Mahitungod Niini nga Koleksiyon: Mga Himno—Alang sa Panimalay ug sa Simbahan

Ang Ginoo miingon, “Ang akong kalag mahimuot sa awit sa kasingkasing; oo, ang awit sa mga matarong mao ang usa ka pag-ampo ngari kanako, ug pagatubagon uban sa usa ka panalangin diha sa ilang mga ulo” (Doktrina ug mga Pakigsaad 25:12). Ang sagrado nga musika makadala og hingpit nga kalipay, kahupayan, ug inspirasyon. Ang mag-uban nga pagkanta makapahiusa sa atong mga pamilya ug mga kongregasyon diha sa hugot nga pagtuo ug sa pagsimba.

Agig pasiuna sa pagmantala sa bag-o nga tibuok kalibotan nga libro sa himno, Mga Himno—Alang sa Panimalay ug sa Simbahan, kami malipayon nga mopagawas og ginagmay nga mga grupo sa bag-o nga mga himno sa digital nga paagi. Usa ka bag-o nga grupo sa mga himno ang ipagawas matag pipila ka bulan hangtod nga ang tibuok koleksiyon mahimong anaa na nga giprinta. Ang bag-o nga musika pagapilion gikan sa mga himno nga gihimo sa mga Santos sa Ulahing mga Adlaw, mga himno nga gikan sa ubang Kristiyano nga mga tradisyon, ug mga awit diha sa tibuok kalibtoan nga librarya sa sagrado nga musika sa Simbahan. Kini nga mga pinili maglakip sa mga himo ug mga awit sa mga bata, ang tanan niini magamit sa panimalay, sa miting sa sakramento, ug sa ubang mga miting sa Simbahan.

Kami modapit kaninyo nga mahimong pamilyar sa bag-o nga musika sa higayon nga kini ipagawas. Gamita kini nga mga pinili sa imong inadlaw-adlaw nga pagsimba ug pagtuon ug pagtudlo sa ebanghelyo, sa panimalay ug sa simbahan. Ang palid sa musika ug ang audio nga mga rekording makita sa Librarya sa Ebanghelyo [Gospel Library] ug sa Sagrado nga Musika [Sacred Music] nga mga app ug sa music.ChurchofJesusChrist.org. Ang mga materyal sa pagbansay anaa usab aron sa pagtabang sa mga miyembro ug mga lider sa paggamit sa bag-o nga musika diha sa ilang mga panimalay ug mga kongregasyon.

Kami magpasalamat sa daghang mga miyembro kinsa nakatampo sa ilang oras, mga talento, ug kusog ngadto niining koleksiyon sa sagrado nga musika. Hinaot nga ang Ginoo mopanalangin kanatong tanan samtang kita mohalad Kaniya sa mga awit sa atong mga kasingkasing pinaagi sa sagrado nga musika.

5:10

2:14

3:21