O Ai e Manao e Faafiafia le Alii i le Asō?

O taeao Uma o Aso Sa pe a ma feiloai ma lo’u toalua ma le vaega e tautatala faaKorea o se vaega o la matou uarota, e tafe mai i le falesa ni manogi o teufugalaau manogi matagofie. I le itu taumatau o le pulelaa e masani lava ona i ai se teu matagofie o freesia manogi e faavaa i fuga o le amaranth o le kelope i se faamoega lanumeamata.

Ina ua ou siitia atu i le uarota i ni nai tausaga ua mavae, sa ou matauina Sister Geum-oak Choi o loo tauaveina se teu tulaga ese ma le matagofie o fugalaau. E lei umi ae ou iloaina sa ia aumaia ni teu fugalaau i vaiaso uma.

Ina ua ou fesili atu ia te ia pe aisea, sa ia fai mai, “Aua o le falelotu o se nofoaga matagofie.” Ua 45 tausaga o teuteuina e ia le pulelaa o le falesa.

O lana auaunaga faalevaiaso na faamanatu mai ai ia te au le mea na saunoa ai Peresitene Gordon B. Hinckley (1910–2008) i le tatalo o le faapaiaga mo le Malumalu o Seoul Korea i le 1985: “Matou te faapaiaina lotoa, faatasi ai ma lo latou matagofie atoa, e avea o se nofoaga talafeagai mo lenei maota paia.” Na faataitaia e Sister Choi lenei faamatalaga faigofie e ala i le faamamaluina o lo matou falelotu ma faamatagofieina.

I se tasi aso ina ua mae’a le lotu, na maua ai e lo matou epikopo ia Uso ma Tuafafine Choi i lo la fale o loo fuiina laau ma aveese vao mai fugalaau.

“Sister Choi, o le tele o au fugalaau e lei fua mai lava,” o le tala lea a le epikopo. “E mafai faapefea ona e aumaia fugalaau ua fua atoa i Sapati uma?”

Sa ia tali mai, “O taeao uma o Aso Sa, ou te tilotilo atu ai i le faatoaga ma fesili atu i fugalaau, ‘O Ai e manao e faafiafia le Alii i le asō?’ Ona ou lagonaina lea o fugalaau o alalaga mai, ‘O au, ou te fia alu! O lo‘u taimi lenei!”

Pe a ma asiasi atu ma lo‘u toalua ia Sister Choi, e na te faasino atua ma‘ua i se faitotoa agai i lona tuafale. E faitau selau laau ua galueaiina ma le faaeteete—fualaau aina, fugalaau, ma fualaau faisua—na salalau atu i se avanoa vaapiapi.

O le mea fiafia a Sister Choi o le fai togalaau e fesoasoani ia te ia e manatua ai Iesu Keriso i le vaiaso atoa (tagai i le Mataupu Faavae ma Feagaiga 20:77, 79). O teu taitasi na te saunia, na te aumaia ai ia te Ia se meaalofa anoa na fanau mai i le ositaulaga ma le ava. O ia o se fugalaau i le aai o Los Angeles, o loo faasoa mai le malamalama ma le alofa o Iesu Keriso e ala i lona tuuto.