“O Feagaiga, Mana, ma Folafolaga,” Liahona, Oke. 2025.

O Feagaiga, Mana, ma Folafolaga

Saunia e Elder Ronald A. Rasband

O Le Korama a Aposetolo e Toasefululua

O le malumalu o le totonugalemu lea o le mana ma le puipuiga ua folafola mai i e faamaoni a o lei oo i le Afio Mai Faalua o le Alii o Iesu Keriso.

ata o Iosefa Samita o loo tu i luma o le Malumalu o Katelani

Ia Me 1833, na malaga atu ai lo’u tamāmatua lona fa o Asahel Perry ma nisi o uo mai Niu Ioka i matu i Katelani, Ohaio. Sa le o ni tagata o le Ekalesia faatoa toefuataiina i latou, ae sa latou mananao e feiloai i le Perofeta o Iosefa Samita. Sa latou taunuu tonu lava i le taimi e auai ai i le aufono muamua na faia e talanoaina ai le fausiaina o le Malumalu o Katelani.

Ina ua uma ona amataina le aufono, sa faailoa atu e le Perofeta le galuega e tatau ona fai o le fausiaina o le malumalu. Ona ia valaau atu lea iā i latou na auai ina ia faailoa mai o latou lagona e faatatau i lenei galuega tele. O le toatele na tali mai e faapea o le Ekalesia e mativa tele mo le taulimaina ai o se galuega faapena. Na latou fautuaina le fausiaina o se fale laititi ma taugofie.

I le taimi o le talanoaga na sosoo ai, sa faapotopoto faatasi ai tamāmatua Perry ma ana uo, ma aumai i fafo a latou tupe, ma faaopoopo le aofai. Pe na lava ea a latou tupe e totogi ai la latou malaga toe foi atu ma saofagā ai i le fausiaina o le malumalu? I ni nai minute mulimuli ane, sa alu atu lo’u tamāmatua ia Iosefa Samita, aumai i fafo se tupe siliva e lima tala auro, ma tuuina atu i le Perofeta. (O lea tupe siliva i aso nei o le a fuatia i le faitau selau o tala!)

Sa tu Iosefa i luma o le aufono ma uu i luga le tupe siliva. Ma, i lana saunoaga malosi lea, sa ia saunoa mai ai “ua amata le galuega ma o le a fausia le Maota [o le Alii] e tusa ma le mamanu na tuuina mai” e le Alii o Iesu Keriso.

E lei umi ae auai le aiga o Perry i le Ekalesia i Katelani, maua o latou faamanuiaga o le malumalu i ni nai tausaga mulimuli ane i le Malumalu o Navu, ma mulimuli ane sopoia laufanua laugatasi ma taalaelae mo Iutā.

E oo mai i le taimi na faapaiaina ai le Malumalu o Katelani i le 1836, sa laitiiti tele mo le ofi uma ai o le Au Paia o Aso e Gata Ai o e sa mananao e auai i lona faapaiaga. A o tuputupu ae le Ekalesia, sa faapena foi le aofai o le Au Paia o e sa tatau ona auai i sauniga i fafo. Na faia e Peresitene James E. Faust (1920–2007), o lē sa avea ma o’u peresitene o le siteki a o avea a’u ma se alii talavou ma o se faufautua ina ua valaauina a’u e avea ma se Pulega Aoao i le 2007, le matauga lenei e faatatau i le malumalu lona lua o le Ekalesia:

“A o lei mae’a le Malumalu o Navu i le 1846, sa tauaofia ia le Au Paia i fafo, e masani lava i tafatafa o le malumalu, e faalogologo ai i saunoaga a Iosefa ma isi taitai o le Ekalesia. O nisi taimi e faitau afe ma afe i latou e auai i na sauniga”—o nisi taimi e oo lava i le leaga o le tau.

“E pei ona matauina e [Elder] Siaosi A. Samita i se ala malie, ‘I ona po o le Perofeta o Iosefa … [o le Ekalesia] e sili ona tupuolaola i fafo.’”

Matou te faafetai ona i o tatou aso, o Le Ekalesia a Iesu Keriso o le Au Paia o Aso e Gata Ai o loo tupuolaola i fafo, i totonu, ma i le lalolagi atoa. O lena tupuolaola e aofia ai le fausiaina o malumalu i se saoasaoa e le mafaatusalia “e tusa ma le mamanu na tuuina mai”—o se mamanu e aofia ai i taimi uma faamanuiaga, faapaiaga, faatuatua, ma le ositaulaga.

O Se Malamalama Mamalu—Malumalu o Katelani, saunia e Glen S. Hopkinson, e le mafai ona kopiina

Aisea Ua Tele Naua Ai Malumalu?

Na faapea mai Peresitene Ezra Taft Benson (1899–1994) i nai sefulu tausaga ua tuanai “Na valoia e o tatou perofeta na muamua atu e faapea, o le a togitogia i malumalu le faataatiaga o Amerika i Matu ma Saute, o atumotu o le Pasefika, Europa, ma isi mea.” “Afai e tatau ona faia lenei galuega togiola i le fua e tatau ona i ai, o le a manaomia le faitau selau o malumalu.”

Na saunoa mai Peresitene Russell M. Nelson o loo tatou fausiaina malumalu i se saoasaoa e le’i tupu muamua lava “ona ua poloaiina ai i tatou e le Alii ia faia lena mea. O faamanuiaga o le malumalu ua fesoasoani e faapotopoto Isaraelu i itu uma e lua o le veli. O nei faamanuiaga ua fesoasoani foi e saunia se nuu o ē o le a fesoasoani i le sauniaina o le lalolagi mo le Afio Mai Faalua o le Alii!”

I lana tatalo o le faapaiaga o le Malumalu o Katelani, na tatalo ai Iosefa Samita “ina ia mafai e tagata e ulufale mai i le faitotoa o le maota o le Alii ona lagona lou mana. …

“Ma e matou te ole atu ia te oe, Le Tamā Paia e, ina ia o atu au auauna mai lenei fale ua faaauupegaina i lou mana, ma ina ia i ai lou suafa i luga o i latou, ma i ai lou mamalu e siosiomia i latou, ma i ai i au agelu le tausiga i o latou luga” (Mataupu Faavae ma Feagaiga 109:13, 22; faaopoopo le faamamafa; tagai foi i le fuaiupu 23).

Pe a ou faitau i na fuaiupu, ou te mafaufau i le faaaliga a Nifae o aso e gata ai. Matau faaupuga talitutusa: “Ma sa oo ina o a’u o Nifae, sa vaai i le mana o le Tamai Mamoe a le Atua, ua alu ifo i luga o le au paia o le ekalesia a le Tamai Mamoe, ma luga o le nuu o le feagaiga a le Alii, o e sa faataapeapeina i luga o le fogaeleele atoa; ma sa faaauupegaina i latou i le amiotonu ma le mana o le Atua i le mamalu tele” (1 Nifae 14:14; faaopoopo le faamamafa).

Ou te talitonu o malumalu o aso e gata ai e i ai se matafaioi tāua i le faataunuuina o le valoaga a Nifae ma e aupito silisili le tāua i le puipuiga ma le mana ua folafola mai i e faamaoni a o lei oo i le Afio Mai Faalua.

I ni nai tausaga ua mavae, a o ou auauna atu o se epikopo o se uarota a le iunivesite, sa faapitoa lava lo’u faagaeetia i se tasi o tamaitai talavou i la’u uarota. O loo ia faafiafiaina pea a’u. Tou te iloa o ia o Peresitene Emily Belle Freeman, o le Peresitene Aoao o Tamaitai Talavou. I se lauga i le konafesi aoao talu ai nei, sa ia a’oa’o mai ai e faapea, e ala mai i le malumalu, e siitia ai i tatou e Iesu Keriso i se tulaga faaleagaga maualuga atu.

“O taimi taitasi ou te kolosia ai faitotoa o Lona maota, ou te lagonaina lava le sootaga loloto atu i le feagaiga ma Ia. “Ua faapaiaina a’u e Lona Agaga, ua faaeeina i Ana meaalofa, ma vae tofia e fau Lona malo.”

Mana Folafolaina

E masani ona saunoa Peresitene Nelson e uiga i le mana o Iesu Keriso o loo maua e ala i feagaiga o le malumalu. “O lou mulimuli o oe lava ia i le Faaola o lona uiga e te mauaina Lona mana faamalosi’au ma togiola.” na ia faapea mai ai. Na a’oa’o mai foi Peresitene Nelson:

“A o tatou tausia a tatou feagaiga o le malumalu, tatou te maua se avanoa tele atu e faaaoga ai le mana faamalosi’au o le Alii. I totonu o le malumalu, tatou te maua ai le puipuiga mai tu’iga a le lalolagi.”

“O sauniga taua [a Le Faaola] e fusia ai i tatou ia te Ia e ala i feagaiga paia o le perisitua. Ma, a tatou tausia a tatou feagaiga, Na te faae’e mai ia i tatou Lona mana faamalolo ma faamalosi’au. Ma ioe, oka so tatou manaomiaina o Lona mana i aso o i luma atu.”

“O le mana mama ma le faaleagaga o loo manaomia e o tatou tagata i le taimi nei ma aso o i luma atu, o le mana lea o le Atua le Tama ma Lona Alo, o Iesu Keriso. Tatou te maua lo La’ua mana e ala i le osia ma le tausia o feagaiga ma i La’ua.”

E taua le mana faalelagi, uso e ma tuafafine, aua o loo tatou ola i se lalolagi amioleaga tele. A aunoa ma lena mana, o le a le mafai ona tatou “tali le aso o lona afio mai” pe “tula’i pe a faaalia mai o ia” (Malaki 3:2). Tatou te le iloa po o afea o le a oo mai ai lena aso, ae ua uma ona auina mai Lana avefeau e “sauni le ala” mo Lona afio mai (Malaki 3:1). I le taimi nei, e lē o sosolo toafimalie atu le lalolagi i lena aso.

Tatou te manaomia le mana ua folafola mai i e faamaoni e fesoasoani ia i tatou:

Ia faamuamua le Atua i o tatou olaga.
Ia salamo ma faalatalata atili atu i le Alii.
Faamanuia, faamafanafana, taitai, ma auauna atu.
“Faamalosia i tatou e tetee atili atu ai i o tatou tofotofoga, faaosoosoga, ma lototiga” (tagai i le Mosaea 3:19).
Saili le filemu ma le olioli ia Keriso a o tatou savavali i le ala o feagaiga.
Saunia “mo le aso o le susunuina” ma “le mala o e amioleaga” (Mataupu Faavae ma Feagaiga 109:46).
Faataunuu le galuega a le Alii a o lei oo i Lona Afio Mai Faalua.

Ata pue o le taualuga o le Malumalu o Tucson Arizona saunia e James Whitney Young

O Fitafita o le Faaolataga

O le galuega ma le mamalu o le Tama Faalelagi o le “ia aumaia le tino ola pea ma le ola faavavau o le tagata” (Mose 1:39). O malumalu taitasi e tutu o se fitafita faalelalolagi o le ata o le faaolataga a le Atua, e faasino atu i le matafaioi aupito taua a le Faaola i lena galuega ma le mamalu.

O le faaauupegaina i Lona mana, o alii ma tamaitai uma e tausia feagaiga—faaipoipo pe leai—o e tausia ma le faamaoni feagaiga o le malumalu o le a faamanuiaina i lenei olaga ma le olaga a sau.

Na folafola mai e Peresitene Nelson: “I le taunuuga lea tatou te tauivi uma i ai ina ia faaeeina i le mana i totonu o se maota o le Alii, faamauina o ni aiga, faamaoni i feagaiga e osia i totonu o se malumalu lea e agavaa ai i tatou mo le meaalofa silisili a le Atua—le ola e faavavau. O sauniga o le malumalu ma feagaiga tou te faia iina o le ki lea i le faamalosia o lou olaga, lau faaipoipoga ma le aiga, ma lou tomai e tetee atu ai i osofaiga a le fili. O lou tapuai ai i totonu o le malumalu ma lau auaunaga iina mo ou tua’a o le a faamanuiaina ai oe i le faateleina o faaaliga faaletagata lava ia ma le filemu, ma o le a faamalosia ai lou tuuto e tumau i luga o le ala o feagaiga.”

I le avea ai ma se Aposetolo a le Alii o Iesu Keriso, ou te molimau atu e moni nei mea.