Aisea Na Ia Lē Faamaloloina Ai O Ia?

I se taimi ao pepe le ma tama teine, o Jilly, sa ia lēausia ni tulaga taua o le tuputupu a’e ma e masani ona foliga lofituina i lona siosiomaga. I le mae’a ai o le tele o tatalo ma se faasologa o mea na tutupu na faatulagaina e le lagi, na matou iloa ai ua logonoa o ia i se ma’i taliga faapitoa.

I le 18 masina le matua, na faia ai se taotoga o Jilly lea na toe maua ai lana faalogo. O se taimi faavavega lena taimi, i le vaavaai atu ia te ia o tiotio mai a o amata ona ia fesoota’i mai ia i matou. Ae i ni nai tausaga mulimuli ane, na tula’i mai ai ni lu’itau fou. Sa matou taumafai ia malamalama pe mafua i se a ona tutupu nei mea.

E pei ona i ai muamua, e ala i se faasologa o vavega, na matou iloa ai sa amata ona i ai ia Jilly le faafitauli i le faavasegaina o leo na te faalogoina, o lona uiga e le mafai e lona fai’ai ona faamatalaina lelei faailo leo. Na amata ona matou galulue ma ē tomai faapitoa i fofo ma foma’i e fesoasoani ia te ia e faatautaia le lalolagi e pei ona ia oo i ai.

Sa ou talitonu ma lo’u loto atoa afai ou te tatalo ma tumau i le faamaoni, o le a faamaloloina e le Atua le ma tama teine. Sa ou iloa sa ia te Ia le mana e faia ai, aisea la na Ia le faamaloloina ai o ia?

E ui lava i nei mea uma, sa ou lagona le pei o Maria ma Mareta i le Feagaiga Fou. Sa la faamoemoe mo le faamālōlōina o lo la tuagane o Lasalo, ae sa i ai se vavega sili atu i le finagalo o le Atua. E ala i le faatalitali e taunuu atu i lo la fale, na faatagaina ai e Iesu o la faatuatua e tuputupu a’e i auala o le a aumaia ai le mamalu i le Tama ma le Alo ma faasino atu ai i le gafatia o loo La teuina mo o tatou olaga.

“Le Alii e, ana e iinei, po ua le oti lo’u tuagane,” o le tagi atu lea a Maria ia Iesu ina ua taunuu atu o Ia (Ioane 11:32). Ona Ia toe faatuina lea o Lasalo mai le oti, ua faamaloloina atoatoa.

O la’u tali, e pei o Maria ma Mareta, na oo mai i se auala e le’i mafaufauina. I se tasi taeao, na oo mai ai lenei manatu filemu i lo’u mafaufau: “E le manaomia e lau tama teine se faamalologa; Na te mana’omia le alofa ma le taliaina.”

I le taimi muamua, sa faigata ia te a’u ona talia lenei tali. Sa ou manao ia saoloto Jilly mai tauiviga. Ae ina ua ou tatalaina lo’u loto, sa ou iloaina ai o le fuafuaga a le Atua mo le ma tama teine sa sili atu ona matagofie nai lo le mea sa ou mafaufauina. Sa Ia iloaina o lenei aafiaga o le a fesoasoani i lo matou aiga e tuputupu ae ai i le faatuatua ma le faatuatuaina.

E le’i faigofie le vaavaai atu ia Jilly o feagai ma ona luitau. Ae e ala i lenei malaga, ua ou a’oa’oina ai o le taimi ma fuafuaga a le Atua e atoatoa i taimi uma. Na te silafia le taimi e i ai iina mo i tatou. Pau lava le mea e tatau ona tatou faia o le talitonu o le a i ai pea o Ia.