«Աստվածային նախագծով. առաքելական ուսմունքներ ընտանիքի մասին», Լիահոնա , սեպտ․ 2025
«Տերը նախագծել է ընտանիքը որպես Եկեղեցու և հասարակության հիմնական միավոր»։
Հազարամյակներ շարունակ մարգարեներն ու առաքյալները հռչակել են ընտանիքի սրբությունը և նախազգուշացրել այն աղետների մասին, որոնք կպատահեն անհատներին, ազգերին և աշխարհին, եթե ընտանիքները չպահպանվեն և պաշտպանված չլինեն: Ահա մի քանի ոգեշնչված խոսքեր մարգարեներից և առաքյալներից՝ կապված ընտանիքի և «Ընտանիք՝ Հայտարարություն աշխարհին» հռչակագրի կարևորության մասին:
Ընտանիքը կենտրոնական տեղ է գրավում Աստծո ծրագրում
Նախագահ Ռասսել Մ. Նելսոն
Հիսուս Քրիստոսի Վերջին Օրերի Սրբերի Եկեղեցու նախագահ
«Աստծո ծրագրի կարևորագույն մասը ընտանիքն է։ Իրականում, ծրագրի նպատակներից մեկը ընտանիքի վեհացումն է: Երկիրը ստեղծվել է, որպեսզի մենք՝ որպես մեր Երկնային Հոր նախաերկրային հոգևոր զավակներ, կարողանանք գալ երկիր և ստանալ ֆիզիկական մարմիններ: Մենք այստեղ ենք փորձվելու և ստուգվելու համար [տես Աբրահամ 3.24–25 ]: Մենք այստեղ ենք՝ «ընտրելու ազատություն և հավերժական կյանք ․․․ կամ ընտրելու գերություն և մահ» [2 Նեփի 2․27 ]։ Եվ ամենալավն այն է, որ մեզ թույլատրվում է սիրահարվել, ամուսնանալ և երեխաներին հրավիրել մեր ընտանիքներ» («Faith and Families », Ensign , մարտ 2007, 39):
«Նրանք, ովքեր լիովին չեն հասկանում Իր զավակների համար Հոր սիրառատ ծրագիրը, կարող են համարել այս ընտանեկան հռչակագիրը ոչ ավելի, քան քաղաքականության փոփոխական հայտարարություն: Ի հակադրություն սրա՝ մենք հաստատում ենք, որ ընտանիքի հռչակագիրը, որը հիմնված է անփոփոխ վարդապետության վրա, սահմանում է այնպիսի ընտանեկան հարաբերություններ, որտեղ կարող է տեղի ունենալ մեր հավերժական զարգացման ամենակարևոր մասը («Աստվածային սերը Հոր ծրագրում », Լիահոնա , մայիս 2022, 103)։
Մահկանացու կյանքում ընտանեկան կյանքը մեզ պատրաստում է հավերժության համար
Նախագահ Հենրի Բ. Այրինգ
Առաջին Նախագահության երկրորդ խորհրդական
«Ընտանեկան միավորը հիմնարար դեր ունի ոչ միայն հասարակության մեջ և Եկեղեցում, այլ նաև հավերժական կյանքի մեր հույսի հետ կապված։ Մենք սկսում ենք զբաղվել ընտանիքում՝ փոքր միավորում, այն, ինչ կտարածվի Եկեղեցու և հասարակության վրա, որտեղ մենք ապրում ենք այս աշխարհում, և ինչն այնուհետև կլինի այն, ինչ մենք կկիրառենք ընտանիքներում, որոնք հավերժ կապված են ուխտերով և հավատարմությամբ» («The Family » [Բրիգամ Յանգ Համալարանի հոգևոր հավաք, նոյ․ 5, 1995], 8, speakes.byu.edu):
«Մարդկային ինտիմ հարաբերությունը պահված է ամուսնացած զույգի համար, որովհետև այն բացարձակ միության գերագույն խորհրդանիշն է՝ ամբողջություն և միություն՝ կարգված և սահմանված Աստծո կողմից: Եդեմի պարտեզից սկսած՝ ամուսնությունը նախատեսված է որպես տղամարդու և կնոջ լիակատար միաձուլում՝ նրանց սրտերի, հույսերի, կյանքերի, սիրո, ընտանիքի, ապագայի և ամեն ինչի: Սա այնպիսի ամբողջականության միություն է, որ մենք օգտագործում ենք կնիք բառը՝ դրա հավերժական խոստումը արտահայտելու համար» (“Personal Purity ”, Ensign, նոյ. 1998, 76 Լիահոնա , հուն․ 1999):
«Երեխայի հանդեպ ծնողի սերը տիեզերքի ամենից զորավոր ուժերից մեկն է: Դա այն քիչ բաներից մեկն է այս երկրի վրա, որը, հիրավի, կարող է հավերժ լինել:
Այժմ, գուցե, զգում եք, որ ձեր հարաբերությունները ձեր երեխայի հետ այնքան էլ կատարյալ չեն։ Այստեղ է, որ Փրկչի զորությունը սկսում է գործել: Նա բժշկում է հիվանդներին, Նա նաև կարող է բժշկել հարաբերությունները: Նա բազմապատկում է հացն ու ձուկը, և Նա կարող է բազմապատկել սերն ու ուրախությունը ձեր ընտանիքում («Հիսուս Քրիստոսը ծնողների ուժն է », Լիահոնա , մայիս 2023, 56)։
Ամրացնել ընտանեկան օղակները, նույնիսկ, երբ մի քանիսը կարող են խզված լինել
Երեց Դեյվիդ Ա. Բեդնար
Տասներկու Առաքյալների Քվորումից
«Բոլոր նրանց, ովքեր իրենց ընտանիքներում տարել են ամուսնալուծության ցավը կամ զգացել են շահագործված վստահության տառապանքը, խնդրում եմ հիշել, որ կրկին դա սկսվում է ձեզանից։ Հնարավոր է, ձեր սերունդների մի օղակ խզվել է, բայց մյուս արդար օղակները և շղթայի մնացորդները հավերժորեն կարևոր են։ Դուք կարող եք ամրություն հաղորդել ձեր շղթային և գուցե օգնեք վերականգնել խզված օղակները։ Այդ աշխատանքը կիրականացվի մեկ առ մեկ» («Կապակցող օղակ » [համաշխարհային հոգևոր հավաք չափահաս երիտասարդների համար, 10 սեպտ․ 2017 թ․], Ավետարանի գրադարան):
Կանայք և տղամարդիկ առանձնահատուկ դերեր ունեն, ինչպես նկարագրված է «Ընտանիք՝ Հայտարարություն աշխարհին» [հռչակագրում], բայց նրանց կառավարումը հավասար է նշանակությամբ և կարևորությամբ։ Նրանք հավասար իշխանություն ունեն` հայտնություն ստանալու իրենց ընտանիքների համար: Երբ նրանք աշխատում են սիրով և արդարությամբ, նրանց որոշումները օրհնվում են երկնքից» («Մեծ սեր մեր Հոր զավակների հանդեպ », Լիահոնա , մայիս 2019, 79)։
«Աստված կարգեց, որ տղամարդիկ ու կանայք ամուսնանային և զավակներ ծնեին, այդպիսով իսկ Աստծո հետ միասին արարելով ֆիզիկական մարմիններ, որոնք մահկանացու փորձարկման բանալին են և կարևոր են Նրա հետ հավերժական փառքի համար։ Նա նաև կարգեց, որ ծնողները պետք է ընտանիքներ կազմեն և մեծացնեն իրենց երեխաներին լույսի և ճշմարտության մեջ՝ [տես Վարդապետություն և Ուխտեր 93․36-40 ], առաջնորդելով նրանց հուսալ Քրիստոսին» («Ինչո՞ւ ամուսնանալ, ինչո՞ւ ընտանիք ունենալ », Լիահոնա , մայիս 2015, 51)։
«Երբ մենք ընտրում ենք, թե հայտարարության որ մասն ընդունենք, մենք մշուշում ենք մեր հավերժական հեռանկարը, չափից ավելի կարևորելով այստեղ և այս պահին մեր ունեցած փորձառությունը։ Հավատքի աչքով և աղոթքով խորհելով հայտարարության շուրջ, մենք ավելի լավ ենք հասկանում, թե ինչպիսի գեղեցիկ կապ կա սկզբունքների միջև, որոնք աջակցում են մեկը մյուսին և հայտնի են դարձնում Իր զավակների համար նախատեսած մեր Հոր ծրագիրը» («Հավատքի աչքը », Լիահոնա , մայիս 2019, 35-36):