O ō Tatou Loto i Ona Aao

O lo’u faatuatua ia Iesu Keriso o le faavae lea o lo’u olaga, ma o le alofa o le Tama Faalelagi o le ute lea o lo’u olaga. Ou te lagona le tasi ma i La’ua. E ala i le osia ma le tausia o feagaiga o le malumalu, ou te lagonaina ai lo La’ua mana i lo’u olaga.

I totonu o le maota o le Alii, ou te lagona le latalata atu ia te Ia. Ou te lagonaina le malosi ma le mana o Lana perisitua. O se lagona e pei o loo Ia faaloloa mai Lona aao ia te a’u, ma valaaulia a’u ina ia talia.

O la’u malaga i le olaga na aofia ai su’esu’ega faafomai, lea na manino mai ai ia te a’u se fesootaiga i le va o le faatuatua ma vailaau. I se tasi taimi a o ou aoga i taotoga o le fatu, sa ou fesoasoani ai i se taotoga o le fatu. O se tagata gasegase sa tatau ona faia se taotoga o alatoto o le fatu. O la’asaga sauniuni e aofia ai le faafeso’ota’i o se masini o le fatu ma le māmā e faamautinoa ai o le sapalai o le toto ma le okesene taua o le a i totonu o le faataamilosaga o le tino.

O le faaaogaina o se suavai faapitoa, na taofi ai e le fomai tipitipi le fatu mo se taimi le tumau ina ia mafai ai ona ia faia le taotoga e aunoa ma le minoi o le fatu. Sa ou tilotilo atu ma le toto’a i lima o le fomai tipitipi ma vaaia ai o ia o sii teisi a’e le fatu i ona luma i le fatafata. O le taimi lena na ia faliu mai ai ia te a’u i se minoi filemu o lona ulu. Sa ia fai mai ia te a’u e u’u ma le faaeteete le fatu i lo’u lima taumatau ina ia mafai ona faamautuina mo le faatinoga o le ta’otoga.

Ina ua ou uuina le fatu o le tagata ma’i i lo’u lima, sa vave ona ou lagonaina se tiutetauave tele, faapea foi ma se lagona loloto o le maofa. O upu nei mai le Mataupu Faavae ma Feagaiga 101:16 na oo mai i lo’u mafaufau: “Ia filemu ma iloa o A’u o le Atua” (tagai foi i le Salamo 46:10).

Ou te faafesoota’ia lenei ata o se loto toafilemu ma le iloaina faaleagaga o Iesu Keriso, i le avea ai ma lo tatou Faaola, ua u’u o tatou fatu i Ona aao ma faamaloloina.

Ua ou aoaoina le moni o upu a Peresitene Russell M. Nelson na saunoa ai i le taimi o se konafesi aoao talu ai nei: “O le mea silisili o le a oo mai, pe a tatou liliu atu o tatou loto ma o tatou olaga ia Iesu Keriso.”