Itulau i le Lotoifale
Tatalo ma se Tofi Paia
O Tina Fealofani, e 15 tausaga le matua mai le Siteki o Mortdale i Sini Ausetalia Mortdale, e pei lava o le toatele o isi tagata talavou o tauivi e ola i le talalelei i se lalolagi e tumu i faalavefau. E ui i luitau o loo ia feagai, ua ia maua le malosi i le manatuaina o ia o se afafine o le Atua. “Ou te iloa o Iesu Keriso ma le Tama Faalelagi e iai pea iina mo i tatou. … Soo se taimi tatou te manaomia ai le fesoasoani,” o lana tala lea. O lenei faatuatua sa taialaina o ia i faaiuga faigata i le aoga, i totonu o lona aiga, ma i lana malaga patino faaleagaga.
O se tasi o luitau maoae o feagai ma Tina o le teenaina lea o faatosinaga a tupulaga. I lana aoga, e toatele tagata aooga e aafia i gaoioiga ia e faasagatau atu i mataupu faavae o le talalelei, e pei o le vaping. “Ina ua ou amata i le aoga maualuga, sa ou le mautinoa pe ou te faauo atu i nisi tagata ona latou te seāseā faia ni filifiliga lelei,” ua faasoa mai ai Tina. Nai lo le fiu, sa ia filifili ai e siomia o ia i uo e lagolagoina ona tulaga faatonuina. “Sa ou manao e iai i se siosiomaga e fesoasoani ia te a‘u e filifili le mea tonu. Ou te lei manao e faatosinaina i ni mea ou te iloa e le sa’o,” sa ia faamalamalama mai.
O se tasi auala ua ia maua ai le malosi e ala lea i faamanuiaga o le perisitua na tuuina atu e lona tama ia te ia i le amataga o tausaga faaleaoaoga taitasi. “O taimi uma ou te lagona ai le lotovaivai, ou te mafaufau ai i le faamanuiaga a lo‘u tama. Ou te manatua sa ia fai mai, ‘O le a e mafai ona faia mea faigata i lenei tausaga, ma na fesoasoani lena ia te a‘u,” na fai mai ai. O nei faamanuiaga e faamanatu atu ia te ia o loo silafia e le Atua o ia ma o le a taialaina o ia i ona luitau.
O se aafiaga patino e tasi na faamalosia le molimau a Tina i le tatalo. I se tasi aso, sa taaalo ai Tina ma ona tei laiti i le togalaau o le falesa na faafuasei ai ona lokaina i latou i totonu. “Sa na o na matou taaalo lava, ma matou iloa ai ua loka le faitotoa, ma sa le mafai ona matou o i fafo. Na amata ona matou popole aua e leai se tasi na i totonu o le falesa e faalogo mai,” Na manatua e Tina. O lona tuagane laititi, i le iloaina latou te manaomia se fesoasoani faalelagi, na filifili e tatalo. “Na ona ia faapea lava, Tama Faalelagi, faamolemole fesoasoani atu i se tasi e lagona mai i matou ma tatala mai le faitotoa.” Ona oo lea, e lei umi lava, na savali mai ai le epikopo ma lagona mai i matou! Sa ia fai mai ai Sa vave ona tatala e le epikopo le faitotoa, ma faasaoloto ai i latou. “O lena aafiaga na ou iloaina ai e faafofoga mai le Tama Faalelagi i a i tatou,” na tomanatu ai Tina.
Sa faalolotoina e lenei aafiaga le malamalamaaga o Tina i le mana o le tatalo. Sa ia iloa e pei lava ona fesoasoani le Tama Faalelagi ia i latou i lena taimi, e saunia pea o Ia e saunia le taitaiga ma le faamafanafanaga pe a liliu atu i a te Ia. “O lena aso, sa ou aoao ai o le tatalo e le na o mo mea tetele. E mo mea uma. E oo lava i mea laiti, e faafofoga mai le Tama Faalelagi,” sa ia faasoa mai. Talu mai lena taimi, sa ia faia ai le tatalo o se vaega sili ona faaauauina o lona olaga, i le iloaina o se tasi o avanoa silisili o le avea ai ma afafine o le Atua.
O le sootaga a Tina ma lona tuagane laitiiti na faamalosia foi i lenei aafiaga. Sa ia vaaia le faatinoina o lona faatuatua, ma sa musuia ai o ia e faateleina ai le faatuatua i le Atua. “O le vaaia o lo’u tuagane o tatalo ma se faatuatua tele na faamanatu mai ai tatou te le tau asaina taitoatasi ia luitau. E mafai lava ona tatou liliu atu pea i le Alii,” o lana tala lea. O lo la faamalosiauga tutusa sa faaauauina pea, aemaise lava i le la taumafaiga e toaaga pea i le talalelei. Pe afai e lagona e se tasi o i la‘ua le le faaosofia e auai atu i le lotu po o le seminare, ona laa mai lea o le tasi e faamalosiau ma siitia. “Pe a ou le lagona le fia alu, ona faapea mai lea o lo‘u tuagane, ‘Sau, ta o.’ Ma afai e le fia alu o ia, ou te fai atu iai le mea lava lea e tasi,” sa ia faaopoopo mai.
E ala atu i ona luitau ma aafiaga, ua oo ai ina malamalama Tina e faapea, o le iloaina o ia o se afafine o le Atua e sili atu nai lo na o se mafaufauga mafanafana—o se punavai o le malosi. “E fesoasoani ia te a‘u le iloa ou te mafai ona fai ni filifiliga lelei, e mafai ona ou tatalo i soo se taimi, ma o iai lo‘u aiga e lagolagoina au,” sa ia faamalamalama mai. Ua faaauau ona tuputupu a‘e lana molimau a o ia iloaina o le ola ai i le talalelei e aumaia ai faamanuiaga moni, aemaise lava pe a ia liliu atu i le Tama Faalelagi i le faatuatua. E ala i le opoina o lona faasinomaga paia ma le mana o le tatalo, ua aoaoina ai e Tina e le tuuatoatasi lava o ia i lana faigamalaga.
O le tala a Tina ua avea o se faamanatu i talavou uma o le faatuatua i le Atua e saunia ai le taitaiga ma le filemu i taimi o le le mautonu. O lona aafiaga i le togalaau, o lona faalagolagomaga i faamanuiaga faaleperisitua, ma ana tatalo i aso taitasi ua faamautu ai le mea moni e faapea o loo latalata mai pea le Tama Faalelagi. A o faaauau pea ona tuputupu a‘e ia Tina i le faatuatua, ua ia faamoemoe o le a oo foi ina iloa e isi le olioli o le iloaina o lo latou faasinomaga paia ma le alofa e le maluelue o lo latou Tama Faalelagi.