sa mga istorya sa Daang Tugon, ang daghan niini nagtag-an sa Iyang umaabot nga pag-anhi sigon sa narekord diha sa Bag-ong Tugon ug sa Basahon ni Mormon. Ang istorya bahin ni Abraham ug Isaac nagtag-an sa Dios nga Amahan nga nagsakripisyo sa Iyang Anak, nga si Jesukristo. Si Jose miluwas sa iyang mga igsoong lalaki gikan sa pisikal nga kagutom, sama nga si Jesukristo nagluwas kanato gikan sa espirituwal nga kagutom. Si Moises mihaw-as sa iyang katawhan gikan sa pagkaulipon sama nga si Jesus naghaw-as kanato gikan sa sala. Ang Ginoo mitudlo sa mga anak ni Israel sa gahom sa hugot nga pagtuo diha Kaniya ug sa Iyang Pag-ula diha sa istorya bahin sa bitin nga tumbaga sa kamingawan. Si Elijah ug Eliseo nagpakita sa ehemplo sa Manluluwas sa ilang pag-ayo sa masakiton ug sa pagbuhi sa mga patay.

Mga Panabot kabahin sa Manluluwas diha sa Bag-ong Tugon

Si Jesukristo simbolikanhon diha sa mga istorya sa Daang Tugon ug sa balaod ni Moises. Ang mga istorya bahin sa Pagpalabay ug sa pagsakripisyo diha sa balaod ni Moises nagpunting kang Kristo. Sa pagtagna sa misyon ni Jesukristo, ang mga propeta sa Daang Tugon miayo sa masakiton ug mibuhi sa patay. Pinaagi ni propeta Jeremias, ang Ginoo misaad kanato og “bag-ong kasabotan [pakigsaad]” (Jeremias 31:31; tan-awa usab sa bersikulo 32).

Diha sa Bag-ong Tugon, si Jesus miabot isip maoy katumanan sa balaod ug sa mga propeta sa Daang Tugon. Gipamulong Niya ang bag-ong pakigsaad diha sa Wali Ibabaw sa Bungtod ug mipasiugda sa mga simbolo sa pakigsaad atol sa panihapon sa Pagpalabay sa Kataposang Panihapon. Gitudloan kita ni Jesus sa paghigugma ug pagserbisyo sa usag usa dihang Siya miayo sa masakiton ug mibuhi sa patay. Iya kitang gitubos gikan sa sala ug kamatayon pinaagi sa Iyang Pag-ula, ug gitukod Niya ang Iyang Simbahan dinhi sa yuta. Kon kita moila ni Jesus isip ang Dios sa Daang Tugon, mas makasabot kita bahin Kaniya diha sa Bag-ong Tugon.

Pagtinguha sa mga Pakigsaad

Si Nephi usab mitudlo kanato sa pagpangita diha sa kasulatan og mga pakigsaad: “Ug usab ang akong kalag nahimuot sa mga pakigsaad sa Ginoo nga iyang gihimo sa atong mga amahan” (2 Nephi 11:5).

Si Presidente Russell M. Nelson mipasabot usab og maayo sa kaimportante sa mga pakigsaad. Miingon siya: “Ang labing dako nga pagdayeg nga madawat niining kinabuhia mao nga mailhan nga usa ka tighupot sa pakigsaad. Ang mga ganti alang sa tighupot og pakigsaad madawat niini nga kinabuhi ug human sa kinabuhi dinhi.”

Pagkaanindot nga saad! Bisan human sa bunyag ug sa paghimo og mga pakigsaad sa templo, tingale dili kita makamatikod kon unsa kadako ang epekto niini nga mga saad alang sa mas maayo natong inadlaw-adlaw nga pagpakabuhi. Apan ang Daang Tugon nagpahinumdom kanato unsa gayod ang buot ipasabot sa pagkahimong “mga tawo sa pakigsaad” ug sa unsang paagi kita mas makasabot sa mga panalangin ug mga responsibilidad nga nagauban niini.

Ang nag-unang pakigsaad nga gihisgotan diha sa Daang Tugon mao ang pakigsaad ni Abaraham. Makakaplag kita og mga kamatuoran mahitungod sa ebanghelyo ni Jesukristo diha niini nga pakigsaad, nga mogiya kanato ngadto kang Jesukristo, kang kinsa kita makakaplag og kaluwasan.

Aniay pipila ka paagi nga ang Daang Tugon makatabang nato sa mas dugang nga pagsabot ug pagtuman sa atong mga pakigsaad.

Pagsabot sa Atong Tahas diha sa Pakigsaad ni Abraham

Ang pakigsaad ni Abraham usa ka sumpay-sumpay sa mga saad ug sa mga panalangin nga gihatag ngadto ni Abraham nga nagpadayon hangtod karong adlawa diha sa “bag-o ug walay kataposang pakigsaad” nga gipahiuli pinaagi ni Propeta Joseph Smith (tan-awa sa Doktrina ug mga Pakigsaad 132:30–31). Si Presidente Nelson mitudlo:

“Ang Ginoo mipakita niining ulahing mga adlaw sa pagbag-o sa pakigsaad [ni] Abraham. Ngadto ni Propeta Joseph Smith, ang Agalon mipahayag:

“‘Si Abraham nakadawat og mga saad mahitungod sa iyang binhi, ug mga kaliwatan—kang kinsa nga mga kaliwatan kamo nagagikan, … akong sulugoon nga si Joseph. …

“‘ Kini nga saad mainyo usab, tungod kay kamo gikan kang Abraham’ [Doktrina ug mga Pakigsaad 132:30–31].”

Pinaagi niini nga pakigsaad, ang Ginoo mimugna og matarong nga pamilya diin Iyang ikatudlo ang Iyang ebanghelyo ug madala ang Iyang mga anak ngadto ni Jesukristo. Si Apostol Pablo mitudlo kanato nga kon kita moduol kang Kristo, mamahimo kita nga kabahin sa pamilya ni Abraham: “Kon kamo iya na ni Cristo, mga kaliwat kamo ni Abraham ug madawat ninyo ang gisaad sa Dios” (Mga Taga-Galacia 3:29; tan-awa usab sa bersikulo 27). Pinaagi sa pakigsaad ni Abraham, ang mga miyembro sa Ang Simbahan ni Jesukristo sa mga Santos sa Ulahing mga Adlaw mamahimo nga balay sa Israel ug mga manununod sa mga panalangin sa mga pakigsaad ni Abraham.

Makakat-on kita mahitungod sa atong tahas diha sa pakigsaad pinaagi sa pagsusi sa mga kinabuhi niadtong anaa sa Daang Tugon, pinaagi sa pagtuon sa mga saad nga gihimo sa Ginoo ngadto sa Iyang mga anak diha sa mga kasugoan, ug pinaagi sa pagpaminaw sa karaang mga propeta kinsa nangamuyo sa mga anak ni Israel sa paghinulsol ug pagtuman sa ilang mga pakigsaad.

Pagkaplag sa Gisaad nga mga Panalangin pinaagi sa Atong mga Pakigsaad

Samtang basahon nato ang Daang Tugon, mahimo kitang mangita og mga indikasyon bahin sa Ginoo nga nagtuman sa mga saad nga gihimo diha sa pakigsaad ni Abraham. Ang tulo ka nailhan kaayong panalangin mao ang yuta, nga nagsimbolo sa usa ka kabilin sa gingharian sa Langitnong Amahan; sa kaliwatan, nga maoy saad nga magpadayon ang mahangtorong paglambo; ug mga panalangin sa ebanghelyo ug sa pagkapari, “diin mao ang mga panalangin sa kaluwasan, gani sa kinabuhi nga dayon” (Abraham 2:11).

Si Abraham gisaaran nga pinaagi sa iyang binhi “panalanginan ang tanan nga nasod sa kalibotan” (Genesis 12:3). Nagpasabot kini nga si Jesukristo moanhi sa kalibotan pinaagi sa kaliwatan ni Abraham ug mopanalangin sa kanasoran sa yuta pinaagi sa Iyang Pag-ula ug Pagkabanhaw (tan-awa sa Mga Taga-Galacia 3:16).

paghulagway sa Manluluwas nga nag-ampo diha sa Getsemani

Unsa nga mga panalangin ang imong nakita sa imong kinabuhi karon tungod sa pakigsaad ni Abraham?

Ang Katungdanan sa Pagpundok sa Israel

Kauban sa mga panalangin, isip kabahin sa pakigsaad ni Abraham naglakip og pihong mga responsibilidad. Pinaagi sa pagtuon sa Daang Tugon, makakat-on kita unsaon sa pagpakabuhi nga magsubay sa atong mga pakigsaad. Isip kapamilya ni Abraham, ang mga miyembro sa Simbahan gitawag sa pagpundok sa Israel. Sa higayon nga kita moapil sa misyonaryo nga buhat, sa pagpangalagad, sa buhat sa templo, sa mga calling sa Simbahan, ug sa pagtudlo ug pag-amuma sa atong mga pamilya, atong gipundok ang Israel pinaagi sa pagdala sa uban paduol ni Kristo.

Si Presidente Nelson mitudlo, “Bisan kanus-a nga mobuhat kamo og bisan unsa nga makatabang ni bisan kinsa—sa matag habig sa tabil—nga padulong sa paghimo og mga pakigsaad sa Dios ug sa pagdawat sa ilang mahinungdanong mga ordinansa sa bunyag ug sa templo, nagtabang kamo sa pagpundok sa Israel.”

Pagkat-on sa Paghigugma sa Daang Tugon

Karong tuiga samtang magbasa ka sa Daang Tugon alang sa atong Dali, Sunod Kanako nga pagtuon, makakat-on ka sa paghigugma sa mga pagtulun-an pinaagi sa pagsunod sa ehemplo ni Nephi sa pagpangita niining duha ka tema: si Kristo ug ang mga pakigsaad. Sa paghimo niini, masabtan nimo si Jesukristo, Iyang Pag-ula, ug ang Iyang ebanghelyo. Makat-onan usab nimo ang dugang pa mahitungod sa “bag-o ug walay kataposang pakigsaad” ug ang imong tahas diha niini isip disipulo ni Kristo ug isip sakop sa balay ni Israel.

Ang mga istorya ug mga pagtulun-an nga anaa sa Daang Tugon makatabang nato nga mapalambo ang atong relasyon ngadto sa Manluluwas ug ang atong panabot ug pasalig sa atong kaugalingon nga mga pakigsaad.