Auala e Mafai Ona E Saunia ai mo le Afio Mai Faalua

Na saunoa mai Peresitene Nelson, “O le a toe afio mai ai Iesu Keriso i le lalolagi o le Mesia o le meleniuma.” “O lea la, o le asō ou te valaau atu ai ia te outou e toe tuuto atu o outou olaga ia Iesu Keriso.”

Na valaaulia i tatou e Peresitene Nelson e o mai ia Keriso ma ofo atu o tatou agaga atoa ia te Ia (tagai i le Ominae 1:26), ma molimau atu e faapea “o le mealilo lenei i se olaga o le olioli!”

O lenei faagasologa o le toe tuuto atu e ono foliga eseese mo tagata uma. Ae o le auai i gaoioiga ma faiga masani e faatupulaia ai lau molimau i le Faaola o le a fesoasoani ia te oe e tuuto atili atu ai ia te Ia. Tatalo ia iloa auala e mafai ona e tuuto atili atu ai oe lava ia Iesu Keriso.

O se tasi o auala sili e mafai ona faaleleia ai lo tatou avea ai ma soo o le tapuai e le aunoa i le malumalu. Pe a tatou faaaluina se taimi i le malumalu, tatou te aoao ai e uiga ia Keriso ma latalata atili atu ai ia te Ia. “O tagata uma e saili faamaoni atu ia Iesu Keriso o le a mauaina o Ia i totonu o le malumalu,” na aoao mai ai Peresitene Nelson.

O le i ai o se taimi faatulagaina e le aunoa i le malumalu e mafai ona faaleleia ma fausia ai lou avea ma soo ma le alofa i le Faaola. Sa saunoa mai Peresitene Nelsona, “Afai e te latalata i se malumalu, ou te uunaia oe ia saili se auala e fai ai sou taimi faatulagaina ma le Alii—ia i ai i totonu o Lona maota paia—ona tausia lea o lena taimi faatulagaina ma le sa’olele atoatoa ma le olioli.”

Ua faamanino mai e Peresitene Nelson e tatau ona tatou manatu mamafa i le faapotopotoina o Isaraelu. “Mo le tele o seneturi, na valo’ia ai lava e perofeta lenei faapotopotoina [tagai i le Isaia 11:11–12], ma o loo tupu i le taimi nei lava! I le avea ai ma se teuteu ala taua i le Afio Mai Faalua o le Alii, o le galuega aupito sili ona taua lea i le lalolagi!”

O le faapotopotoina o Isaraelu ua faataapeapeina e aofia ai le fesoasoani atu i isi i le osia ma le tausia o feagaiga. E aofia ai le galuega faafaifeautalai, malumalu, ma talafaasolopito o aiga. Tatou te mananao i isi ia o mai ia Iesu Keriso ma lagona Lona alofa.

O le aoao atili e uiga i le Faaola o se isi auala lea e faatupulaia ai lou avea ma soo. Sa saunoa mai Peresitene Nelson, “Ou te uunaia outou ia tuuto atu se taimi i vaiaso taitasi—mo lou olaga atoa o totoe—e faateleina ai lou malamalama e uiga i le Togiola a Iesu Keriso.”

O le suesue soo i le Togiola a Iesu Keriso e mafai ona fesoasoani ia te oe e faamalosia ai lau molimau i Lona mana. E mafai ona uunaia ai oe e salamo ma avea atili e faapei o le Faaola.

Faatasi ai ma Lana fesoasoani, e mafai ona tatou lelei atili ai. “E leai se tapulaa i le gafatia o le Faaola e fesoasoani ia te oe,” na aoao mai ai Peresitene Nelson. “O Ona mafatiaga le mafaamatalaina i Ketesemane ma luga i Kalevario sa faia mo oe! O Lana Taulaga le i’u e mo oe!”

O Se Aso Fiafia Tele

E pei ona aoao mai Peresitene Nelson:

“O le taimi lava lenei mo oe ma a’u, e saunia ai mo le Afio Mai Faalua o lo tatou Alii ma le Faaola, o Iesu le Keriso. O le taimi lava lenei mo i tatou ina ia avea ma a tatou faamuamua aupito silisili lo tatou avea ma so’o. …

“… O le mea silisili o le a oo mai, pe a tatou liliu atu o tatou loto ma o tatou olaga ia Iesu Keriso.”

A o tatou faalatalata atili atu ia te Ia, o le a Ia faalatalata atili mai ia i tatou (tagai i le Mataupu Faavae ma Feagaiga 88:63). Ma a toe afio mai o Ia, o le a Ia “soloiesea loimata uma” (Faaaliga 21:4). O le a avea ma aso fiafia tele.