Taufetuli Atu i le Ali‘i

Atonu o lagona foi ia o Nifae ina ua ia alaga, “Le Alii e, sei e siomia faataamilo a‘u i le ofu talaloa o lau amiotonu! Le Alii e, sei e faia se ala mo lo‘u sola ese mai luma o o‘u fili!” (2 Nifae 4:33.)

Aisea ua faia ai e Nifae lenei talosaga e ala atu i le tatalo? E tusa ai ma aganuu anamua, pe afai e solaese se tagata i ona fili i se nofoaga pogisa ma fou, e mafai ona toe foi atu i lona matai. E tuu atu e lona matai le pito o lona ofutalaloa i luga o ona tau‘au, o le faatusa o le ufiufiina lea o ia i le puipuiga. O lenei faatinoga e tuuina ai le tagata i lalo ifo o le tausiga tau i le puipuiga a le matai. Ona la feopoa‘i lea, e pei ona faia pea e matai Arapi i le taimi nei, e faailo ai le talitouina ma le aufaatasi atoatoa. Ona saunia lea e le matai se nofoaga mo ia ma valaaulia o ia e alala i lona autafa—ma ua tasi nei i la‘ua.

I lea lava auala e tasi, e ufitia ai i tatou e le Alii i aao o Lona alofa mutimutivale.

O le upu Eperu “kafar” o lona uiga “ia ufitia.” O le ‘Kafar’ foi o lona uiga “togiola” “I le taimi o le sauniga amata (i totonu o le malumalu) … e faatonuina ai i tatou e ofu le ofusa o le malumalu. O le ofusa o se faatusa paia o Iesu Keriso. O se faamanatu foi o feagaiga o le malumalu. Pe a tausia e tagata a latou feagaiga, e aofia ai le avanoa paia e ofuina ai le ofusa e pei ona faatonuina ai, o le a sili atu ona faigofie ona latou mauaina le alofa mutimutivale, puipuiga, malosi, ma le mana o le Faaola.”

Ua tatou “tasi ma” le Faaola e ala i Lana Togiola. Ua tatou latalata atu ia te Ia e ala i le faia ma tausia o feagaiga tatou te faafouina i le laulau o le faamanatuga i vaiaso taitasi ma i le Maota o le Alii.

Mo le tele o tausaga, sa faamanuiaina ai le Ekalesia i le eria o le Pasefika i malumalu e sefulu ua faaaogaina. O le tausaga nei, i Aukilani, Niu Sila, na faapaiaina ai le lona sefulutasi. I le aluga o isi tausaga e sosoo ai, o le a faaluaina ai le aofai o malumalu i le eria o le Pasefika. E sefulutasi isi malumalu o le a faapaiaina, e amata i Pago Pago Samoa, Neiafu (Vavau) Tonga, Port Moresby Papua Niu Kini ma Port Vila, Vanuatu. O lo tatou mauaina o le mana “faaleatua” o Iesu Keriso e ala i sauniga o le malumalu ua faateleina.

E lima ni folafolaga ua tuuina mai e lo tatou perofeta soifua a o tatou taufetuli atu i le Alii i Lona Maota Paia.

“O lau folafolaga lenei. E leai se isi mea o le a sili atu ona fesoasoani ia te oe e pipiimau ai i le ai uamea nai lo le tapuai ai e le aunoa i le malumalu e pei ona faatagaina ai e ou avanoa. E leai se mea e sili atu ona puipuia oe a o e fetaia‘i ma puao pogisa o le lalolagi. E leai se mea e faamausali ai lau molimau i le Alii o Iesu Keriso ma Lana Togiola pe fesoasoani e te malamalama atili ai i le fuafuaga ofoofogia a le Atua. E leai se mea o le a sili atu ona faamāfanafanaina ai lou agaga i taimi o tiga. E leai se isi mea o le a sili atu ona tatalaina ai le lagi. Leai se mea!”

Pe a tatou filifili o ni tagata e tali atu i le valaaulia a le perofeta e faatino, o tatou moomooga e filifili le mea sa‘o ma manao e faataunuu le fuataga o lo tatou foafoaga e faateleina. E maua e a tatou fanau le puipuiga sili atu ma e ono avea, “tutumau ma le le mafaagaeetia” (Mosaea 5:15). O i latou, e pei o atalii o Helamana e ono mauaina le “tiga e tetee i le agasala,” e oo lava i le meaalofa faaleagaga o le maufetuunai.

Na aoao mai foi lo tatou perofeta:

“Uso e ma tuafafine, o le taimi lava lenei mo oe ma a‘u e saunia ai mo le Afio Mai Faalua o lo tatou Alii ma le Faaola, o Iesu le Keriso. O le taimi lava lenei mo i tatou ina ia avea ma a tatou faamuamua aupito silisili lo tatou avea ma soo. I se lalolagi ua faatumulia i mea faalavefau faaninivaulu, e mafai faapefea ona tatou faia lenei mea?

“O le tapuai soo i totonu o le malumalu o le a fesoasoani ia i tatou. I le maota o le Alii, tatou te taulai atu ia Iesu Keriso. Tatou te aoao ai e uiga ia te Ia. Tatou te osia feagaiga e mulimuli ia te Ia. E oo ina tatou iloa ai o Ia. A o tatou tausia a tatou feagaiga o le malumalu, tatou te maua atili ai le mana o le Alii e faamalolosia ai. I totonu o le malumalu, tatou te maua ai le puipuiga mai fesasaā‘iga a le lalolagi. Ua matuai tele naua le alofa mama o Iesu Keriso ma lo tatou Tama Faalelagi ua tatou maua! Tatou te lagonaina le filemu ma le faamautinoaga faaleagaga, e ese mai le galuā o le lalolagi.”