Տերն ինձ առաջնորդեց տուն

Մարսելո Մալդոնադո, Կոչաբամբա (Բոլիվիա)

Երբ ես հետևեցի Բոլիվիա վերադառնալու հոգևոր հուշմանը, Տերն առաջնորդեց ինձ դեպի հավերժական ընտանեկան օրհնություններ:

Մինչ աշխատում էի իմ դոկտորական աստիճանի վրա և երաժշտություն էի դասավանդում Միացյալ Նահանգներում, ես ջանում էի ապրել ավետարանով և զգալ Աստծո ազդեցությունն իմ կյանքում: Ես հեռու էի տնից և երբեմն ինձ միայնակ էի զգում, բայց զգում էի, որ Նրա սերն ու ձայնը առաջնորդում են իմ որոշումները:

Մի օր զգացում առաջացավ, որ ես պետք է վերադառնամ իմ հայրենիք՝ Բոլիվիա: Վերադառնալը անլուրջ որոշում չէր: Գործերը լավ էին ընթանում։ Բայց աղոթելուց հետո ես զորեղ կերպով զգացի, որ պետք է վերադառնամ, քանի որ ինձ ինչ-որ կարևոր բան էր սպասում այնտեղ:

Վերադարձիցս հետո Բոլիվիայի լավագույն համալսարաններից մեկում բացվեց երաժշտության բակալավրի ծրագիր, որտեղ ես գտա դասախոսի աշխատանք:

Իմ ծխում ես շուտով հանդիպեցի մի երիտասարդ կնոջ, որին նախկինում երբեք չէի տեսել: Նրա ծնողները դարձի էին եկել Եկեղեցի, մինչ տարիներ առաջ ես պատրաստվում էի մեկնել Միացյալ Նահանգներ: Մենք սկսեցինք հանդիպել և ամուսնացանք, ինչը մեծ օրհնություն էր իմ կյանքում:

Երկու տարի առաջ տատիկիս մոտ քաղցկեղ ախտորոշեցին։ Մենք շատ մտերիմ էինք։ Երբ ես երիտասարդ էի, նա ինձ ասում էր. «Դու միշտ ինձ հետ կլինես, և ես գիտեմ, որ դու հոգ կտանես իմ մասին»:

Քանի որ վերադարձել էի տուն, ես այնտեղ էի, երբ նա իմ կարիքն ուներ, և նրա հետ ամեն օր ժամանակ էի անցկացնում վերջին ամիսների ընթացքում: Նա չէր միացել Եկեղեցուն իր մահից առաջ, սակայն սիրում էր Լիահոնա ամսագիրը, Մորմոնի Գիրքը և գերագույն համաժողովը: «Ես հավատում եմ այդ ամենին»,- ասում էր նա:

Ավելի ուշ ես օրհնվեցի՝ լինելով Կոչաբամբայի (Բոլիվիա) տաճարում ծնողներիս հետ, երբ տատիկս կնքվեց իր ամուսնու հետ, որը մահացել էր երիտասարդ տարիքում: Նա երբևէ կրկին չէր ամուսնացել: Ես զգացի, որ նրանք այնտեղ էին՝ տաճարում, մեզ հետ երջանիկ և կրկին միասին: Գեղեցիկ տեսարան էր իմ ծնողներին տեսնել կնքման սենյակում՝ որպես նրանց փոխարինող անձ:

Մենք չգիտենք, թե ինչպես կզարգանան իրադարձությունները մեր կյանքում, բայց Տերը գիտի, թե մենք որտեղ պետք է լինենք: Նա նաև գիտի, թե ինչպես օրհնել մեզ, և Նա կառաջնորդի մեզ գործել Իր փոխարեն՝ ուրիշներին օրհնելու համար: Եթե մենք վստահենք Նրա իմաստությանը և առաջնորդությանը, ես գիտեմ, որ Նա կարող է ավելին ստանալ մեր կյանքից, քան մենք կարող ենք ինքնուրույն: