Ang Akong Pamilya Wala na Magtuo ni Kristo, apan Ako Nakakaplag Gihapon og Hingpit nga Kalipay diha sa Ebanghelyo

Midako ako nga Katoliko, ug ang akong mga ginikanan kanunay nga nagsimba ni Jesukristo. Apan sa pipila ka tuig nga milabay, ang akong amahan nakakita og daghang supak sa Kristiyano nga mga materyal. Wala madugay, ang akong mga ginikanan naminaw ngadto niini nga mga mensahe ug mihunong sa pagtuo Kaniya o sa bisan hain nga relihiyon.

Atol niana nga panahon, nahimo akong higala sa mga miyembro sa Ang Simbahan ni Jesukristo sa mga Santos sa Ulahing mga Adlaw. Gidapit nila ako ngadto sa mga kalihokan, ug kanunay akong naninguha sa pagtambong sa tanang higayon nga ako aduna.

Usa ka adlaw sa praktis og choir sa simbahan, mga pamphlet sa Alang sa Kalig-on sa mga Kabatan-onan gipanghatag, ug ang akong higala mihatag kanako og usa. Samtang nagbasa ako sa mensahe mahitungod sa paglig-on sa akong relasyon ngadto ni Jesukristo, mibati ako og dakong tinguha alang sa kamatuoran nga nagdilaab diha kanako.

Gusto kong makakat-on pa og daghan mahitungod Kaniya ug sa Iyang ebanghelyo. Gihatagan ako sa akong higala og Basahon ni Mormon ug gidapit ako sa pagpangutana sa Langitnong Amahan kon ang mga pagtulun-an niini tinuod ba, busa gidawat ko ang iyang pagdapit.

Sa dihang gibasa ko ang 2 Nephi 27:23, gibati ko ang hilabihan nga pagkahupay: “Kay tan-awa, Ako usa ka Dios; ug Ako usa ka Dios sa mga milagro; ug Akong ipakita sa kalibotan nga Ako mao ra gihapon sa kagahapon, karon, ug hangtod sa hangtod; ug ako walay buhaton sa mga anak sa katawhan gawas kon kini subay sa ilang pagtuo.”

Ang kasulatan mipakita kanako kon unsa lamang ka gamhanan ang pagbaton og hugot nga pagtuo ang mahimo diha ni Jesukristo. Gusto akong motuo og balik Kaniya. Sa paghuman ko sa basahon, gibati ko ang Espiritu nga nagpamatuod sa pagkatinuod nga si Jesukristo buhi ug nga ang Basahon ni Mormon tinuod. Nabunyagan ako dili dugay pagkahuman ug misugod sa pagpuyo og lahi kaayo kay sa akong pamilya.

Usahay, ingon nga mao lamang ang miyembro sa pamilya diha sa Simbahan naghimo sa mga butang nga malisod. Apan mapasalamaton ako nga ang Langitnong Amahan nagpanalangin kanako og mga matinud-anong mga higala, mga lider sa Simbahan, ug mga sakop sa ward kinsa mobayaw kanako kon ako mobati nga nag-inusara.

Sukad sa akong pagbunyag, ako mapasalamaton kaayo alang sa gasa sa Espiritu Santo ug sa tinuod mibati nga ang Manluluwas uban kanako.

Si Elder Takashi Wada sa Seventy bag-ohay nga mitudlo: “Sa dihang misulod kita sa pakigsaad sa bunyag ngadto sa Dios, kita misaad nga kita andam nga modala diha sa atong mga kaugalingon sa ngalan ni Jesukristo, mosunod sa mga sugo sa Dios, ug moserbisyo Kaniya sa nahibilin sa atong mga kinabuhi. Ang atong Langitnong Amahan, agi og bugti, misaad nato nga kita sa kanunay makabaton sa Iyang Espiritu uban kanato—ang nagpadayon nga giya gikan sa Espiritu Santo.”

Ang pagpuyo sa paagi nga magpabilin ang Espiritu uban kanako kanunay nga nagpahinumdom kanako nga ako wala mag-inusara sa akong panaw, bisan kon ako nagbarog nga nag-inusara diha sa akong pamilya.

Usahay mobati ako og kasubo mahitungod sa desisiyon sa akong mga ginikanan, apan pinaagi sa pag-ampo, gibati ko ang pasalig pag-usab nga adunay paglaom alang kanila nga pila ka adlaw motuo sa Manluluwas pag-usab.

Bag-ohay nakong nadawat ang akong pagtuga ug mihimo og mga pakigsaad uban sa Langitnong Amahan nga nakausab sa akong kinabuhi. Ako nakakat-on nga uban sa Iyang panabang, ang matag pagsulay ug hagit nga atong atubangon sa yuta makabaton og katuyoan ug makatabang kanato sa pagbati sa Iyang kalinaw ug hingpit nga kalipay. Kon bation ko ang pag-inusara diha sa akong pamilya, makaplagan ko ang akong kaugalingon nga mangita ni Jesukristo ug mabati ang pagpasalamat alang Kaniya ug sa Iyang ebanghelyo labaw kaysa kaniadto.

Si Presidente Russell M. Nelson mitudlo: “Ang ganti sa pagtuman sa mga pakigsaad sa Dios mao ang langitnong gahom—gahom nga mas makapalig-on nato sa pagpakigbatok sa atong mga pagsulay, mga tintasyon, ug mga kasakit.”

Ako nahibalo nga ang Langitnong Amahan ug si Jesukristo adunay mahinungdanong plano alang sa matag usa kanato, ug ang atong hingpit nga kalipay anaa taliwala niana nga plano (tan-awa sa 2 Nephi 2:25). Kon ikaw anaa sa susamang mga sitwasyon kanako, hibaloi nga ikaw wala mag-inusara. Sa matag panahon nga ikaw moduol sa Manluluwas ug mopili sa pagsunod sa imong mga pakigsaad, ang Iyang Espiritu anaa uban kanimo. Walay pagsapayan kon unsay pilion sa imong pamilya nga buhaton o dili buhaton, ikaw nailhan, nakita , ug gihigugma sa Dios.