Faataitaiga, Faamanuiaga, ma se Olaga Matagofie

I le taimi o se siva talu ai nei a siteki tuufaatasi sa ou auai ai o se tagata faafeao, sa ou filifili ai e faauo atu i se tasi tagata faafeao. Sa ou iloaina sa ma feiloai mo sina taimi puupuu muamua, sa nofo o ia i se isi siteki, ma e i ai a ma uo matou te uo faatasi ai. Sa ou iloa foi e sau o ia mai Rochester, Niu Ioka, ISA, lea sa nonofo ai lona aiga mo le tele o tausaga.

Sa ou ta’u atu i la’u uo fou, o Sara, o lo’u tina na fanau ma ola a’e i Rochester. Sa fesili mai Sara mo le faaiu o lo’u tina a o le’i faaipoipo. Sa ou finau atu e leai se auala na te iloaina ai lo’u tina. O lo’u tina sa le o se tagata o le Ekalesia i lena taimi.

Sa ou faamalamalama atu sa auai Tina i le Ekalesia i lona tausaga muamua a o aoga i le kolisi i Misuri. I le aoga maualuga, sa i ai sona faiaoga i le aoga maualuga sa ia faaaloalogia. Sa agalelei o ia i taimi uma ia te ia ma o se faataitaiga maoae o le alofa o le Faaola.

Na iloa e lo’u tina o ia o se tagata o Le Ekalesia a Iesu Keriso o le Au Paia o Aso e Gata Ai. Ina ua alu atu o ia i le kolisi, sa manao o ia e a’oa’o atili e uiga i lana tapuaiga.

“O lo’u tamā sa avea ma se faiaoga Igilisi i Rochester mo le 35 tausaga,” o le tala lea a Sara. “O le a le aoga maualuga na auai ai lou tina?”

Sa vave ona ou avatu se feau tusitusi i lo’u tina, ma fesili atu po o le a le aoga sa ia auai ai ma le igoa o le faiaoga lea na uunaia o ia e saili le Ekalesia.

“Eastridge High, David Anderson,” o lana tali lea.

O le tamā o Sara o David Anderson!

Sa matou fiafia i se taimi faapitoa a o faamatala mai e lo’u tina mea matagofie na aumaia e le olaga ia te ia talu ona auai o ia i le Ekalesia—o se faaipoipoga i le malumalu, galuega faafaifeautalai a le toafa o lana fanau e toavalu ma le toatele o fanau a lana fanau, ma le tele o isi faamanuiaga.

Ina ua faasoa atu e Sara le tala a lo’u tina i lona tamā i le aso na sosoo ai, sa tagi o ia ma le agaga faafetai. Sa auai o ia i le Ekalesia ina ua uma ona faaipoipo ma sa manao foi e auauna atu i se misiona, ae o ia o se tane ua maliliu ni avā se toalua. O le faalogo i le tala a lo’u tina na fesoasoani ia te ia e lagona ai sa ia maua moni lava se olaga matagofie.

E faafetai lo’u aiga mo le Susuga a Anderson, le faiaoga tausi feagaiga i le aoga maualuga, o lana faataitaiga na musuia ai se teineitiiti e 18 tausaga le matua e saili le upumoni ma suia lona olaga ma le olaga o augatupulaga fai mai.

Faatasi ai ma le talalelei a Iesu Keriso, e mafai ona matagofie le olaga mo i latou uma e naunau e mulimuli i le Faaola ma faamamaluina a latou feagaiga.