Fusia i le Mafanafana ma le Alofa

“O le a se mea e mafai ona ou faia mo oe?” O le fesili lea a Michele. O Michele o lo’u uso o auaunaga ma o se tasi o a’u uo mamae. Sa tatagi mai lana fesili i lo’u taliga, ma sa ou lagona le popole ona sa ou toe le tuuina atu ia te ia se tali sa’o.

Talu ai nei sa mafatia ai lo’u aiga lautele i tulaga nutimomoia, ma sa ou iloaina sa ou manaomia se fesoasoani. Ae ui i lea, ou te le’i mana’o e foliga vaivai e fesili atu mo le fesoasoani a Michele.

E masani ona ou faatusatusaina a’u lava i isi e pei o paionia o le Au Paia o Aso e Gata Ai o e na ositaulagaina mea uma mo lo latou faatuatuaga po o lena uo i luga o le Facebook o le na foliga mai sa i ai mea uma. Sa ou iloa e leai se tasi o nei faatusatusaga e talafeagai. Ae sa faaauau pea ona ou tuuatoatasi a’u lava ae sa mafai e le faamafanafanaga a se tuagane po o se uso alofa i le uarota ona faia se eseesega tele.

Mo le tele o tausaga, sa ou tuuese ni uo lelei ma le anoanoai o lomiga o le fuaitau “O loo seki au.” O le mea e malie ai, sa ou le fiafia i le mauaina o le tali lava lea e tasi mai ia i latou sa ou auauna atu i ai. E faafia ona ou teena ma le faamaualuga tagata na auina mai e le Atua e fai ma tali i a’u tatalo? Peita’i, o o’u tulaga talu ai nei, na faamalosia ai a’u e tuu i lalo lo’u faamaualuga ma ole atu mo se fesoasoani.

I le taimi muamua, sa ou le iloa po o le a se tala e fai atu ina ua ou valaau atu ia Michele, ae a o ou sasaa atu o’u lagona o le faanoanoa ma le leiloa, sa ma fetagisi faatasi ma ia ma faalogo mai ia te a’u. Sa ou fai atu ia te ia ou te manao i se tasi e aumai ia te a’u se meaai mama, faaafu a’u i se palanikeke, ma tuu a’u i le moega ma le faamautinoaga o le a LELEI mea uma.

Sa fai mai Michele ia te a’u sa ia tatalo ina ia iloa pe faapefea ona faamafanafana mai ia te a’u ae na te le iloa pe faapefea ona ou te le o talanoa e uiga i lo’u faanoanoaga. Ae peitai, o le taimi lava na ou tatalaina ai lo’u loto ia te ia, sa mafai ona ia malamalama atili ma iloa le auala e fesoasoani ai ia te a’u.

O le aso na sosoo ai na sau ai o ia i lo’u faitotoa ma se taga cherries ma le palanikeke sili ona mafanafana ma sili ona vaivai na ou pa’i i ai. E lei umi ae sau lana soa o auaunaga, o Linda, ma se taumafataga mo lo’u aiga ma ni totini fulufulu mo a’u.

O lenei pe a uio le faanoanoa i totonu ia te a’u e pei o se afa, ou te fusia a’u lava i le mafanafana o le alofa o Michele ma Linda ma mautinoa ua ou LELEI. O lo latou alofa o se faamanatu lea o le alofa o Keriso—o se mea e mafai ona ou valaau atu i ai i soo se taimi ou te manaomia ai (tagai Roma 8:35, 38–39).