Mga Young Adult
Pagsinati sa “Kahingpitan sa Kalipay” nga Gisaad sa Dios Kanato
Ang pagsunod ba gayod sa ebanghelyo makapahimo nato nga mas malipayon?
Ang ebanghelyo nagtanyag nato og talagsaong panglantaw sa pagpangita og kalipay. Ang pagbaton og personal nga mga relasyon ngadto sa Dios ug ni Jesukristo makapalawom sa atong pagsabot sa unsay tinuod nga kalipay ug sa unsay ipasabot nga magmalipayon.
Apan alang nako, ang kalibotanon nga kalipay ug ang malungtarong hingpit nga kalipay duha ka managlahi nga mga butang.
Ang kalibotanon nga kalipay gibase sa temporaryo nga kalipay ug sa kamaya ug naimpluwensiyahan sa atong kasamtangan nga mga sirkumstansiya. Makapahimo kini og lunsay nga kahimuot o makahimo nato sa pagkatawa og kusog. Pero, kining matanga sa kalipay mubo lang ug lisod magpadayon.
Samtang, ang hingpit nga kalipay nga nakasentro ni Kristo usa ka taas og tagal nga kahimtang sa pagkakontento ug kalinaw nga wala gibase sa atong mga sirkumstansiya. Ang hingpit nga kalipay mamulong ngadto sa kasingkasing ug kalag ug mahimong molungtad og mas dugay kay sa kalibotanon nga kalipay.
Ang pagtandi niining duha ka pagbati nakapahunahuna nako mahitungod sa akong kaugalingong mga kasinatian ug kon sa unsang paagi ang ebanghelyo ni Jesukristo makahatag og mas lawom, mas maluntarong hingpit nga kalipay ngadto sa atong mga kinabuhi
Pinaagi sa pagsunod sa Manluluwas, pagtuman sa Iyang mga sugo, ug pagpabilin diha sa dalan sa pakigsaad, giablihan nato ang mas dakong kapasidad alang sa tiunay nga hingpit nga kalipay. Importante nga masabtan nga samtang ang kalibotanon nga kalipay sa kasagaran usa ka resulta sa mga impluwensya sa gawas, ang hingpit nga kalipay mahimong usa ka tiunay, kahimtang sa sulod sa kasingkasing nga mahimong masinati bisan taliwala sa mga pagsulay.
Ang Mubo nga mga Kalipay sa Kalibotan batok sa Malungtarong Hingpit nga Kalipay sa Ebanghelyo
Malipayon ako bisan sa wala pa ako makahibalo mahitungod sa ebanghelyo. Duna koy nindot nga kinabuhi, kauban sa mga ginikanan kinsa kanunay nga mao ang labing maayo nga mga ehemplo nga akong nahibaloan sa kamabination, walay kahakog, ug gugma. Nagtuo ko nga ang mga tawo mahimong malipayon nga wala ang ebanghelyo sa ilang mga kinabuhi.
Pero, sukad nga mipasakop sa Simbahan sa edad nga 18, nakat-onan nako nga ang ebanghelyo mopalapad sa atong kapasidad sa pagsinati og malungtarong hingpit nga kalipay. Ang atong kahibalo sa ebanghelyo nga nagtugot nato nga mobati og hingpit nga kalipay lapas sa bisan unsa nga ikatanyag sa kalibotan.
Samtang ang kalibotan nagtanyag og kalipay pinaagi sa temporaryo nga mga kalipay, ang ebanghelyo nagdapit nato sa pag-ambit sa usa ka hingpit nga kalipay nga molabaw sa tanang sirkumstansiya. Si Elder Dieter F. Uchtdorf sa Korum sa Napulog Duha ka Apostoles mitudlo: “Ang kalibotanong kalipay, … dili mohangtod. Dili. Kinaiyahan lang sa tanang yutan-ong mga butang ang pagkatigulang, pagkadunot, pagkaguba, o pagkabahaw. Apan ang diosnong kalipay mahangtoron, tungod kay ang Dios mahangtoron.”
Sa milabay nga pipila ka tuig, ako adunay mahagiton kaayo nga mga panahon sa dihang naglisod ko nga mobati nga malipayon. Bisan sa mga kalisod, ang ginagmay nga mga pagbati sa kalipay nga akong gibati sa mga gutlo sa pag-ampo, personal nga pagtuon, ug pagserbisyo sa uban tiunay. Akong nakaplagan nga ang akong hingpit nga kalipay wala makita pinaagi sa dagko, klaro nga mga emosyon, hinuon, sa kasagaran pinaagi kini sa lawom, malahutayon nga pagbati sa kalinaw ug katumanan sa akong kasingkasing.
Sa panahon niining mga gutloa, tinud-anay akong nakasabot kon unsay gipasabot sa pagsinati sa hingpit nga kalipay nga gisaad sa atong Manluluwas.
Ang tinuod, malungtarong hingpit nga kalipay moabot gikan sa pagsubay sa atong mga kinabuhi sa plano sa Dios. Sama sa gipamatuod ni Presidente Thomas S. Monson (1927–2018): “Ang mahinungdanong bahin sa plano mao ang atong Manluluwas, si Jesukristo. Kon wala ang Iyang maulaong sakripisyo, ang tanan mawala.” Samtang ang kalipay nga gitanyag sa kalibotan sa kasagaran magagikan sa sirkumstansiya sa gawas, ang kalipay o hingpit nga kalipay nga gitanyag sa Ginoo usa ka mahangtoron nga kahimtang nga moabot gikan sa pagpuyo og kinabuhi nga nakasentro ni Kristo.
Ang Malahutayong Hingpit nga Kalipay nga Atong Mapalgan diha ni Kristo
Ang hingpit nga kalipay sa ebanghelyo makatakod. Makapausab kini dili lamang sa atong kaugalingon nga mga kinabuhi apan usab sa mga kinabuhi niadtong naglibot kanato. Ang saad sa walay kataposan nga hingpit nga kalipay mao ang sentro sa mensahe sa ebanghelyo. Sa 3 Nephi 28:10, gisaaran kita og usa ka “kahingpitan sa kalipay” diha sa presensiya sa Amahan ug sa Anak.
Kining mahangtorong kalipay nagagikan sa pagtuman sa atong balaanong katuyoan ug pagkahimong sama sa Dios. Usa kini ka hingpit nga kalipay nga molabaw sa atong yutan-ong mga kasinatian, nagsaad og umaabot nga mahangtorong kalipay kauban sa atong mga minahal.
Ang tanan makasinati og mga positibo ug negatibo nga mga kasinatian, apan ang ebanghelyo ni Jesukristo naghatag og dalan ngadto sa walay kataposan nga kalipay. Pinaagi sa pagtinguha sa pagsunod sa Manluluwas ug pagpuyo sumala sa Iyang mga pagtulun-an, makasinati kita og hingpit nga kalipay nga tiunay, malungtaron, ug makapausab.
Sama sa gisulti ni Presidente Russell M. Nelson, “Ang kalipay nga atong gibati dili kaayo konektado sa mga sirkumstansiya sa atong kinabuhi apan konektado kaayo sa gitutokan sa atong kinabuhi.”
Ang saad sa walay kataposan nga kalipay dili lamang usa ka layo pa nga paglaom. Usa kini ka reyalidad karon nga atong masinati dinhi ug karon. Pinaagi sa pagsunod sa ebanghelyo, mausab nato ang mubo nga mga gutlo sa kalipay ngadto sa malungtarong kalipay. Mao nga tinguhaa ang kalipay ug pangitaa ang hingpit nga kalipay. Dawata ang ebanghelyo. Tugoti nga ang saad sa walay kataposan nga kalipay mogiya sa inyong dalan. Ang walay kataposan nga hingpit nga kalipay nagagikan sa presensiya sa Dios sa atong mga kinabuhi.
Samtang ang kalibotanon nga kalipay moabot ug mawala, ang hingpit nga kalipay nga atong mapalgan diha ni Kristo mahangtoron!
Ang tagsulat nagpuyo sa Glasgow, Scotland.
Mubo nga mga Sulat