Nofonofo i le Ala o le Faaola

I le tolu tausaga ua mavae, na maua ai a’u i le faamai o le Parkinson—o se faaletonu na mafua ai ona tetete ma malō. O se tala fou na sili ona lofituina ai, ma sa ou manatu ua uma lo’u olaga.

I nai masina na sosoo ai, sa ou pa’u atu ai i se vaieli o le pogisa, popole, ma le atuatuvale. Sa ou fefe i luitau o i luma atu. Sa ou manatu e le mafai ona ou ola umi ma le tiga faifai pea i o’u lima ma le tetete o o’u lima. Ma’eu lo’u moomoo e nofonofo i le ala o le Faaola ma pa’i atu i Lona ofu, e pei foi o le fafine ma le puna toto!

“Aua ua faapea o ia, Afai ou te pa’i atu tau lava o ona ofu, ona ou malolo ai lea” (Mareko 5:28).

E ui lava i togafitiga faafomai ma le tele o tatalo e aioi atu mo se toomaga, ae sa le’i oo mai se fofo. I se tasi aso, a o ou tatalaina atu lo’u loto i le Tama Faalelagi, sa ou maua ai se malamalama loloto atu. O le Alii sa na faamaloloina a’u—e le o le faamalologa faaletino sa ou faamoemoe i ai ae o le faamalologa sa ou manaomia: o le faamalologa faaleagaga.

O iina na ou iloa ai ua faatupulaia lo’u faatuatuaina o le “aoaoga faaleagaga” a le Atua. Na atili ai ona faatauanau a’u tatalo ma le agaalofa mo isi. Sa amata ona ou faaaluina se taimi i aso taitasi e mafaufau loloto ai ma aluese mai mea faalavefau, ma vaavaai mo lesona e mafai ona ou aoaoina mai o’u luitau. Sa i ai se uiga fou o le Togiola a Iesu Keriso, ma sa atili faanatinati ai lo’u manaomia o le salamo.

I le lotolotoi o lo’u tiga, ina ua ou lagonaina e leai se isi mea ou te saofaga atu ai, sa ou tei i se valaauga e avea ma peresitene o le Aualofa a le uarota. O le faagaloina o o’u faafitauli a o ou auauna atu i isi tamaitai o se faamanuiaga mai se Tama alofa, e pei o loo Ia fetalai mai o loo Ia faatuatuaina pea a’u. O le taui, ua ou maua ai le alofa ma le agalelei o uso agalelei o e malamalama i o’u luitau.

O le asō ua ou lagona ai o loo ou nofonofo i le ala o le Faaola. A o ou faatalitali mo Ia, o loo faamamaina a’u e o’u luitau.

E mafai e le Alii ona faamaloloina o tatou tiga, pe faaletino, faalelagona, pe faaleagaga, ae e tatau ona tatou faatinoina le faatuatua i Lana faamalologa ma faatalitali ma le onosai. I se itu i luga o le ala, o le a matua latalata mai lava le Faaola ma mafai ai ona tatou pai atu i Ona ofu ma faalogo atu ia te Ia o fetalai mai, “Afafine e, ua e ola i lou faatuatua; ina alu ia oe ma le manuia, ma ia e malolo i lou ma’i tiga” (Mareko 5:34).