Linain alang sa mga Bag-ong Kasal
4 ka Tabang alang sa Paghimo og mga Desisyon isip usa ka Magtiayon
Ang pagkat-on sa paghimo og mga desisyon isip usa ka magtiayon mahimong malisod. Ania ang pipila ka mga giya sa pagtabang kaninyo paghimo og mas maayong mga desisyon nga mag-uban.
Ang akong asawa ug ako nakahimo og daghang mga desisyon sa among unang duha ka tuig nga pagkaminyo, gikan sa gagmay nga mga desisyon sama sa unsa nga matang sa gatas ang paliton ngadto sa mas dagko nga mga desisyon sama sa kon kanus-a magbaton og mga anak.
Walay pagsapayan unsa ka dako o ka gamay, ang paghimo og desisyon malisod, ilabi na kon kamo nagkat-on sa paghimo niini uban sa lain nga tawo!
Sa kadugayan ug uban sa daghan nga praktis, nakakat-on kami kon unsaon, uban sa panabang sa Ginoo, sa paghimo og maayo nga mga desisyon nga mag-uban. Ania ang upat ka mga butang nga among nakat-onan nga makatabang kaninyo ug sa inyong kapikas sa paghimo og mga desisyon isip usa ka magtiayon.
1. Pagbaton og “Maayong Panghunahuna”
Ang mga kasulatan nagpahinumdom kanato, “kay kita wala sa Dios hatagig espiritu sa katalaw; kondili sa espiritu sa gahom, ug sa gugma, ug sa pagpugong sa kaugalingon” (2 Timoteo 1:7).
Ikaw makagamit niini pinaagi sa pag-ila nga ang paghimo og mga desisyon kon ikaw o ang imong kapikas gikapoy, nahadlok, o nasuko maghimo lamang sa mga butang nga mas komplekado. Usa ka paagi sa pagtabang kanimo ug sa imong kapikas nga maayo ang mga panghunahuna mao ang pag-ampo nga mag-uban. Hangyoa ang Langitnong Amahan alang sa piho nga paggiya diha sa pagahimoon nga mga desisyon. Dili Siya sa kanunay mohatag kaninyo og direksiyon sa porma nga nagdilaab nga sagbot o sa usa ka haligi sa kahayag, apan Siya mogiya sa inyong mga hunahuna ug mga lihok sumala sa Iyang panahon.
Kon ikaw ug ang imong kapikas mga kalma, malinawon nga naghunahuna, ug nahiuyon sa Espiritu, ang paghimo og mga pagpili nga mag-uban mahimong mas masayon.
2. Likayi ang Pagdalidali o Sobra nga Paghunahuna
Bisan kon kamong duha tin-aw ang paghunahuna, ang pagdesisyon og dali kaayo makaapekto sa inyong abilidad sa paghimo sa labing maayo nga pagpili. Pagmapailubon sa usag usa ug tugoti ang inyong mga kaugalingon og panahon sa pagproseso sa inyong mga kapilian, sa pag-ampo, ug sa pagpamalandong sa mga desisyon ug sa umaabot nga mga resulta sa dili pa lihokon.
Bisan pa niana, ang paghulat og dugay kaayo mahimo usab nga makadaot. Ang sobra nga paghunahuna mahimong mogiya ngadto sa kabalaka ug sa pagsaway sa nasabutan nga desisyon. Imbis magsige og hunahuna sa desisyon, kon ikaw nag-ampo mahitungod niini, awhaga ang matag usa sa paglihok diha sa hugot nga pagtuo uban ang pagsalig. Kon kamong duha nahiuyon sa usag usa ug sa Ginoo, makahimo kamo og mga desisiyon nga magkauyon.
Si Elder Carlos A. Godoy sa Seventy makausa miingon: “Ang paghimo og mga desisyon nga makaapekto sa atong kinabuhi ug niadtong atong mga gimahal nga wala ang lapad nga panglantaw sa mga sangputanan niini nagdala og peligro. Hinoon, kon atong hunahunaon ang posibling mga sangputanan niining mga desisyon ngadto sa umaabot, mas klaro natong makita ang pinakamaayong dalan nga subayon karon.”
3. Hinumdomi nga ang Maayong Inspirasyon Nagkinahanglan og Maayong Impormasyon
Sa dihang si Presidente Russell M. Nelson mipili sa iyang mga magtatambag diha sa Unang Kapangulohan, giinterbyu niya ang matag sakop sa Korum sa Napulog Duha tungod kay nahibalo siya nga “ ang maayo nga inspirasyon pinasikad sa maayo nga impormasyon.”
Kini magamit usab ngari kanato! Ang labing maayo nga mga desisiyon mao ang adunay kasayoran nga mga desisyon [informed decisions]. Pakigsulti sa inyong kapikas mahitungod sa ideya nga mangayo sa kasaligan nga mga higala ug mga sakop sa pamilya og tambag mahitungod sa mga pagpili nga kamo nagkauyon sa paghunahuna. Kon kamong duha nagtuo nga kini makatabang, duol ngadto sa uban alang sa ilang mga panabot. Pakigbahin ngadto sa usag usa kon unsay inyong nakat-onan ug pakigkonsulta sa usag usa sa mga pagbati mahitungod sa desisyon.
Ang Ginoo nag-awhag kanato nga “tinguhaa ang pagkat-on, gani pinaagi sa pagtuon ug usab pinaagi sa pagtuo.” (Doktrina ug mga Pakigsaad 88:118). Pangita og impormasyon ug kahibalo gikan sa maayong mga kapangohaan, lakip ang espirituhanong mga kapangohaan sama sa mga kasulatan, mga pulong sa mga propeta, ug ang imong ug sa imong kapikas nga patriyarkal nga mga panalangin. Kon kamong duha maghimo og pagsiksik, kamong duha makahimo sa pag-uswag uban sa inyong mga desisyon sa masaligong paagi.
4.Himoa si Kristo nga Inyong Kompas
Samtang ikaw ug ang imong kapikas moapil sa Ginoo sa inyong paghimo og desisyon ug mopadayon diha sa hugot nga pagtuo, Siya mopahayag sa inyong dalan.
Si Presidente Thomas S. Monson (1927-2018) miingon, “Sa atong pagpamalandong sa mga desisyon nga atong himoon sa atong kinabuhi kada adlaw—bisan sa paghimo niini nga pagpili o niana nga pagpil—kon mopili kita ni Kristo, nakahimo kita sa eksakto nga pagpili.”
Diha sa tanang mga desisyon nga inyong atubangon, pilia ang dalan nga motugot kanimo ug sa imong kapikas nga mas maduol ngadto ni Jesukristo. Himoa Siya nga inyong kinataposang kompas diha sa tanan ninyong mga pagpili. Kon inyong apilon ang Ginoo diha sa inyong kaminyoon ug sundon ang Iyang dugukan alang sa pagpangita sa mga tubag, Siya mohiusa kaninyo ug mogiya kaninyo sa inyong tibuok kinabuhi nga panag-uban.