Gikan sa YA Matag Semana
Inadlaw nga Paghinulsol: Unsa Kini ug Giunsa Niini Pagtabang Kanako sa Pagkaplag og Mahangturong Hingpit nga Kalipay
Unsa ang kapuslanan sa paghinulsol kada adlaw kon ako magsige lamang gihapon og himo sa samang mga sayop?
Sa dihang ako mas batan-on pa, mihimo ako og daghang mga kasaypanan.
Sa Uruguay, wala ako napaliboti sa daghang espirituhanong mga tawo o mga lugar, busa ako wala na magsunod sa dalan sa pakigsaad ug nangita alang sa kalipay sa laing dapit. Apan usa ka adlaw, nahunahuna nako ang mahitungod sa mga pagpili nga akong nahimo. Akong naamgohan nga ang kalipay nga akong nasinati lumalabay—kanunay nakong nasinati kaniadto ang mas dakong hingpit nga kalipay kon ako naningkamot sa pagsunod ni Jesukristo.
Gusto ko nga mag-usab.
Misulti ako sa Langitnong Amahan nga ako nagbasol alang sa akong mga sala. Apan ako sa wala madugay nawad-an og kadasig sa dihang ang mga kausaban nga akong gipaningkamutan nga himoon wala moabot ingon kadali sama sa akong gusto kanila nga mahimo. Dayon akong nahinumdoman ang pagdapit ni Presidente Russell M. Nelson sa “diskobreha ang kalipay sa inadlaw nga paghinulsol.”
Wala gayod ako motutok sa inadlaw nga paghinulsol kaniadto, apan ako mihukom sa pagsulay sa pagkat-on pa og dugang mahitungod niini.
Unsa ang Kapuslanan sa Inadlaw nga Paghinulsol?
Sa dihang ako unang misugod sa paghinulsol kada adlaw, wala ako masiguro kon unsa ang kapuslanan niini. Maghinulsol ako sa akong mga sala, apan sa kasagaran, inig sunod nga adlaw ako naghimo sa samang kasaypanan gihapon. Nahibulong ako, “Nganong kinahanglan akong maghinulsol kon dili ako makausab sa akong ngil-ad nga mga batasan diha-diha dayon?”
Miduol ako ngadto sa Langitnong Amahan ug misulti Kaniya sa akong mga kabalaka ug nangutana nganong Siya gusto kanato nga maghinulsol kada adlaw. Gibati ko ang Espiritu nga nagsulti sa akong hunahuna nga sa matag higayon ako maghinulsol, naghatag kanako ang Manluluwas og usa ka higayon sa pagsugod og balik. Misulti usab si Presidente Nelson: “Ang paghinulsol mao ang yawe sa kalamboan. Ang lunsay nga hugot nga pagtuo maghimo kanato sa pagpadayon sa unahan diha sa dalan sa pakigsaad.”
Ang paghinulsol dili mahitungod sa paghimo sa mga butang nga hingpit; kini mahitungod sa pagpadayon nga pagsalig diha ni Kristo sa pag-usab sa atong kinaiya sa paglabay sa panahon! Akong naamguhan nga bisan kon ako naghimo sa samang mga kasaypanan kon ako sa sinsero nga paagi naghinulsol sa akong mga sala ug naningkamot sa pag-usab, Siya motabang kanako sa pag-uswag sa hinay-hinay.
Si Sister Kristin M. Yee, Unang Magtatambag sa Kinatibuk-ang Kapangulohan sa Relief Society, miingon: “Kon ikaw nakigbisog sa usa ka sitwasyon nga sa imong hunahuna imo na unta nga nabuntog karon, ayaw pagbiya. Pagmapailubon sa imong kaugalingon, tumana ang imong mga pakigsaad, paghinulsol kanunay, pangayoa ang tabang sa imong mga lider kon gikinahanglan, ug adto sa balay sa Ginoo sa kanunay kon mahimo nimo. Paminaw ug sunda ang mga pag-aghat nga Iyang ipadala kanimo. Dili Niya talikdan ang Iyang relasyon sa pakigsaad uban kanimo.
Ang Hingpit nga Kalipay sa Matag Adlaw nga Paghinulsol
Lain nga butang nga nakatabang kanako sa pagtutok diha sa inadlaw nga paghinulsol mao ang pagtambong sa templo. Mahal ko ang gahom nga atong madawat kon kita maghimo og mga pakigsaad uban sa Ginoo, ug akong gibati kana nga gahom diha sa akong kinabuhi samtang ako nagpili sa pagbaton og hugot nga pagtuo diha sa unsay ikatabang sa Langitnong Amahan ug ni Jesukristo sa akong mabuhat.
Pinaagi sa pagtutok diha Kanila sa matag adlaw ug sa pagbaton og pailub sa akong kaugalingon, akong nabati nga ang akong relasyon ngadto Kanila nagtubo nga mas malig-on. Pagluhod ug pakigsulti ngadto sa Langitnong Amahan sa matag gabii mahitungod sa unsay akong gipaninguha nga mausab ug sa pag-ila sa Iyang paggiya sa akong kinabuhi nakatabang usab kanako sa pagbati og hingpit nga kalipay sa gasa sa Pag-ula sa Manluluwas.
Adunay usa ka piho nga hingpit nga kalipay nga moabot gikan sa pagkahimong limpyo pinaagi sa atong Manluluwas pinaagi sa pagpasalig pag-usab sa atong mga pakigsaad ug sa Iyang mga sugo. Pinaagi sa atong mga paninguha sa pag-usab ug sa atong pagsalig diha Kaniya, makapangayo kita sa iyang panabang sa pagputol sa ingon og dili maputol nga mga kinaiya, sa pagpangayo og kapasayloan, ug sa pagpasaylo sa atong mga kaugalingon.
Si Sister Yee nagpahinumdom usab kanato: “Matag adlaw usa ka bag-ong adlaw nga puno sa paglaom ug mga posibilidad tungod ni Jesukristo. Matag adlaw kamo ug ako mahimong makahibalo, sama sa gipahayag ni Inahang Eva, ‘sa hingpit nga kalipay sa atong katubsanan’ [Moises 5:11], sa hingpit nga kalipay nga mahimong tibuok, sa hingpit nga kalipay nga mabati ang walay kapakyasan nga gugma sa Dios alang kaninyo.”
Akong nabati ang gugma sa Langitnong Amahan labaw pa sukad kaniadto uban sa akong nagkalawom nga pagpamatuod kabahin sa inadlaw nga paghinulsol. Walay makapahimo kanako nga magpadayon sa pag-uswag labaw kay sa pagkaamgo sa Manluluwas nga kanunay nga naglugway sa Iyang kamot ngari kanako sa matag higayon nga ako moduol Kaniya alang sa kapasayloan ug panabang. Layo ako gikan sa pagkahingpit, apan akong gibati ang kausaban sa akong kasingkasing sa matag higayon nga sugdan ko ang bag-ong adlaw uban sa usa ka tinguha sa pagkat-on ug pagbuhat og mas maayo.
Nahibalo nga tanan kita makasala, ako mapasalamaton alang sa grasya sa Manluluwas ug alang sa hingpit nga kalipay nga ang Iyang kalooy nagdala ngari sa akong kinabuhi sa matag adlaw.