Digital Lamang

Ang Kaputli Labaw pa kay sa Sekswal nga Kalimpyo

Ni Anthony Sweat

Propesor sa Kasaysayan sa Simbahan ug sa Doktrina, Brigham Young University

Ania ang pipila ka rason alang sa kaputli nga may kalabotan ngadto sa espirituhanong katuyoan sa kinabuhi.

Sa makausa nangutana ko sa usa ka klase sa mga tin-edyer nga Santos sa Ulahing mga Adlaw nganong sila kinahanglan nga motuman sa balaod sa kaputli, diin ang mga propeta mihulagway isip:

“Ang pagpugong gikan sa sekswal nga mga relasyon gawas sa legal nga kaminyoon tali sa usa ka lalaki ug usa ka babaye.
“Kamaunongon sulod sa kaminyoon.”

Usa ka estudyante miingon nga kini ang makapalikay sa mga sakit. Ang uban miingon nga aron dili mamabdos nga walay kaminyoon. Miingon ko nga kadto mga maalamon , malantip nga mga tubag. “Apan kon pananglitan dili ka mamabdos o makakuha og sakit,” mitubag ko. “Nganong kinahanglan pa man ka mahimong putli?” Sa kalit lang, ang kahilom mipuno sa kahanginan. Ang klase walay nahatag nga mga rason lapas sa unsay ilang nakat-onan diha sa mga klase sa panglawas—walay espirituhanong mga rason.

Gusto kong mohatag og pipila ka rason alang sa sekswal nga kaputli nga may kalabotan ngadto sa espirituhanong katuyoan sa kinabuhi, nga mao ang mas mahisama sa Dios.

Kinaiya sa Dios

Ang kinabuhing dayon mao ang pagpakabuhi sama sa kinabuhi sa Dios, ug ang mamugnaon nga kinabuhi sa Dios nakasentro sa Iyang pamilya. Isip atong Langitnong Amahan, Siya makanunayon sa Iyang kinaiya ug dili mag-usab-usab sa Iyang katuyoan. Ang Dios matarong nga naggamit sa Iyang gahom, sa walay paghinakog, mahigugmaon, ug uban sa pailob, o matarong nga pagpugong sa kaugalingon.

Kini nga balaan nga mga kinaiya mao ang kabahin sa unsay makapahimo sa Dios aron makalalang ug makapatunhay sa usa ka mahangtoron nga pamilya ug mohimo nga kitang Iyang mga anak hingpit nga mosalig Kaniya. Hunahunaa sa makadiyot kon ang Dios walay pagpugong, dili makanunayon sa Iyang kinaiya, usab-usab ang Iyang pamatasan, ug dili makapugong sa Iyang gahom apan hinoon hakog nga mogamit niini ug walay pagpugong. Makahunahuna ba kamo nga maningkamot sa pagbaton og hugot nga pagtuod diha sa usa ka imoral nga Dios?

Nganong Kaputli?

Mahimong maghunahuna kamo, “Unsa kaha ang kalabotan niini sa balaod sa kaputli?” Tanan! Kini tungod kay ang balaod sa Kaputli labaw pa sa Sekswal nga Kalimpyo. Ang balaod sa kaputli mahitungod sa pag-angkon og pagsalig; kini mahitungod sa matarong nga paggamit sa gahom; kini mahitungod sa dili hakog nga pagkamaunongon; kini mahitungod sa paglalang; kini mahitungod sa pamilya sa pakigsaad.

Bisan ang natural nga tinguha sa tawo sa paghimo og mga bata, pagporma og mga pamilya, ug mahimong suod sa usa ka kapikas usa ka hinatag sa langit, kana nga balaan nga tinguha mahimong mabulingan kon kini dili pugngan, mapasigarbohon, modominar, momanipular, bastos, o hakog.

Ang gahom sa paglalang og kinabuhi maoy usa sa labing mahimayaong mga gahom nga gihatag sa Dios ngadto sa Iyang mga anak dinhi sa yuta. Ang putli nga mga tawo nasayod kon unsaon sa pag-amuma alang niana nga hilabihan nga gahom ug gamiton kini sa tukmang paagi.

Bisan og ang pipila ka modernong katilingban dili ganahan niini kon adunay mga utlanan mahitungod sa sekswalidad sa tawo, sila nakalimot nga ang gahom nga walay kinutoban mao ang pundasyon sa kahiwian ug kasamok. Hinumdomi, bisan ang Dios adunay mga utlanan nga Siya dili molapas o Siya “mohunong sa pagka-Dios” (Alma 42:22, 25).

Samtang kita makat-on sa tukmang paagi sa pagkotrolar sa gahom ug mosunod sulod sa mga utlanan sa pakigsaad, kita makakat-on sa mga kinaiya nga makatabang kanato aron mas mahisama sa Dios.

Busa, gawas sa mga pagmabdos nga wala sa kagustohan ug sa mga sakit, nganong kinahanglan kita nga motuman sa balaod sa kaputli? Kita nagkinahanglang makakita nga ang pakigsaad sa kaputli dili lang basta mahitungod sa mga buhaton ug dili mga buhaton sa mga sekswal nga mga relasyon—kini mahitungod sa pagkat-on aron palamboon ang usa ka kinaiya nga mahimong masaligan, mogamit og pagpugong, motahod sa mga utlanan, dili hakog nga moabuso sa gahom, ug makamugna ug makapatunhay og usa ka pamilya sa pakigsaad, sama lang sa Dios. Kini mahitungod sa paghigugma sama sa Iyang paghigugma, paglalang sama sa Iyang mga paglalang, ug sa pagbati og kalipay sama sa Iyang mga gibati.