Ang Ginoo Mogiya Kanako

Paghulagway pinaagi ni Allen Garns

Nagdako ko nga mangantahay ug gilibotan sa musika. Ang akong pangandoy sukad bata pa mao ang mahimong usa ka propesyonal nga singer. Gani nakadaog na ko og daghang mga kontest sa kanta. Apan sa pipila ka punto sa akong kinabuhi, mibati ko og kahaw-ang dihang naghunahuna ko mahitungod sa katuyoan sa Dios alang nako nga wala mabantayi ug madayeg sa uban.

Ang pagkaanaa sa ebanghelyo ni Jesukristo nga padayong naglambo sa akong kinabuhi nakatabang nako sa pagbaton og pagtuo sa walay kaseguroang mga panahon. Nakatabang usab kini kanako sa pagsabot nga ang Langitnong Amahan gusto nga akong magamit ang talento nga Iyang gihatag kanako aron mas mahiduol Kaniya ug mohimaya Kaniya.

Bisan og wala nako idayon ang akong mga pangandoy, mibati ko nga akong ipadayon ang pagkanta ug pagtuon og musika.

Sa edad nga 25, nakahuman ko og eskwela sa arkitektura ug nagtuon usab pinaagi sa BYU–Pathway Worldwide ug Brigham Young University–Idaho, nga nakatabang nako nga mapalambo ang akong abilidad sa pagsulti og Iningles.

Dayon may milagrosong nahitabo.

Nakadawat ko og imbitasyon nga mahimong usa ka musikal nga misyonaryo isip kabahin sa Tibuok Kalibotan nga Partisipante sa Programa sa The Tabernacle Choir. Wala lang ko masayod, apan ang tanan nakong gibuhat sulod sa daghang katuigan nakatabang kanako nga maandam alang niini nga higayon. Ang imbitasyon maoy tubag sa akong mga pag-ampo ug mga tinguha. Ang Langitnong Amahan nahibalo sa kataposan gikan sa sinugdanan ug mitugot kanako nga makakanta kauban sa Tabernacle Choir sa Temple Square atol sa Oktubre 2024 nga kinatibuk-ang komperensiya.

Pinaagi niini nga kasinatian, makapamatuod ako sa gahom nga gigiyahan pinaagi sa Espiritu Santo, pagkamapailobon, ug sa pagsalig nga ang Dios dunay katuyoan, bisan og dili nato masabtan kana nga katuyoan. Sigon sa gisaad ngari kanato, “Tingali dili kamo mahibalo kon unsay buhaton sa duol nga umaabot, apan kita makasunod sa Manluluwas uban sa hugot nga pagtuo nga ang atong panaw matahom ug madaogon nga matapos tungod kay Siya luwas nga mogiya kanato ngadto asa kita gikinahanglan nga maanaa.”

Alang niadtong nagpangita sa ilang dalan sa unahan, hibaloi nga ang Ginoo dunay giandam alang kaninyo nga mas labaw kay sa inyong mahunahuna. Kon sundon nato Siya, atong madawat ang unsay Iyang giandam alang kanato. Ang dalan tingali dili klaro, ug ang kinabuhi tingali malisod, apan ang Ginoo sa gihapon naghimo og mga milagro alang sa Iyang mga anak.

Akong nakat-onan nga pinaagi sa pagtuo, kamasulundon, pailob, ug pag-ampo, ang Ginoo mogiya kanako.