O Le Moni o o Tatou Olaga

O La Tatou Sailiga mo le Upumoni

I lenei vaitaimi ua tatou ola ai, ua tele atu le malamalama ua avanoa mo i tatou nai lo se isi lava taimi muamua. I aso ua mavae, afai e te fia iloa se mea, e tatau ona e alu i le faletusi E sue ai. I aso nei, ua maua ai e le initoneti ma masini e uuilima le tele o faamatalaga e toetoe lava a le gata e mafai ona tatou mauaina toetoe lava i le taimi lava lena.

E fiafia le Alii pe a tatou faaaogaina ma le atamai ia punaoa o loo avanoa mo i tatou, ae ua Ia saunia lenei fautuaga mo taimi uma: “Ia outou saili ma le filiga ma aoao atu e le tasi i le isi i upu o le poto; ioe, ia outou saili mai totonu o tusi sili ona lelei upu o le poto; saili i le aoaoina, e ala lava i le suesue ma le faatuatua foi” (Mataupu Faavae ma Feagaiga 88:118). Ua ia uunaia i tatou e aoao e uiga i le lalolagi o siomia ai i tatou (tagai i le Mataupu Faavae ma Feagaiga 88:79; 93:53), ae i la tatou sailiga mo le upumoni, e tatau ona tatou vaavaai atu i le Atua, o lē “e malamalama … i mea uma, ma ua i ai mea uma i ona luma, … ma ua i ai o ia i luga o mea uma, … ma o mea uma ua ala mai ia te ia, ma e a ia” (Mataupu Faavae ma Feagaiga 88:41).

Faatasi ai ma upumoni ua tuuina mai e le Atua ia i tatou, o se tasi o faavae sili ona faavae mo o tatou olaga i le lalolagi o Ia o lo tatou Tama Faalelagi. O i tatou o Ona atalii ma afafine faaleagaga. E Na te silafia ma alofa atoatoa ia i tatou, Ma i le avea ai ma Ana fanau agaga, ua ia i tatou se natura ma se taunuuga paia. O le malamalama ma le taliaina o nei upumoni e faavavau e aumaia ai ia i tatou le faasinomaga, taua, ma le faamoemoega lea na faamanuiaina ma taitaiina ai i tatou i lo tatou muai olaga ma o le a faaauau pea ona faia faapea i le taimi nei ma le faavavau.

Sa Tatou Faatasi ma le Tama i le Amataga

A o tatou sailia le moni o mea “e pei ona sa i ai,” tatou te iloa ai upu nei mai lo tatou Faaola, o Iesu Keriso: “Ma o lenei, e moni Ou te fai atu ia te outou, sa Ou i ai i le amataga faatasi ma le Tama, ma o A’u o le Ulumatua na fanaua,” ma “sa outou i ai foi i le amataga faatasi ma le Tama” (Mataupu Faavae ma Feagaiga 93:21, 23).

A o lei oo i lo tatou olaga i le lalolagi, sa tatou auai i se fonotaga i le lagi lea na tuuina mai ai e lo tatou Tama Faalelagi Lana fuafuaga sili o le fiafia. Na aoao mai le Perofeta o Iosefa Samita o le uunaiga a le Atua mo Lana fuafuaga o le tuuina mai lea ia i tatou “le avanoa e alualu ai i luma e pei o Ia lava [ma] … ia faaeaina i latou faatasi ma Ia.“ O Lana galuega ma Lona mamalu o le “ia aumaia le tino ola pea ma le ola faavavau o le tagata” (Mose 1:39).

Na tatou faaaogaina la tatou faitalia ma filifili e mulimuli ai i le fuafuaga a le Tama Faalelagi. Ua faamanuiaina i tatou i le fananau mai i lenei olaga, lea e faaauau ai pea ona tatou maua le faitalia ma mafai ai ona tatou oo i le olaga faaletino, aoao, ma agai i luma i le ola e faavavau.

I le taimi o la tatou malaga i la le tino, o le a tatou oo i luitau ma faafitauli. Ae e le manaomia ona tatou feagai na o i tatou ma faigata o le olaga. Na aoao mai Iosefa Samita e faapea o le Tama Faalelagi, “O loo silasila mai le Matua Sili o le lagi ma le lalolagi i luga o le aiga atoa o tagata ma lona agalelei faatama ma lana tausiga faamatua.”

O lo tatou Tama Faalelagi, “o le Tama e ona le alofa mutimuti vale, o le Atua o faamafanafanaga uma,” o le a faamanuiaina i tatou, siitia i tatou, ma faamafanafanaina i tatou “i o tatou puapuaga uma, ina ia mafai ona tatou faamafanafanaina i latou o e o i ai i soo se puapuaga, i le faamafanafanaga ua faamafanafanaina ai i tatou lava e le Atua” (2 Korinito 1:3–4). I le avea ai o se vaega taua o Lana fuafuaga, ua saunia ai e le Tama Faalelagi le ala mo i tatou e toe foi atu ai ia te Ia.

O Le Ala i lo Tatou Tama

O le upumoni “i mea e pei ona i ai moni” (Iakopo 4:13) ua manino: e le mafai ona tatou ausia na’o i tatou lava o tatou gafatia atoatoa o ni fanau a lo tatou Tama Faalelagi. O Iesu Keriso, le Alo Ulumatua o le Tama i le agaga, na osifeagaiga e avea ma o tatou Faaola ma Togiola.

O Iesu Keriso, “o le Toatasi na Fanaua e le Tama, ua tumu i le alofa tunoa ma le upumoni, le Agaga lava lea o le upumoni, … na afio mai ma mau i la le tino, ma mau i totonu o i tatou” (Mataupu Faavae ma Feagaiga 93:11). Na afio mai o Ia e faailoa mai ia i tatou le ala e maua ai le fiafia, le uiga, ma le olioli i lenei olaga ma i le faavavau.

“Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.

“E lei auina mai e le Atua lona Atalii i le lalolagi ina ia faasala i le lalolagi; a ia faaolaina le lalolagi ia te ia” (Ioane 3:16–17).

E taua le aafiaga faalelalolagi o le Faaola. O Ia “Sa lei maua e ia le atoatoaga i le amataga, ae sa maua e ia le alofa tunoa mo le alofa tunoa” (Mataupu Faavae ma Feagaiga 93:12). Sa tuputupu a’e o Ia se’ia “maua e ia se atoatoaga o le mamalu o le Tama” ma “sa maua e ia le mana uma, i le lagi ma i le lalolagi, ma sa faatasi ma ia le mamalu o le Tamā, ona sa afio o ia i totonu o ia” (Mataupu Faavae ma Feagaiga 93:16–17). Sa aoao mai le Faaola:

“Ou te tuu atu ia te outou nei upu, ina ia outou malamalama ma iloa ai le ala e tapuai ai, ma iloa ai le mea tou te tapuai i ai, ina ia mafai ona outou o mai i le Tamā i loʼu igoa, ma maua lona atoatoaga i le taimi e tatau ai.

“Aua afai tou te tausi i aʼu poloaiga, o le a outou maua lona atoatoaga, ma faamamaluina ia te aʼu e pei o aʼu i le Tamā; o lea, Ou te fai atu ia te outou, o le a outou maua le alofa tunoa mo le alofa tunoa” (Mataupu Faavae ma Feagaiga 93:19–20).

I le Faatoaga o Ketesemane ma luga o le satauro, na tauave ai e Iesu Keriso i Ona lava luga agasala a le lalolagi ma mafatia i faanoanoaga uma ma “tiga ma puapuaga ma faaosoosoga o ituaiga eseese uma” (Alema 7:11). O lenei mea “na oo [ai] ia te [Ia], … o lē ua silisili i tagata uma, le gatete ona o le tiga, ma tafe toto ai i pu afu ninii uma” (Mataupu Faavae ma Feagaiga 19:18.) E na o Iesu Keriso ma Lana Togiola ma le Toetu e mafai ai ona maua le faaolataga ma le faaeaga.

E ala i le alofa tunoa ma le taulaga togiola a le Faaola, e mafai ai ona tatou tuputupu ae seia oo ina tatou maua se atoatoaga ma mafai ai ona aumai i se aso i le atoatoaga. Afai o le a tatou mulimuli i le faataitaiga a le Faaola ma usiusitai i Ana poloaiga, o le a Ia taitaia ma taialaina i tatou i lo tatou ala e toe foi atu ai i le afioaga mamalu o lo tatou Tama oi le Lagi.

Keriso i le Auala i Ierusalema, saunia e Michael Coleman, e le mafai ona kopiina

Pe O le a E Maua Lana Meaalofa?

Faatasi ai ma upumoni “o mea e pei ona i ai moni” (Iakopo 4:13), ua tatou aoao ai o o tatou aafiaga i le faavavau o le a fuafuaina e ala i la tatou filifiliga e mulimuli ia Iesu Keriso ma maua meaalofa ua Ia ofoina mai. Ua aoao mai tusitusiga paia o le a tatou “olioli i mea ua [tatou] loto e talia.” O le faanoanoaga, o nisi o le a le “loto e olioli i mea semanu latou te maua” (Mataupu Faavae ma Feagaiga 88:32).

Sa aoao atu e lo’u peresitene o le misiona, o Elder Marion D. Hanks (1921–2011), o le sa avea ma Fitugafulu Pulega Aoao, ana faifeautalai e faapea, o le ole atu mo mea tatou te naunau e maua ma olioli ai o se auala e mafai ona tatou faamasinoina ai le mea o loo tatou i ai i la tatou malaga faaleagaga. “Aua o se a se aoga i se tagata pe a tuu atu se meaalofa i ona luga, ae na te lē taliaina le meaalofa?” A o tatou mauaina meaalofa a le Faaola e ala i le sailia ma le naunautai ma mulimuli ia te Ia, o le a tatou olioli i le faamoemoe o le ola e faavavau ma “ia te ia o lē na tuuina mai [lena] meaalofa” (Mataupu Faavae ma Feagaiga 88:33). O lenei meaalofa ua tuuina mai ma le agalofa tele “le meaalofa silisili lea o meaalofa uma a le Atua” (Mataupu Faavae ma Feagaiga 14:7).

O le Atua o lo tatou Tama Faalelagi. Na te silafia ma alofa ia i tatou. A o tatou liliu atu ia te Ia i la tatou sailiga mo le upumoni, e mafai ona tatou pipii atu i le atamai, maua le poto, talia le upumoni, alolofa i le mama, ma pipii atu i le malamalama e sau mai ia te Ia (tagai i le Mataupu Faavae ma Feagaiga 88:40). Ona tatou faaauau ai lea i o tatou olaga atoa seia “oo mai le aso o le a [tatou] malamalama ai i le Atua lava, i le faaolaina o [tatou] ia te ia ma e ia” (Mataupu Faavae ma Feagaiga 88:49).

O le a avea lena ma se aso sili ona mamalu ma olioli.