Kumtafuta Kristo na Maagano: Funguo za Nefi za Kusoma Agano la Kale

Musa na Nyoka wa Shaba, na Judith A. Mehr; Kristo juu ya Msalaba, na Carl Heinrich Bloch

Mungu wa Agano la Kale

Kwa sababu tunajua kupitia ufunuo wa sasa kwamba Yesu Kristo ni Mungu wa Agano la Kale (ona Mafundisho na Maagano 110:3–4), tunaweza kuona nguvu Zake katika Uumbaji na kama Mtoa Sheria juu ya Mlima Sinai akifundisha Israeli jinsi ya kuwa kama Mungu. Tunajifunza kuhusu neema Yake katika ukombozi kutoka utumwani huko Misri, upendo Wake katika kuwajali watu Wake nyikani na kuwaleta hadi nchi ya ahadi, na kuendelea kushughulika Kwake kwa kuwatuma manabii na kutoa msamaha kwa Israeli kadiri walivyo tubu dhambi zao.

Kuna aina nyingi (au mawakilisho) ya Yesu Kristo katika hadithi za Agano la Kale, nyingi zinaonyesha ishara ya ujio Wake ujao kama ilivyoandikwa katika Agano Jipya na Kitabu cha Mormoni. Hadithi ya Ibrahimu na Isaka inaonyesha ishara za Mungu Baba akimtoa dhabihu Mwanawe, Yesu Kristo. Yusufu aliwaokoa ndugu zake kutokana na njaa ya kimwili, kama vile Yesu Kristo anavyotuokoa kutokana na njaa ya kiroho. Musa aliwaweka huru watu wake kutoka utumwani kama vile Yesu anavyotuweka sisi huru kutokana na dhambi. Bwana aliwafundisha wana wa Israeli nguvu ya imani katika Yeye na Upatanisho Wake katika hadithi ya nyoka wa shaba nyikani. Eliya na Elisha walitoa mfano wa Mwokozi walipowaponya wagonjwa na kuwafufua wafu.

Ibrahimu na Isaka, na Harold Copping, © Look and Learn/Bridgeman Images

Yesu Kristo kiishara yuko katika hadithi za Agano la Kale na sheria ya Musa. Hadithi za Pasaka na dhabihu katika sheria ya Musa zinamwonyesha Kristo. Zikionyesha ishara za misheni ya Yesu, manabii katika Agano la Kale waliwaponya wagonjwa na kuwafufua wafu. Kupitia nabii Yeremia, Bwana alituahidi “agano jipya” (Yeremia 31:31; ona pia mstari wa 32).

Katika Agano Jipya, Yesu anakuja kama utimilifu wa sheria na manabii katika Agano la Kale. Yeye alileta agano jipya katika Mahubiri ya Mlimani na kuweka ishara za agano wakati wa mlo wa Pasaka katika Karamu ya Mwisho. Yesu alitufundisha kupendana na kutumikiana wakati alipowaponya wagonjwa na kuwafufua wafu. Yeye alitukomboa kutokana na dhambi na kifo kupitia Upatanisho Wake, na Yeye alianzisha Kanisa Lake duniani. Tunapomtambua Yesu kama Mungu wa Agano la Kale, tunaweza kumwelewa Yeye vyema zaidi katika Agano Jipya.

Agano la Ibrahimu lilikuwa mfululizo wa ahadi na baraka alizopewa Ibrahimu ambazo zinaendelea hadi leo katika “agano jipya na lisilo na mwisho” lililorejeshwa na Nabii Joseph Smith (ona Mafundisho na Maagano 132:30–31). Rais Nelson alifundisha:

“Bwana alitokea katika siku hizi za mwisho ili kufanya upya agano lile la Ibrahimu. Kwa Nabii Joseph Smith, Bwana alitamka:

“‘Ibrahimu alipokea ahadi juu ya uzao wake, na juu ya tunda la viuno vyake—ambako katika viuno vyake ninyi mmetoka, … mtumishi wangu Joseph. …

“‘Ahadi hii ni yenu pia, kwa sababu ninyi ni wa Ibrahimu’ [Mafundisho na Maagano 132:30–31].”

Kupitia agano hili, Bwana aliunda familia ya haki ambayo angeweza kufundisha injili Yake na kuwaleta watoto Wake kwa Yesu Kristo. Mtume Paulo alitufundisha kwamba kama tutakuja kwa Kristo, tunakuwa sehemu ya familia ya Ibrahimu: “Mkiwa wa Kristo, basi ninyi ni uzao wa Ibrahimu, na warithi kulingana na ahadi” (Wagalatia 3:29; ona pia mstari wa 27). Kupitia agano la Ibrahimu, waumini wa Kanisa la Yesu Kristo la Watakatifu wa Siku za Mwisho wanakuwa nyumba ya Israeli na warithi kwa baraka za agano la Ibrahimu.

Tunaweza kujifunza kuhusu jukumu letu katika agano kwa kuchunguza maisha ya wale walio katika Agano la Kale, kwa kujifunza ahadi zilizofanywa na Bwana kwa watoto Wake katika amri, na kwa kuwasikiliza manabii wa kale ambao waliwasihi wana wa Israeli watubu na kutii maagano yao.

Tunaposoma Agano la Kale, tunaweza kutafuta dalili za Bwana akithibitisha ahadi zilizofanywa katika agano la Ibrahimu. Baraka tatu maarufu zaidi ni nchi, ambayo inaashiria urithi katika ufalme wa Baba wa Mbinguni; uzao, ambao ni ahadi ya ongezeko la milele; na baraka za injili na ukuhani, “ambazo ni baraka za wokovu, hata za uzima wa milele” (Ibrahimu 2:11).

Ibrahimu aliahidiwa kwamba kupitia uzao wake “familia zote za dunia zitabarikiwa” (Mwanzo 12:3). Hii ilimaanisha kwamba Yesu Kristo angekuja ulimwenguni kupitia ukoo wa Ibrahimu na kubariki mataifa yote ya dunia kupitia Upatanisho na Ufufuko Wake (ona Wagalatia 3:16).

Maelezo kutoka Gethsemane, na J. Kirk Richards, isinakiliwe

Ni baraka gani unazoziona katika maisha yako kwa sababu ya agano la Ibrahimu?

Pamoja na baraka, kuwa sehemu ya agano la Ibrahimu inajumuisha majukumu fulani. Kupitia kujifunza Agano la Kale, tunajifunza jinsi ya kuishi kulingana na maagano yetu. Kama familia ya Ibrahimu, waumini wa Kanisa wanaitwa kukusanya Israeli. Tunaposhiriki katika kazi ya umisionari, utumishi, kazi ya hekaluni, miito ya Kanisa, na kufundisha na kulea familia zetu, tunakusanya Israeli kwa kuwaleta wengine karibu zaidi na Kristo.

Rais Nelson alifundisha, “Wakati wo wote unapofanya kitu cho chote kinachomsaidia mtu ye yote—upande wo wote wa pazia—kupiga hatua kuelekea kufanya maagano na Mungu na kupokea ibada zao muhimu za ubatizo na za hekaluni, unasaidia kukusanya Israeli.”