Mga Pangutana ug mga Tubag
Unsaon Nako Paggbati og Balik ang Hingpit nga Kalipay atol sa mga Panahon sa Pag-antos?
Ang tagsulat nagpuyo sa Puerto Rico.
Ang Dios gusto kanato nga malipay, bisan kon kita nag-antos. Apan unsaon nato kana paghimo?
Sa dihang ako nakauli na gikan sa misyon, ako naglibog. Sa akong misyon, gibati ko ang paggiya sa Espiritu Santo, masaligon ako sa kamatuoran sa ebanghelyo, ug akong nakita ang daghan milagro. Apan ang yano nga kinabuhi … sa gihapon, yano. Ug kini sa kalit ingon og mas nagkalisod.
Kanunay akong nangutana sa Dios, “Ngano? Nganong ang kinabuhi hilabihan sa kalahi karon?”
Nag-institute ako ug nagtambong og miting sa sakramento, apan wala lamang gyud nako mabati ang Espiritu ingon sa kanunay nga ako didto sa misyon. Niana akong nahinumdoman ang usa ka hugpong sa mga pulong nga gisulti sa akong presidente sa misyon sa mga misyonaryo hapit sa matag komperensiya:
“Sa kinabuhi, kita makapaningkamot sa pag-antos uban sa hingpit nga kalipay.”
Sa una nakong pagkadungog niini, wala ako makasabot. Apan diha niana nga higayon sa paghinumdom, kalit akong nasabtan. Ang Langitnong Amahan buot kanato nga makakaplag og mahangturong hingpit nga kalipay—bisan kon kita anaa sa panahon sa pag-antos sa kinabuhi.
Human sa pagsinati og mga kalisod sa akong kinabuhi, nakakat-on ako og pipila ka mga paagi nga ang Langitnong Amahan nagtabang kanato nga mobati og hingpit nga kalipay, walay pagsapayan kon unsay nagpanghitabo sa atong mga kinabuhi.
Pagtinguha og Inadlaw nga Pagpahiuli
Daghang katuigan human niini nga pagkaamgo, ang akong espiritwalidad nahuyang sa dihang nasinati nako ang usa ka wala damha nga hagit. Misugod ako sa pagkahisalaag gikan sa dalan sa pakigsaad ug nawad-an sa hingpit nga kalipay nga akong gibati. Human sa daghang bulan, ako nahibalo nga kinahanglan akong mobalik, busa mihukom ako sa pagtan-aw sa kinatibuk-ang komperensiya.
Si Elder Dieter F. Uchtdorf sa Korum sa Napulog Duha ka Apostoles namulong mahitungod sa yano, inadlaw nga mga nabatasan nga nagtabang kanato sa pagpabilin nga magsunod sa Dios: “Kita mahimong maglawig latas diha sa kangitngit ug mga pagsulay niini nga kinabuhi ug makakaplag sa atong dalan balik ngadto sa atong mahigugmaong Langitnong Amahan kon kita magtinguha ug modawat sa espirituhanon nga mga timailhan nga Iyang gihatag, mohangop sa personal nga pagpadayag, ug maningkamot alang sa inadlaw nga pagpahiuli.”
Akong naamgohan nga kini mao diin ako gikinahanglang magsugod sa pagbati og balik sa akong hingpit nga kalipay.
Ang Dios nakahatag kanato sa tanang himan nga atong gikinahanglan sa pagpangita og hingpit nga kalipay niini nga kinabuhi, bisan taliwala sa mga pagsulay. Kon atong mahinumdoman ang yano nga mga lihok nga nagdala sa inadlaw nga pagpahiuli, sama sa pag-ampo ug pagtuon sa kasulatan, kita nag-abli sa atong mga kasingkasing ngadto sa Dios ug ang atong mga pakigbisog ingon og mas gamay kaayo. Bation nato nga mas lig-on ug mas malipayon, walay pagsapayan sa atong mga kahimtang.
Hinumdomi ang Imong mga Pakigsaad
Pinaagi sa paghinulsol ug sa pagsalig diha sa Pag-ula sa Manluluwas, mibalik ako ngadto sa dalan sa pakigsaad. Samtang misugod ako sa pagpangandam nga mahimong temple worker, akong naamgohan ang laing importante nga paagi ang Ginoo mihimo kanato sa pagbaton og hingpit nga kaklipay diha sa atong pag-antos: mga pakigsaad.
Si Elder Yoon Hwan Choi sa Seventy bag-ohay nga nangutana, “Gusto ba kamo nga magmalipayon?” Agi og tubag, gikutlo niya si Presidente Russell M. Nelson, kinsa miingon: “Kon gusto ka nga mahimong miserable, ayaw sunda ang mga sugo—ug ayaw gayod paghinulsol. Kon gusto ka og hingpit nga kalipay, pabilin diha sa dalan sa pakigsaad.”
Naghinumdom sa akong mga pakigsaad uban sa Langitnong Amahan ug ni Jesukristo midala kanako og hingpit nga kalipay sa dihang ang akong hugot nga pagtuo gihagit, sa dihang ang akong mga minahal nga mga tawo nag-atubang og ka kabus, ug sa dihang giatubang nako ang oposisyon sa akong misyon. Ug karon, ang paghupot sa akong mga pakigsaad uban Kanila nagdala kanako og hingpit nga kalipay walay pagsapayan kon unsay akong giatubang.
Walay pagsapayan unsa ang dagan sa kinabuhi ug walay pagsapayan kon unsa ka lig-on mahimo ang mga pakigbisog sa kinabuhi, ikaw makakita og mga milagro kon ikaw magpabilin diha sa dalan sa pakigsaad sa Dios.
Paminaw ngadto sa Musika sa Ebanghelyo
Ang musika nagtabang kanako sa paghinumdom sa mga leksiyon sa hingpit nga kalipay nga akong nakat-onan sa akong tibuok nga kinabuhi.
Sa gamay pa ako, nahinumdom ako nga naminaw ngadto sa panapos nga himno sa miting sa sakramento. Human sa pag-ampo, milingkod ako diha sa piyano sa unang higayon ug gitugtog ang tono. Kini ingon og ako kanunay ang nagtutog niini. Kini nga kasinatian mahimong ikatandi ngadto sa unsaon nga kita makakat-on sa pag-antos uban ang hingpit nga kalipay.
Ang dalan sa pakigsaad usa ka matang sama niana nga piyano. Sa makasugod kita sa pagtugtog niini, ang tuno—ang hingpit nga kalipay sa ebanghelyo—moabot kanato ingon og kita kanunay nga nakahibalo niini. Samtang kita magpadayon sa pagbansay, ang tuno mas sayon tugtugon. Sa ingon usab, samtang kita nag-apil sa yanong inadlaw nga mga lihok nga nagtabang kanato sa pagbati sa Espiritu, sama sa pag-ampo ug pagtuon sa kasulatan, ang hingpit nga kalipay sa ebanghelyo mahimong mas sayon nga pangitaon. Kon ang pag-antos moabut kanato, makakaplag gihapon kita sa malipayong tuno, kutob nga kita magpadayon sa pagtugtog ug magpadayon sa pagbansay.
Sa panahon nga siya usa ka sakop sa Seventy, si Elder Wilford W. Andersen mitudlo: “ Kon kamo wala makadungog sa musika sa ebanghelyo … , palihog hinumdomi kining duha ka pulong: padayon pagpraktis. Uban sa tabang sa Dios, ang adlaw moabut nga ang musika sa ebanghelyo mopuno sa inyong panimalay sa dili matukib nga hingpit nga kalipay.”
Ang Gugma sa Dios Mosapnay Kanimo
Kon akong hinumdoman karon ang mga pulong sa akong presidente sa misyon nga “pag-antos uban sa hingpit nga kalipay,” ako mahibalo kon asa magsugod. Maghunahuna ako sa mga paagi nga gipakita sa Dios kanako kon unsaon sa pagkaplag og hingpit nga kalipay atol niining milabay nga mga hagit. Ang Langitnong Amahan nakahatag kanato og daghang gasa ug mga panalangin nga makapahinumdom kanato sa Iyang gugma ug sa hingpit nga kalipay nga posible pinaagi ni Jesukristo.
Ang ilang gugma mosapnay kanato ug motabang kanato nga magmalipayon—diha sa atong maayo nga mga panahon ug diha sa atong pag-antos.