Vaai i le Lelei o ia i Latou

Saunia e Sister Kristin M. Yee

Fesoasoani Lua i le Au Peresitene Aoao o le Aualofa

O le auauna atu e le na o se polokalama; o se faagasologa paia lea e faamanuia ai ma suia ai e le Atua loto o Ana fanau.

Pe na e lagona ea ua iloa moni oe? O loo i ai se uunaiga mamana lea e oo mai pe a vaai moni atu se tasi ia te oe, alofa ia te oe, ma talitonu ia te oe. Na avea a’u ma se tusiata ona sa manatu lo’u tina ou te talenia. E le na ona ia talitonu ia te a’u pe a ou faia se galuega lelei. Pe a ou faia se mea sese, sa ia vaaia pea le lelei o loo a te a’u.

Na aoao mai Elder David A. Bednar o le Korama a Aposetolo e Toasefululua e faapea “o le iloatino i lona tulaga faaalia aupito maualuga o le vaaia lea o le lelei o loo i se isi tagata na te le’i vaaia lava ia te ia lava ma le tomai e fesoasoani ai ia i latou ia iloa ma atiina ae.”

O le mea lena e faia e lo tatou Tama oi le Lagi mo i tatou i aso uma. E silasila o Ia i le lelei atonu tatou te le vaaia ia i tatou lava ma fesoasoani ma le alofa ma le onosai ia i tatou e atiina ae ma fesoasoani ia i tatou ia avea faapei o Lona Alo. Ua faaali mai e le Faaola ia i tatou le ala e vaai ai i le lelei ma fesoasoani i isi e atiina ae. Sa Ia aoaoina ma le alofa ma le loto i ai ia Peteru ma Ana Aposetolo fou. Sa Ia auauna atu ma uunaia tagata taitoatasi sa manatu i ai tagata o ni tagata agasala, ua tuliesea, pe le māmā. Sa ia vaaia le tāua ma le faamoemoe ia i latou sa manatu ua leai se faamoemoe. Sa Ia tali atu ma le agaalofa i aioiga a lepela atuatuvale. E le gata ina ia faalatalata atu ia i latou ae sa ia pa’i atu ma faamalolo i latou. (Tagai i le Mareko 2:15–17; Luka 5:12–13; Ioane 4:4–26.)

Sa Ia silafia le tāua o agaga taitasi, ma sa Ia alofa ia i latou. Sa Ia silasila i le tele atu o mea o ia i latou nai lo o o latou vaivaiga, agasala, ma’i, ma faaletonu. Sa Ia silasila atu i o latou agaga ma mea uma latou te mafaia ma o le a avea ai i latou. Sa Ia aoaoina i latou, faamalolo i latou, faamalosiau ia i latou, ma valaaulia i latou ia ausia le tulaga aupito sili ona maualuga latou gafatia e ala i le mulimuli ia te Ia.

I le avea ai ma tamaitai o le feagaiga o Lana Ekalesia, ua ia i tatou le faamanuiaga ma le poloaiga e “alu ia, ma ia e faapea ona fai” (Luka 10:37). “Ona o galuega na outou vaai na ou faia o mea ia tou te faia foi” (3 Nifae 27:21). Ua ia i tatou le avanoa o le feagaiga ma faamanuiaga e fesoasoani ai ia i latou o loo tatou auauna atu i ai ia lagona le alofa o le Faaola ma ia iloa le lelei o loo silafia mai e le Atua ia i latou ma fesoasoani ia i latou e atiina ae. O le alofa lea i isi e pei ona faia e le Faaola (tagai i le Ioane 13:34).

E masani ona fesoasoani lo tatou Tama oi le Lagi ia tatou tuputupu ae ma atiina ae ma alualu i luma e ala i le auina mai o tagata faapitoa i o tatou olaga—o tagata e aumaia Lona alofa ma le toomaga ma fesoasoani ia i tatou e tulai a’e i o tatou gafatia.

Ua i ai i uso ma tuafafine o auaunaga le avanoa matagofie ma le tiutetauave o le feagaiga o le avea ai ma na tagata faapitoa i le feau a le Alii. E mafai ona tatou fesoasoani ia i latou o loo tatou auauna atu i ai ia iloa uiga lelei, taleni, ma uiga patino o Keriso ia i latou lava ma fesoasoani ia i latou ia tuputupu ae.

O le tele lava o lo tatou fesoasoani atu i isi e faataunuu le fuataga o lo latou foafoaga, o le tele foi lena o lo tatou iloaina o o tatou lava gafatia i le avea ai ma fanau a le Atua. E tatau ona tatou faalagolago i le Alii e silafia ai manaoga o Lana fanau.

Tuafafine, ua ia te outou puna’oa o le lagi o loo avanoa e faatino ai lenei galuega amiotonu ma le faaeaga, e aofia ai faamanuiaga o le mana o le perisitua a le Alii e ala i le tausia o au feagaiga ma le pule o le perisitua ua faamatuu atu e ala i o outou valaauga ma tofiga faaleauaunaga. O nei faamanuiaga e fesoasoani e tuuina mai ai le faaaliga tatou te manaomia e auauna atu ai i Lana ala.

E mafai e le Agaga ona fesoasoani e faamaluluina o tatou loto ina ia vaai atu i isi “e pei ona i ai moni lava” (Iakopo 4:13) ma aua nei faanenefuina la tatou vaai e ala i mafaufauga, faasamasamanoa, po o le vaivai foi.

“O Uso o Auaunaga ua Auina Mai e le Atua”

Ua avea nei Karen ma a’u uo pele. Ae ou te le’i iloaina o ia seia oo ina avea a’u ma ona uso o auaunaga. O la’u soa o auaunaga o se tamaitai talavou agalelei e igoa ia Ela, o se ua i le tausaga faaiu i le aoga maualuga. Sa ma maua le tofiga e auauna atu ia Karen ina ua faatoa amata ona toe foi mai o ia i le lotu.

A o ma auauna atu ia Karen ma iloaina lana tala tulaga ese ma manaoga, sa ma lagonaina ma Ela le uunaiga e valaaulia o ia e sau i le malumalu. O lenei taumafaiga na faaaoga ai tomai o Ela i tekinolosi e faaleleia ai faafitauli i le faitotoa o le Ekalesia a Karen i le initoneti ina ia mafai ai ona ia totogiina lana sefuluai ma faia se taimi faatulagaina i le malumalu. Ma sa ou ave o ia e aumai ni laei fou o le malumalu ma fesoasoani ia te ia ia lagona le toafimalie e alu ai. Sa foliga mai sa susulu Karen ma faatumulia i le filemu ma le fiafia a o ma saofafai faatasi ma ia i le potu selesitila ina ua mae’a le sauniga.

Sa oo Karen i ni faafitauli tetele o le soifua maloloina ae faapea foi ma vavega ofoofogia i le taimi na ma auauna atu ai ia te ia. O le lagolagoina o ia i lenei taimi na faamalosia ai i matou uma i le Alii.

Sa ma valaaulia o ia e faatasi ma i matou i le Aualofa ma le Aoga Sa ma faaalu se taimi faatasi ma ia i lona fale. Ua tuputupu a’e o ia ma le mautinoa matagofie po o ai o ia ma le tagata e mana’o e avea ai. Ua amata ona ia vaaia le lelei o ia te ia lava.

Ina ua ou fesili atu ia Karen pe mafai ona ou faasoa atu lenei aafiaga faapitoa o le avea ai ma ona uso o auaunaga, sa ia fai mai, “Ia faia lena! Tuu atu ia i latou ia iloa o loo i ai se Tama Faalelagi o lē e alofa ia [i latou]!” Fai mai o ia, o le alofa ma le popole sa ma maua ma Ela mo ia na aoaoina ai o ia na te manaomia se tasi i lona olaga. Sa ia faapea mai, “O le a la’ua le iloa lava le tele o lo’u mana’omia o i la’ua. … O uso o auaunaga e auina atu le Atua.”

E matuai fuafuaina lava e le Alii Lona tofiaina o le mea e i ai oe ma a’u. Na te silafia po o ai tatou te mana’omia i o tatou olaga ma pe aisea. Afai tatou te faatinoina le faatuatua i le Alii ma faataunuu o tatou tofiga o le auauna atu mai ia te Ia, o le a Ia faaali mai ia i tatou faamanuiaga ofoofogia o Lona alofa ma Lana faatulagaga paia mo lo tatou manuia.

O Le Auauna Atu e Suia Ai O Tatou Lava Natura

I le avea ai ma fanau a le Atua, ua fuafuaina i tatou e tuputupu a’e ma suia ma ia avea faapei o o tatou matua faalelagi. Ma o le auauna atu i le alofa o se uunaiga lea mo le ausiaina o lena faamoemoe. O le auauna atu e le na o se polokalama; o se faagasologa paia lea e faamanuia ai ma suia ai e le Atua loto o Lana fanau mai loto fatu i loto aano (tagai i le Esekielu 11:19).

O le auauna atu o le alofa atu ma le tausiga lea o isi e pei ona faia e le Faaola. O se auala o le avea ai; o le ala lea a lo tatou Faaola o Iesu Keriso ma i latou uma o e osifeagaiga e mulimuli ia te Ia. Sa ia faapea mai, “O le poloaiga fou ou te tu’u atu ai ia te outou, ia outou fealofani; faapei ona ou alofa atu ia te outou” (Ioane 13:34).

O le faia e pei ona faia e le Faaola ma faalagolago ia te Ia e suia ai o tatou lava natura ina ia avea e faapei o Ia, ma iu ai ina tatou agavaa e toe foi atu i le afioaga o lo tatou Tama oi le Lagi.

Sa aoao mai Peresitene Nelson e faapea: “pe a tatou tauivi e ola i tulafono maualuluga atu a Iesu Keriso, o le a amata ona suia o tatou loto ma o tatou natura tonu lava. E siitia e le Faaola i tatou i luga a’e o faaosoosoga o lenei lalolagi pa’ū e ala i le faamanuiaina o i tatou i le alofa mamā sili atu, lotomaualalo, agaalofa, agalelei, loto-pulea, filemu, ma le malologa.”

Ua Aumaia e Tamaitai o le Feagaiga le Toomaga a le Faaola

Ou te manatua se tasi afiafi na ou tietie sa’o ai mai le galuega e asiasi i se tasi o uso sa ou auauna atu i ai. Sa o se aso faigata, ma sa ou lagonaina se tulaga lē malosi lelei. Sa ou lagona e pei ua leai se mea o totoe ou te tuuina atu ma sa ou le lagonaina le atoa o se alofa. Sa ou lagona e tatau ona faia se tatalo laitiiti ma le faatuatua i lo’u loto a o ou aveina le taavale ina ia faamanuiaina i se ala lenei tuafafine i mea na te manaomia e ui lava i lo’u le atoatoa. A o ma talanoa ai ma la’u soa ma lenei tuafafine e uiga i lona aiga, lona olaga pisi, ma mea e mafai ona ma faia e fesoasoani ai, sa ou lagonaina le liligi mai o le alofa o le Alii i totonu ia te a’u. Sa ou lagonaina Lona alofa mo ia, mo lona aiga, ma mo a’u.

Sa matou taaalo ma lana fanau laiti a o matou asia. Ma sa ou tuua lena po ma lagona e pei o se tagata ese. Sa ou iloa ua tuuina mai ia te a’u le gafatia ma le malosi. Sa ou iloa sa ou lagonaina le aafiaga a le Agaga lea na faatuina ai se lagona o le filemu ma le fiafia i totonu o lena aiga. Sa matou lagonaina uma le uunaiga ma le siitia e Lona alofa.

Sa ou maua le olioli i le alofa atu i lenei uso ma le aumaia ia te ia o le toomaga o le Faaola. O o tatou aafiaga e tau atu i le auauna atu e le o taimi uma e faigofie pe fiafia ai. E pei lava o so’o se mea taua, e masani lava ona i ai ni faafitauli. Ae a e auauna atu, e te le salamo i le avea ai ma Ona aao ma taliga. E te le salamo i le aumaia o Lona alofa ma le toomaga.

Sa faapea mai Peresitene Nelson, “Tuafafine, faamolemole aua lava nei manatu faatauvaa i le mana tulagaese o i totonu o outou e tosinaina ai isi mo le lelei. O se meaalofa ua faamanuiaina ai e lo tatou Tama Faalelagi tamaitai uma o le feagaiga,”

O outou o tamaitai o le feagaiga o le Ekalesia a le Alii. I le lalolagi atoa, tou te alofa i le Atua ma tauivi e ola i au feagaiga ma tuuina atu le mea sili e te mafaia ia te Ia. E faataunuu e le tagata lona tiute e auauna atu i le toatasi ma le toatele e aumai le toomaga o le Faaola.

Ma oi, tuafafine pelē, afai sa i ai se taimi na manaomia ai se toomaga i luga o le fogaeleele, o le taimi nei. O le mana’oga e matua tele i tulaga uma ma i nofoaga uma. Ma ua tuuina oe e le Alii i se nofoaga patino o le tovine e aumai ai Lona alofa ma le toomaga i Lana fanau. O faatinoga uma o le agalelei e taua; o loto ma lima uma e naunautai e tāua; o faailoaga uma o le alofa ma le onosa’i e taua. O le mea e te faia e tāua moni lava.