“Mauaina o le Mea Sili Mai le Mataupu Faavae ma Feagaiga 109,” Liahona, Oketopa 2025.
Sau, Mulimuli Mai ia te A’u
Mataupu Faavae ma Feagaiga 109
Mauaina o le Mea Sili mai le Mataupu Faavae ma Feagaiga 109
Manatu mo le suesueina o le tatalo o le faapaiaga o le Malumalu o Katelani
Faamatalaga Auiliili o le Malumalu o Katelani, saunia e Al Rounds
E masani ona talanoa taitai o le Ekalesia e uiga i le mana e mafai ona maua e i latou o e auauna atu ma tapuai i le malumalu. O nisi taimi e mafai ona lagona ai le le mautonu pe le mafai ona maua. Ae o nisi o mau o loo aoao mai e faapea o tagata o le Ekalesia e mafai ona “faaeeina i le mana mai luga” (tagai Luka 24:49; Mataupu Faavae ma Feagaiga 38:32; 95: 8; 105:11; 109:35).
Na aoao mai Peresitene Russell M. Nelson e faapea, o le Mataupu Faavae ma Feagaiga 109 e mafai ona aoao atili ai i tatou e uiga i lenei mana: “O le tatalo o le faapaiaga a Iosefa Samita o le Malumalu o Katelani o se aoaoga e uiga i le auala e faamalosia ai oe ma au e le malumalu faaleagaga e faafetaiaia ai luitau o le olaga i nei aso e gata ai. Ou te uunaia outou e suesue i lena tatalo.”
Autu i le Mataupu Faavae ma Feagaiga 109
O le faailoaina o autu i le tatalo o le faapaiaga o le Malumalu o Katelani e mafai ona faaleleia ai au suesuega. O nisi nei o autu filifilia e faatatau i le sailia o le mana e ala i tapuaiga i le malumalu. A o e suesue, e mafai ona e maua isi autu ma mataupu faavae.
Faaaliga ma Faatonuga (fuaiupu 8, 14)
E mafai ona tatou o i le malumalu e maua ai faaaliga, manino, ma le poto o le a fesoasoani ia i tatou e faatautaia ai luitau o le olaga.
Faapaiaina ma le Paia (fuaiupu 12, 20)
O le tapuai i le maota o le Alii tatou te maua ai se nofoaga e o i ai e faapaiaina ma paia, lea e leai se mea eleelea e ulu atu i ai.
Lotogatasi ma le Fesootaiga (fuaiupu 6, 17–19, 24, 67, 72)
A o tatou auai i sauniga o le malumalu, e tuufaatasia i tatou o ni fanau o le feagaiga ma saunia lelei mo le toe afio mai o le Faaola.
Mana Paia ma le Puipuiga (fuaiupu 22, 26)
O luitau o le ola ai i aso e gata ai e mafai ona faigata. O le tapuai i totonu o le malumalu ma le tausia o a tatou feagaiga tatou te maua ai le puipuiga mai le leaga.
Ua Faaalia Mai le Mamalu o le Atua (fuaiupu 5, 12, 37, 77)
O le maota o le Alii o se nofoaga lea e mafai ai e le Atua ona faaali mai Lona afioaga ma Lona mamalu. A o tatou tapuai iina, tatou te maua Lona malamalama ma le mamalu i o tatou olaga.
Olioli ma le Filemu (fuaiupu 39, 76, 80)
Pe a tatou osia ma tausia feagaiga, ua tatou tatalaina le ala mo le Atua e faamanuia ai i tatou i le filemu, olioli, ma le faafouga, ma tuuina mai ia i tatou le mana e faatoilalo ai tofotofoga i nei aso e gata ai.
O Folafolaga ma Avanoa
O le suesueina o le Mataupu Faavae ma Feagaiga 109 e mafai ona faateleina ai lou malamalama i folafolaga ma faamanuiaga e maua e ala i le tapuai i le maota o le Alii. E pei ona aoao mai Peresitene Nelson, “O le malamalama i avanoa faaleagaga ua mafai ona maua i totonu o le malumalu e taua tele ia i tatou taitoatasi i aso nei.”