“Ua ia Te i Tatou,” Liahona, Aok. 2025.
Tamaitai o le Feagaiga
“Ua ia Te i Tatou”
O le mana o le Faaola o le a alu ifo i luga o Lona nuu faamaoni o le feagaiga.
Ou te fiafia i le tala ia Elisaia le perofeta. Sa mana’o le tupu o Suria e pu’ea Elisaia ma auina atu ’autau e siomia le aai lea sa nofo ai. Ina ua vaai atu le auauna talavou a Elisaia ia i latou, sa fefe o ia ma fesili atu ia Elisaia po o le a le mea o le a latou faia. (Tagai i le 2 Tupu 6:11–15.) O le a tali a Elisaia e faapea “Aua ete fefe: aua e toatele ua ia te i tatou i e ua ia te i latou” (2 Tupu 6:16). Atonu na mafaufau le auauna pe faapefea ona mafai lenei mea ona sa ia iloa ua siomia i latou e le fili. Ona tatalo ai lea o Elisaia ina ia faapupula e le Alii mata o le taulealea, ma ua ia iloa atu faapea “ua tumu le mauga i solofanua ma kariota afi ua latou vagavagai ia Elisaia” (2 Tupu 6:17).
Po o fea lava e te i ai i le lalolagi, ia manatua pea o i latou o loo faatasi ma i tatou ma fesoasoani mai ia i tatou ma faamalosiau mai ia i tatou, e sili atu nai lo i latou o e ono faasaga tau mai ia i tatou, e tusa lava po o a foliga vaaia. A o tatou filifili e tumau le fesootaiga saogalemu ma lo tatou Tama oi le Lagi ma Iesu Keriso e ala i a tatou feagaiga ma i La’ua, e mafai ona tatou mautinoa lena mea moni. Ma o i latou o e o le a faatasi ma i tatou e sili atu le malosi nai lo i latou o e atonu e ono faasaga tau mai ia i tatou. Ou te molimau i lena mea!
E pei lava ona folafola mai e le faifeautalai sili o le Tusi a Mamona o Amona ina ua mavae le tele o tausaga o faigata ma le olioli i le talai atu i sa Lamanā, e i ai foi se aso o le a tatou folafola atu ai:
“Ioe, ua ou iloa o a’u o se tagata noa; a faatatau i loʼu malosi ou te vaivai; o lea ou te le mitamita ai ia te a’u lava ia, ae ou te mitamita i loʼu Atua, ona o lona malosi e mafai ai ona ou faia o mea uma; ioe, faauta, e tele vavega tetele ua tatou faia i lenei laueleele, o mea o le a tatou viia ai lona suafa e faavavau.
“… Faauta, o ai ea e mafai ona tele naua lona mitamita i le Alii? Ioe, o ai e mafai ona tele naua upu na te faia e uiga i lona mana tele, ma e uiga i lona alofa mutimutivale, ma i lona tali-tiga i le fanauga a tagata?” (Alema 26:12, 16, faaopoopo le faamamafa).
O Se Atua o le Mana Tele ma le Alofa Mutimutivale
O le Atua lena tatou te tapua’i i ai! O se Atua o le mana tele ma le alofa mutimutivale ma le loa ona tali-tiga! O se Atua e i ai sana fuafuaga e togiolaina i tatou—o le fuafuaga tele o le fiafia—ua mafai ona maua e ala i lo tatou Faaola pele ma Lana taulaga togiola mo i tatou (tagai i le Alema 42).
O le a faatasi pea lo tatou Tama oi le Lagi ma Lona Alo, o Iesu Keriso, ma i tatou i soo se mea tatou te o i ai i le lalolagi, pe afai tatou te faatagaina i La’ua e ala i le filifilia o i La’ua ma faaauau pea ona filifili i La’ua. E La te le faamalosia i La’ua lava i o tatou olaga. O la tatou filifiliga, ae aisea e filifili ai e alu na o i tatou pe afai e mafai ona tatou maua le mana paia, puipuiga, ma folafolaga ua La ofoina mai ia i tatou a o tatou filifili e fusia ma le olioli i tatou lava ia i La’ua e ala i se sootaga o le feagaiga? O le mea lena sa i ai ia Elisaia le perofeta, ma ona o lena mea, sa le fefe ai o ia, e ui lava ina sa siomia o ia e autau a le tupu amioleaga.
Na vaai Nifae i o tatou aso:
“Ma sa oo ina ou vaai atu i le ekalesia a le Tamai Mamoe a le Atua, ma sa toaitiiti lona aofai.
“Ma sa oo ina o a’u o Nifae, sa vaai i le mana o le Tamai Mamoe a le Atua, ua alu ifo i luga o le au paia o le ekalesia a le Tamai Mamoe, ma luga o le nuu o le feagaiga a le Alii, o e sa faataapeapeina i luga o le fogaeleele atoa; ma sa faaauupegaina i latou i le amiotonu ma le mana o le Atua i le mamalu tele” (1 Nifae 14:12, 14).
Ua Faaauupegaina le Nuu o le Feagaiga i le Mana
I le avea ai ma tagata o le Ekalesia toefuataiina a Keriso i le lalolagi atoa, e toalaiti lava i tatou i le aofai, ae o le folafolaga o le a afio ifo le mana o le Tamai Mamoe a le Atua i luga o nuu o le feagaiga a le Alii o e ua faataapeapeina i luga o le fogaeleele atoa. O i Tatou Na! A o tatou tausia a tatou feagaiga ma le Atua, o le folafolaga, o le a faaauupegaina i tatou i Lona mana.
Ou te molimau atu faatasi ma Peresitene Jeffrey R. Holland, o le Sui Peresitene o le Korama a Aposetolo e Toasefululua, o loo siomia i tatou e agelu i itu uma e lua o le veli. E pei ona ia folafolaina: I le faia o lea mea ou te molimau atu ai e le taitai tuua na o i tatou e le Atua, e le tuua lava i tatou e le lagolagoina i luitau tatou te fetaiai. … Ma e i ai lava i taimi uma na agelu o e o mai ma o mai faataamilo i o tatou autafa, o e vaaia ma e le vaaia, o e iloa ma e le mailoa, faaletino ma tino ola pea.”