1001
Tinubdan Sa Matag Grasya
1. Tinubdan sa matag grasya;
Kasingkasing mokanta.
Walay hunong Imong gugma,
Awit nga sangpiton Ka.
Tudloig balaknong awit,
Makahupay nga kanta.
Kahitas‑an ta isinggit,
Kining awit sa gugma.
2. Ikaw ang “bato sa tabang”;
Nga akong masaligan.
Nagalaom, di makawang,
Ikaw lang ang kadangpan.
Jesus mitawag kanako,
Bisan og estranghero;
Nalayo ko sa peligro,
Giluwas Niya ako.
3. Di sayon nga hikalimtan
Ang kaluoy ug tabang!
Sa kaayo Mo bugkosan,
’Ning kalag kong may utang.
Ako nagpalayo Nimo,
Mibiya sa gugma Mo.
Kasingkasing ihalad ko,
Kini ang panaad ko.
Si propeta Samuel mihimo og dako nga bato isip usa ka handumanan sa pagpahinumdom sa katawhan nga ang Dios miluwas kanila sa gubat. Iyang gitawag ang bato og “Eben-ezer,” o “bato sa tabang.” (Tan-awa sa 1 Samuel 7:10–12.)
Mga pulong: Robert Robinson, 1758; alt.
Musika: Tradisyonal nga huni sa mga Amerikano; Wyeth’s Repository of Sacred Music, Part Second, 1813; giusab; gihan-ay 2024 | NETTLETON
Hubad sa Cebuano © 2026 by Intellectual Reserve, Inc.; paghan-ay sa musika © 2024 by Intellectual Reserve, Inc. All rights reserved. Kini nga awit mahimong kopyahon alang sa panagsa, dili pangnegosyo nga paggamit sa simbahan o sa panimalay. Kini nga pahibalo kinahanglang ilakip sa matag kopya nga himoon.
1 Samuel 7:7–12