Mga Young Adult
Usa ka Yanong Tubag sa Pagbati nga Kawalay Paglaom sa Naguba sa Gubat nga Kalibotan
Mibati ko nga wala nay mahimo mahitungod sa tanang kasungian sa kalibotan. Dayon nakakuha ko og wala dahomang tubag gikan sa Langitnong Amahan.
Kanunay akong mibati og kalinaw gikan sa pagsunod sa ebanghelyo ni Jesukristo, bisan og wala ako napalibotan sa daghang mga miyembro sa Simbahan.
Kanunay akong mohimo sa paglantaw sa ebanghelyo alang sa direksiyon kon mobati nga nabug-atan. Akong mahunahuna ang daghan kaayong higayon dihang ang Langitnong Amahan mitudlo kanako ngadto sa paglaom ug kalinaw taliwala sa mga hagit.
Apan, sa bag-o lang mibati ako nga ang akong pagsalig sa kalinaw sa Dios nga mihuyang sa dihang usa ka makalilisang nga gubat nahitabo sa nasod diin nagpuyo ang labing suod nakong higala. Mibati ko og kawala nay mahimo. Grabeng kapungot nga sukad wala pa nako masinati ang mipuno sa sulod kanako. Wala ko kahibalo kon unsay akong mahimo aron sa pagtabang sa akong higala o sa ubang tawo nga naapektohan niini nga kabangis ug kapungot. Ang tibuok kalibotan mingitngit, ug nakatutok ko sa daotan nga mipakatap og kasamok sa daghan kaayong mga dapit.
Unsaon nako sa pagbati og kalinaw nasayod nga daghan kaayong mga tawo, lakip ang labing suod nakong higala, ang nag-antos?
Usa ka Yano nga Pag-aghat
Akong naamgohan nga ang kapungot nga akong gibati nagsugod sa paglamoy kanako. Kinahanglan ko nga mangita og kalinaw pag-usab. Mao nga miduol ko sa Langitnong Amahan sama sa kanunay nakong gihimo kaniadto. Gibubo nako ang akong kasingkasing sa pag-ampo ug gisultihan Siya nga nawad-an ko sa paglaom tungod kay anaa ang padayon nga sobrang kabangis sa kalibotan. Gipangutana nako Siya kon dunay bay butang nga akong mahimo aron makakaplag na usab og kalinaw.
Nakadawat ko og yano nga pag-aghat gikan sa Espiritu:
Basaha ang Basahon ni Mormon.
Nagbasa na ko kanunay sa akong mga kasulatan, mao nga dili ko segurado kon nganong gisultihan ko sa Langitnong Amahan sa paghimo og butang nga akoa nang gibuhat. Apan mihukom ko nga mosalig sa pag-aghat. Nagsugod ko sa pagsabot og maayo sa unsay akong gibasa diha sa Basahon ni Mormon. Akong nabantayan kon pila ka higayon ang mga sumusunod ni Jesukristo nagsagubang og kabangis, mga gubat, ug kadaotan ug mibati nga wala nay mahimo batok sa ilang mga hagit. Apan nakabantay usab ako nga dihang gisentro nila ang ilang kinabuhi ngadto kang Jesukristo atol niadtong samok nga mga panahon, ingon og gibati nila ang kalinaw—bisan unsa pa man ang nahitabo. (Tan-awa sa 2 Nephi 4:16–35; Mosiah 24:8–25.) Kini nga senaryo balikbalik nga nahitabo sa Basahon ni Mormon. Ang mga saad sa pagkaplag og kalinaw diha kang Kristo anaa sa bisan asa.
Si propeta Ether mitudlo: “Mao nga, kinsa kadtong motuo sa Dios uban sa kasegurohan makalaom og mas maayo nga kalibotan, oo, gani sa usa ka luna diha sa tuo nga kamot sa Dios, diin kana nga paglaom moabot pinaagi sa hugot nga pagtuo, naghimo og usa ka angkla ngadto sa mga kalag sa mga tawo, nga makahimo kanila nga lig-on ug makanunayon, sa kanunay puno sa maayong mga buhat, gigiyahan ngadto sa paghimaya sa Dios” (Ether 12:4).
Sa akong pagbasa sa mga kamatuoran sama niini atol sa akong pagtuon, nagsugod na usab ako nga mobati sa kalinaw ni Kristo. Ug akong nasabtan nga ang Iyang kalinaw kanunay nga matagamtam sa tanan kinsa magtinguha niini, bisan niadtong nagpakabuhi taliwala sa mga gubat ug sa mga panagsungi.
Pagtutok Kaniya
Ang mga kagubot sa kalibotan maghimong lisod aron magpabiling nakatutok kang Jesukristo. Mobati gihapon ko og kawala nay mahimo ug pagkapakyas. Apan bisan niini, kanunay kong mobati og tinuod nga kalinaw kon huptan nako ang akong mga pakigsaad ug ipaling ang akong pagtutok ngadto Kaniya. Alang nako, ang pagtutok Kaniya nagpasabot sa paglitok og usa ka pag-ampo sa dili pa mokab-ot sa akong phone inig ka buntag, mogahin og panahon sa mga kasulatan matag adlaw, ug magbag-o sa akong mga pakigsaad pinaagi sa pag-ambit sa sakramento matag semana.
Kon mogahin ko og panahon alang sa akong Manluluwas, akong makita nga Siya ug ang Langitnong Amahan kanunay nga motabang nako ngadto sa maayo, sa daotan, ug gani sa ngil-ad nga mga bahin sa kinabuhi.
Si Elder Ulisses Soares sa Korum sa Napulog Duha ka Apostoles mipamatuod: “Isip mga sumusunod [ni Jesukristo], kita Iyang pinili nga katawhan, gitawag sa pagsangyaw sa Iyang mga hiyas, mga tigpasiugda og kalinaw nga madagayaong gitanyag pinaagi Kaniya ug sa Iyang maulaong sakripisyo. Kini nga kalinaw usa ka gasa nga gisaad ngadto sa tanan nga motugyan sa ilang mga kasingkasing ngadto sa Manluluwas ug magpuyo sa katarong; kana nga kalinaw maghatag nato og kalig-on sa pagtagamtam sa mortal nga kinabuhi ug makapahimo nato sa paglahutay sa sakit nga mga pagsulay sa atong panaw.”
Si Jesukristo mao “ang kahayag ug ang kinabuhi sa kalibotan” (3 Nephi 11:11). Nasayod ko nga labing tinuod kini karon kay sa kaniadto niining gubot nga kalibotan. Mobati man kita og kahadlok, walay mahimo, o dili segurado, makadala Siya kanato og kahayag, bisan unsa man ang atong kahimtang.
Ang Iyang kalinaw mowagtang sa kahadlok ug kapungot sa akong kasingkasing—matag higayon nga ako moduol Kaniya.
Ang tagsulat nagpuyo sa New Jersey, USA.