Osofaia le Malumalu o Manila Filipaina

Ata pue o le Malumalu o Manila Filipaina, na saunia e Leo Camposano Imperial

O Dignardino Espi, o le taitai o le puipuiga i le Malumalu o Manila Filipaina, sa popole ina ua taunuu atu o ia mo le galuega i le afiafi o le aso 1 o Tesema, 1989. I le amataga o lena aso, na fouvale ai tagata faaauupegaina i Manila, na mafua ai ona vave tupu fevesiaiga i le aai. O le taumafaiga lona fitu lea e faatoilalo le malo o Filipaina i totonu o le fa tausaga.

E ui lava i le vevesi faaupufai, ae sa olioli le Ekalesia i se faavae mausali i Filipaina. I le 30 tausaga ua mavae, na faatupulaia ai le faitauaofai o ona tagata mai se vaega toaitiiti o tagata talitonu Filipaina i le silia ma le 200,000 o le Au Paia. Ua 38 nei siteki i le atunuu ma misiona e iva. Ma talu mai lona faapaiaga ia Setema 1984, o le Malumalu o Manila Filipaina sa avea ma se punavai o le olioli tele ma le mana faaleagaga.

I le fale leoleo o le malumalu, na maua ai e Dignardino ana uo, o Felipe Ramos ma Remigio Julian. E ui lava ua mae’a a la sifi, ae sa mumusu nei alii e toalua e o i le fale. I le isi itu o le auala mai le malumalu sa i ai Camp Aguinaldo, o se nofoaga tele o le militeli. I le iloaina e mafai ona avea le tolauapiga ma taulaiga mo alii faaauupegaina, sa popole ai leoleo o le malumalu i le tuua o o la fale leoleo ma maua ai i le taua. Sa la mananao e nonofo ma fesoasoani e faasaoina le paia o le maota o le Alii ma ona lotoa.

Pe tusa o le ta o le itula e tasi i le taeao, na faatu ai e fitafita a le malo se poloka auala i se magaala e latalata i le malumalu. I ni nai itula mulimuli ane, na oso ae ai se tane-taavale tau i le auala, ma faaleagaina ai le puipui o loo siomia ai le malumalu.

A o tupu vevesi i le auala, sa saili e Dignardino ma isi taitai o le puipuiga ia leoleo e toalua o le malumalu e fesoasoani ia i laua e tausia le fale ma lona lotoa ia saogalemu. I le sailia o se malutaga mai pulufana a fitafita a le malo, e lei umi ae tatala faamalosi e se vaega o alii faitotoa o le malumalu. Sa taumafai Dignardino e faamalosia i latou e o ese, ae sa latou mumusu.

Mulimuli ane i lena aoauli, sa talanoa ai Dignardino ma le peresitene o le malumalu o Floyd Hogan ma le peresitene o le eria o George I. Cannon i le telefoni. Sa fautuaina o ia ma le aufaigaluega e Peresitene Cannon e sulufai i totonu o le malumalu. E lei leva mulimuli ane, ae pe pe laina telefoni.

O le taeao na sosoo ai o le Aso Sa anapogi, ma sa amata e le aufaigaluega a latou anapogi i le ole atu i le Atua e faasaoina le maota o le Alii mai le faaleagaina pe lamatia.

Na mavae atu le aso e pei lava o le aso na muamua atu. Sa faapepepepe helikopa i luga a’e o le fale ma tafana ae le lotoa o le malumalu i pulufana. Na faapalasi ifo e se vaalele ni pomu na lata ane, ma nutipalaina ai faamalama o le faleoloa o le Faletusi a le Ekalesia ma faaleagaina ai isi fale. I se tasi taimi, na fanaina ai e se vaalele tau ni roketi se lua i luga o le malumalu ma mu ai se malae tuaoi.

I le faatoa amata ai o le aoauli, na maua ai e Dignardino ni alii faaauupegaina e toa 10 latalata i le faitotoa ulufale o le malumalu. “O mea o le a outou maua i totonu o le fale o le malumalu e na’o le paia ma faalelotu lo latou natura,“ na ia fai atu ai ia i latou. Sa popole o ia, ae sa faaauau pea ona tautala. “Afai e tou te finau pea e ulufale atu i le saogalemu o le fale, o le a le toe i ai sona uiga paia,“ o lana tala lea. “Pe tou te aveesea mai ia i matou nei faamanuiaga?” Sa filemu nei alii, ma a o latou savavali ese atu, sa iloa e Dignardino sa pa’i atu ana upu ia i latou.

O lena afiafi, na faapotopoto ai e Dignardino lana aufaigaluega, ma sa latou toe sulufai ai i totonu o le malumalu. Sa ia faia se tatalo faatauanau, ma tuu lona faalagolago i le Alii e faasaoina Lona maota paia.

Sa latou faatalitali i le po atoa mo le palalas ifo o pomu, ae na mavae atu le tele o itula ma le filemu. Ina ua tafa ata i le taeao o le Aso Gafua, sa latou o ese atu ma le faaeteete mai le malumalu e vaavaai le tulaga o loo i ai. Ua leai ni tagata faaauupegaina. Na leai se mea na totoe na o auupega, meatau, ma toniga faamiliteli na lafoa’ia.

Sa asiasia e Dignardino ma isi alii le lotoa ma maua ai ni mea na faaleagaina i nisi o fale i fafo. Ae sa le’i afaina le malumalu lava ia.