Na Sa’o Lava Lo’u Tina

Saunia e Jason Choi, Seoul, Korea i Saute

O le mulimuli i le fautuaga a lo’u tina e pipi’imau i le ai uamea ua faamanuiaina ai lo’u aiga i le i ai o le Agaga Paia.

Ina ua 13 o’u tausaga, na ma’i tigaina ai lo’u tinā. Na maua o ia i se kanesa ogaoga i le tulaga mulimuli ma na tuuina atu i ai le ono masina e ola ai. Sa le manao lo’u tama ia iloa e i matou o le fanau, o lea ou te lei iloa ai lona ma’i seia oo ina toe tasi le masina o totoe e ola ai.

Ou te le’i matua lelei e malamalama ai i le mea na tupu, ma sa ou musu e asiasi ia te ia i le falema’i. Sa uunaia a’u e lo’u epikopo e aumai ia te ia le faamanatuga, ae ou te le’i manao i ai. Sa ou manatu faapea, o le a sau o ia ia le fale i se taimi e le o mamao atu. Ae sa finau pea lo’u epikopo aua sa ia iloa e le o tele se taimi mo ia o totoe.

Ina ua iu ina ou alu, sa faamanuiaina e lo’u epikopo le faamanatuga, ma sa ou tufaina atu i lo’u tina. Sa matua ma’i lava o ia ma sa le tautala tele. Ae sa ia fai mai ia te au, “Aua e te faamatu’u ese le ai uamea” (tagai i le 1 Nifae 8:19–20, 24, 30).

E lei umi ae maliu lo’u tina, ae sa ou manatuaina ana upu faamavae ia te a’u. O le mulimuli i ana fautuaga ua faamanuiaina ai lo’u olaga.

Mulimuli ane, sa ou ofo atu e fesoasoani i ni tagata se toalua o se aiga sa nonofo latalata ane o ē sa i ai mea o loo tauivi ai. Sa laua taliaina la’u fesoasoani ma avea ma vaega o lo’u aiga.

Ae peitai, sa leai se gafatia tautupe ia te a’u e lagolago ai i matou. O lea sa tatau ai ona ou galue malosi nai lo se isi lava taimi, e lagolagoina ni tagata se toatolu nai lo le toatasi. O se suiga tele faaleolaga.

Ina ia taulimaina na suiga, sa ou iloa e tatau ona ou mulimuli i upu a lo’u tina ma pipi’imau i le ai uamea. O le pipi’imau i le ai uamea e aofia ai le manatuaina o le Faaola ma suesue i le afioga a le Atua. Sa manaomia ona ou faia se faataitaiga lelei, fesootai atili ma le Atua, ma suesue i tusitusiga paia i aso uma. O lea, sa amata ai ona matou suesue faatasi i tusitusiga paia. E lei umi ae faateleina le Agaga i lo matou aiga.

O taimi aupito sili ona faamalieina ma matagofie o lo’u olaga na oo mai i le pipi’imau i le ai uamea. Sa ou a’oa’oina foi, “a e pipiimau i le ai u’amea, o le a oulua savavali faatasi ma Iesu Keriso. O le aIa taialaina oe, ma o le a Ia a’oa’oina oe.”