Faamaloloina i totonu o le Malumalu

O le sootaga i le va o le tapuai i le malumalu ma le faamalologa e i ai ona aa i tusitusiga paia. E tusa ai ma le faamatalaga a Mataio, ina ua asiasi atu le Faaola i le malumalu i Ierusalema, sa ia ta’ua le perofeta o Isaia, ma faamalamalama atu e faapea “e ta’ua lo’u fale o le fale tatalo.” Ona tatou faitau ai lea “ona o mai ai lea ia te ia i le malumalu o e tauaso ma e pipili, ua na faamalolo ia te i latou” (Mataio 21:13–14; tagai foi i le Isaia 56:7). I le Toefuataiga, o lenei mamanu o le mauaina o le faamalologa i le malumalu e mulimuli i le apoapoaiga a le Feagaiga Fou e faapea e tatau ona tatou “tatalo le tasi mo le tasi, ina ia faamaloloina outou” (Iakopo 5:16).

I le vaitaimi o paionia, e toatele tagata na auina atu ni tusi ma feau faauaealesi i malumalu, e talosaga atu ai ina ia manatuaina i latou i tatalo o le malumalu. O nisi sa malaga mamao e saili le faamalologa i totonu o malumalu, lea e mafai ai e tagata taitoatasi ona papatisoina i le faatanoa o le malumalu mo le faamalologa pe maua ai se faamanuiaga o le faamalologa mai isi Au Paia o e na valaauina e taitai iina. Ae ina ua amata ona faatinoina e le Au Paia o Aso e Gata Ai galuega o le malumalu mo o latou tuaa i se aofaiga tele atu, sa faamutaina e taitai o le Ekalesia le faiga masani o le o mai o le Au Paia i le malumalu mo faamanuiaga faamalolo. O faamanuiaga faaleperisitua e mafai ona faatautaia i soo se mea e i ai se tagata mafatia, ae o sauniga o le malumalu e tatau ona faatautaia i le maota o le Alii.

E ui lava i lenei suiga, o loo tumau pea malumalu o nofoaga o faamalologa. I le taimi nei, ua mafai e tagata o le Ekalesia ona auina mai igoa o tagata taitoatasi ina ia faaaofia i tatalo faalemalumalu. E mafai ona faia lenei mea e le tagata lava ia i le malumalu, i luga o le initoneti, po o le polokalama feaveai o le Meafaigaluega a Tagata o le Ekalesia.

O le galuega a Iesu Keriso i le Feagaiga Fou ma le Tusi a Mamona e iloga i le tausiga sa Ia faia e faamalolo ai e mama’i ma puapuagatia. Ua faamalamalama mai foi e le Tusi a Mamona o lenei faamalologa e oo atu i tagata uma. Sa puapuagatia le Faaola, maliu, ma toetu mai le oti ina ia mafai ona ia “silafia e tusa ai ma la le tino, le ala e fesoasoni ai i ona tagata, e tusa ai ma o latou vaivaiga” (Alema 7:12). Na valaaulia e Iesu Keriso tagata uma ina ia “salamo ia outou agasala, ma liua, ina ia Ou faamaloloina outou” (3 Nifae 9:13). O lenei faamalologa e mafai ona faaletino, ae e i ai foi o tatou mafatiaga faaleagaga ma faalelagona e mafai ona faamaloloina ia Keriso.

Mo se faataitaiga, i le taimi o se vaitaimi o faigata i le amataga o le Toefuataiga, sa faamanatu atu ai e Iesu Keriso i le Korama a Aposetolo e Toasefululua lo latou tofiga maoae ona fetalai mai lea o le a latou oo uma i faaosoosoga ma faigata. Sa Ia faamalamalama mai e faapea “afai latou te lē faamaaa o latou loto, ma lē faamalō o latou ua e faasaga mai ia te a’u, o le a liua mai i latou, ma o le a Ou faamaloloina i latou” (Mataupu Faavae ma Feagaiga 112:13), o loo fautua mai ai o le a faamaloloina e le Faaola o latou puapuaga faaleagaga.

I aso nei, a o osia ma tausia e tagata o le Ekalesia feagaiga paia, latou te tulimata’i atu i le “faapaiaina e le Agaga i le faafouina o o latou tino” (Mataupu Faavae ma Feagaiga 84:33; tagai foi i le 89:18). Peita’i, ua latou iloa fo’i e lē na o ma’i faaletino le ituaiga o mafatiaga e manaomia ona faamālōlōina. E oo le Au Paia o Aso e Gata Ai i le tele o mafatiaga faaletagata ma i totonu o malumalu e maua ai le faamalologa mo loto nutimomoia, sootaga malepelepe, ma e oo lava i faamoemoega malepelepe. E talia tagata uma e faalogo i le valaau a Iesu Keriso ina ia “o mai ia te a’u ma le faamoemoe atoa o le loto, ma o le a ou faamaloloina ai [outou]” (3 Nifae 18:32).

O faamalologa faavavega ua faamaumauina i olaga o le toatele o le Au Paia o Aso e Gata Ai. Mo se faataitaiga, ina ua uma ona faamanuiaina ma tatalo mo ia i se vaega o le Malumalu o Navu, sa vave ona manuia loa Vilate Kimball. Peita’i, e lē o tatalo uma e i’u ai i se laveaiga faavavega. Pe a oo ina laveai ma faamanuia i tatou e le Alii, o le faamalologa atonu e na o ni masina po o ni tausaga le umi. I le iuga, o o tatou olaga faaletino e iu i le oti. Ae ua ia i tatou le faamoemoe lenei: “pe a afio mai le Alii, ma o le a mavae atu ai mea tuai, ma faafouina ai mea uma,” o le a tatou “tutulai mai nai le oti ma o le a le feoti pe a mavae, ma o le a latou maua se tofi i luma o le Alii, i le aai paia” (Mataupu Faavae ma Feagaiga 63:49).

E tasi ma le afa tausaga talu ona tatalo mo ia i le sauniga o le malumalu i le 1843, ae maliu Jennetta Richards. E ui lava i lona faatuatua, ma le faatuatua lotogatasi o lona aiga ma lo latou nuu o le malumalu, ae ina ua te’a le 10:00 i le taeao o le aso 9 o Iulai, 1845, sa muta ai le manava a Jennetta. Ua faamalamalama mai e tusitusiga paia e faapea, e tusa lava pe i ai le faatuatua ina ia faamaloloina, e na o le pau le taimi e oo mai ai le faamalologa pe afai o le tagata “ua le tofia e oti” (Mataupu Faavae ma Feagaiga 42:48). E pei o Iosefa Samita, o lē na fasiotia i le taumafanafana o le 1844, e lei ola Jennetta e vaai i le faamae’aina o le malumalu. Ae peitai, sa fesoasoani o ia e faataatia le faavae o le tapuai i le malumalu i le Toefuataiga. Ma o se vaega o lena faavae o lana faataitaiga o le sailia o le faamalologa mai le Alii e ala i se tatalo na faia e isi—o se tatalo e faia i le ala lava lea e tasi tatou te mauaina i malumalu i aso nei.