Gikan sa YA Matag Semana
Giayo ni Kristo human sa Pang-abuso
Ang tagsulat nagpuyo sa South Africa.
Nakaplagan ko ang pagkanaayo ug kalinaw pinaagi ni Jesukristo wala madugay human sa sekswal nga pang-abuso.
Consider the Lilies [Hunahunaa ang mga Lirio], ni Eva Koleva Timothy
Gikan sa higayon nga ang inspirasyon sa pagserbisyo og usa ka fulltime nga misyon nagdilaab sulod kanako, gibati ko ang usa ka lawom nga pagbati sa pagdali og sugod sa pagpangandam. Misalig ako nga ang Dios adunay eksakto ug gituyo nga plano alang kanako. Gisugdan ko ang akong mga papel sa misyon ug gikompleto ang tanan nga gikinahanglan nga mga papeles sulod sa usa lamang ka bulan.
Samtang gihulat nako ang pagkakompleto sa kataposan nga mga pagpangandam, giatubang nako ang mga hagit nga misulay sa akong hugot nga pagtuo. Apan kadto nga mga hagit dili ikatandi sa unsay hapit ko na atubangon.
Nangita og Paghupay diha ni Kristo
Atol niini nga panahon, akong nasinati ang sekswal nga pang-abuso. Sa panahon human dayon sa pang-abuso, nakigbisog ako sa pagtino kon sama sa unsa ang akong umaabot.
Ako dihay usa ka bag-ong pangutana: Nganong ako kinahanglan nga molahutay sa ingon ka makahadlok nga hitabo, ilabi na samtang ako naninguha sa pagtrabaho sa buhat sa Ginoo?
Ang akong kinabuhi naputos sa walay kasigurohan, kahadlok, ug pagduhaduha. Ako nagtuo nga ako dili na mamaayo. Dili ako makasabot kon unsaon nako pagbawi gikan sa ingon nga pagkalaglag nga kasinatian. Gibati ko ang pagkanahimulag og maayo ug napuno sa pagkawalay paglaom.
Naguol ako nga ang kasinatian nakahimo kanako nga dili takos, busa ako nangayo og tabang sa akong presidente sa stake alang sa paggiya. Misugyot siya nga ako mangita og paghupay diha sa makaayo nga Pag-ula ni Jesukristo. Mihatag siya og gibug-aton nga si Kristo mao ang kinataposang tinubdan sa pagpang-ayo ug sa kalinaw ug nag-awhag kanako sa pagbasa sa Basahon ni Mormon.
Mipadayon ako sa pagpakigbugno sa kalibog ug pagduhaduha. Ang akong hunahuna nagngiub, ug wala ako mahibalo kon unsay buhaton. Gitambagan ako sa akong presidente sa stake nga ang akong mga papeles sa misyon dili una ipadala samtang nangayo ako og propesyonal nga tabang gikan sa usa ka batid sa sikolohiya [psychologist]. Ang paagi sa pagsugakod nga ilang gitudlo kanako, uban sa suporta gikan sa mga higala, mitabang kanako sa akong proseso sa pagpaayo. Apan ilabi akong nakakaplag og paghupay didto sa templo.
Pag-ayo sa Dili Mahimong Mamaayo
Atol niining yugto sa hilabihang ka sakit, ako usab miduol ngadto sa Dios diha sa pag-ampo alang sa pagkaayo, kalig-on, ug kalinaw. Samtang akong giunlod ang akong kaugalingon diha sa Basahon ni Mormon, misugod ako sa pagsinati og lawom nga pagbati sa kalinaw. Ang gahom ni Jesukristo sa pag-ayo nahimong ilabi ka makahuloganon ngari kanako. Ako nakaamgo nga unsay akong naagian dili akong sayop, ug akong gibati nga nahupay nahibalo nga ang Dios nahibalo sa akong mga pakigbisog ug “makig-away alang sa [akong] mga gubat”.(Doktrina ug mga Pakigsaad 105:14). Kini nga pagsabot midala kanako sa gibalik nga pasalig ug katin-aw nga akong gitinguha.
Gidala ni Jesukristo diha sa Iyang kaugalingon “ang mga sakit ug mga balatian sa iyang mga katawhan … aron ang iyang kasingkasing mapuno sa kalooy” (Alma 7:11–12). Si Kristo naghupot og lawom nga pagsabot sa nangaging mga kahadlok nga atong gilahutay ug nagtanyag kanato og kahupayan ug kalinaw. Siya usab naghimo kanato nga mopasaylo, bisan kon kini mokabat og dugay kaayong panahon sa pagbuhat sa mao.
Samtang ako naningkamot pinaagi sa akong kasakit uban sa propesyonal ug espirituhanong tabang, ako nakabaton og kalinaw. Bag-ohay nakong nadawat ang akong pagtuga sa templo [temple endowment] ug ang akong tawag sa misyon, tanan salamat ngadto sa gahom ni Jesukristo.
Si Elder Patrick Kearon sa Korum sa Napulog Duha ka Apostoles mitudlo: “Si Jesus batid sa mga butang nga daw imposible. Siya mianhi dinhi aron himoon ang imposible nga posible, ang dili matubos nga matubos, ang dili maayo nga mamaayo, sa paghusto sa dili mahusto, sa pagsaad sa dili masaad. Ug maayo kaayo Siya niini. Sa pagkatinuod, hingpit Siya diha niini.”
Ang mga kamatuoran sa Pag-ula ni Jesukristo nahimong realidad ngari kanako samtang gihimo Niya ang unsay akong gihunahuna nga imposible nga posible sa akong kinabuhi. Giayo Niya ang akong mga kahadlok, mga pagduhaduha, ug kalibog, ug sa milagrusong paagi giayo Niya ako.
Kon ikaw nakasinati og kahadlok o pang-abuso, hinumdomi nga ikaw gihigugma! Ikaw takos sa gugma ug pagkaayo. Palihog pagmapailubon sa imong kaugalingon, ang pagkaayo dili magsunod og pig-ot nga tamdanan sa panahon. Ug ayaw pag-antos nga mag-inusara! Kini mahinungdanon nga makakaplag og matinabangong mga indibidwal kang kinsa ikaw makasalig—kini sa tinuod naghimo og usa ka kalainan.
Ug labing importante, duol ngadto ni Kristo. Siya moluwas kanimo.